100% ലാഭവിഹിതം പ്രഖ്യാപിച്ച് എന്‍എസ്ഡിഎല്‍, ആർക്കെല്ലാം അധിക വരുമാനം ലഭിക്കും, റെക്കോർഡ് തീയതി അറിയാം

ആസ്തിയുടെ കാര്യത്തില്‍ ഇന്ത്യയിലെ ഏറ്റവും വലിയ ഡിപ്പോസിറ്ററിയാണ് നാഷണൽ സെക്യൂരിറ്റീസ് ഡിപ്പോസിറ്ററി അഥവാ എന്‍എസ്ഡിഎല്‍. പ്രവര്‍ത്തനം ഡ്യുവോപോളി മേഖലയിലാണ്. വിപണികളില്‍ പ്രബല സ്ഥാനം കൈയടക്കിയിരിക്കുന്നു. സ്ഥിരമായ ഒരു വരുമാന പ്രവാഹമുണ്ട്. ഇത് ശക്തവുമാണ്. സമീപ വര്‍ഷങ്ങളില്‍ കമ്പനി സ്ഥിരമായ വരുമാന വളര്‍ച്ചയും, ആരോഗ്യകരമായ ലാഭവും രേഖപ്പെടുത്തിയിട്ടുണ്ട്. ഇപ്പോൾ ഇതാ വരാനിരിക്കുന്ന വാർഷിക പൊതുയോഗത്തിന് (എജിഎം) മുന്നോടിയായി 100 ശതമാനം ഡിവിഡന്‍റ് പേഔട്ട് പ്രഖ്യാപിച്ചു. പ്രഖ്യാപനത്തെക്കുറിച്ച് നിങ്ങൾ അറിഞ്ഞിരിക്കേണ്ട 5 പ്രധാന കാര്യങ്ങൾ നോക്കാം.

1. റെക്കോർഡ് തീയതി

കമ്പനിയുടെ ഫയലിംഗ് പ്രകാരം റെക്കോർഡ് തീയതി 2025 സെപ്റ്റംബർ 19 വെള്ളിയാഴ്ചയായി നിശ്ചയിച്ചു. റെക്കോർഡ് ഡേറ്റ് അഥവാ എക്സ് ഡേറ്റ് എന്നത് ലാഭവിഹിതം നൽകുന്നതിന് യോ​ഗ്യരായ ഓഹരിയുടമകളെ കണ്ടെത്തുന്നതിന് നിശ്ചയിക്കുന്ന ദിവസമാണ്. ഈ തിയ്യതിക്ക് മുമ്പ് ഓഹരി ഹോൾഡിങ്ങിൽ ഉണ്ടെങ്കിൽ മാത്രമേ ലാഭവിഹിതം ലഭിക്കുകയുള്ളൂ. അതായത് റെക്കോർഡ് ഡേറ്റിലെ കമ്പനികളുടെ കൈവശമുള്ള റെക്കോർഡ് പ്രകാരമാണ് ഡിവിഡന്‍റ് നൽകുന്നത്.

2. എത്ര ലാഭവിഹിതം നൽകും..?

മെയ് മാസത്തിൽ എന്‍എസ്ഡിഎല്‍ ബോർഡ് 2 രൂപ മുഖവിലയുള്ള ഓരോ ഇക്വിറ്റി ഷെയറിനും 2 രൂപ അന്തിമ ലാഭവിഹിതം ശുപാർശ ചെയ്തിരുന്നു. ഇത് 100 ശതമാനം പേഔട്ടിന് തുല്യമാണ്. "2025 മെയ് 23 ന് നടന്ന കമ്പനിയുടെ ഡയറക്ടർ ബോർഡ് യോഗത്തിൽ, 13-മത് വാർഷിക പൊതുയോഗത്തിൽ ഓഹരി ഉടമകളുടെ അംഗീകാരത്തിന് വിധേയമായി, 2 രൂപ മുഖവിലയുള്ള (അതായത് 100%) ഓരോ ഇക്വിറ്റി ഷെയറിനും 2 രൂപ ലാഭവിഹിതം ശുപാർശ ചെയ്തിരുന്നു" എന്ന് ഫയലിംഗിൽ വ്യക്തമാക്കി.

3. എപ്പോൾ ലാഭവിഹിതം നൽകും..?

പതിമൂന്നാം വാർഷിക പൊതുയോഗം (എജിഎം) സെപ്റ്റംബർ 29 ന് നടക്കും. നിർദ്ദേശം അംഗീകരിക്കപ്പെട്ടാൽ, ഒക്ടോബർ 28 ന് മുമ്പ് കമ്പനി ലാഭവിഹിതം നൽകും.

4. പാദഫലം

2026 സാമ്പത്തിക വർഷത്തെ ആദ്യ പാദത്തിൽ എൻഎസ്ഡിഎൽ 90 കോടി രൂപയുടെ അറ്റാദായം റിപ്പോർട്ട് ചെയ്തു. കഴിഞ്ഞ വർഷത്തെ അപേക്ഷിച്ച് 15% വർധന. പ്രവർത്തന പ്രകടനവും മെച്ചപ്പെട്ടു, ഇബിഐടിഡിഎ മാർജിൻ കഴിഞ്ഞ വർഷത്തെ 23.89% ൽ നിന്ന് 30.51% ആയി വർദ്ധിച്ചു.

5. ഓഹരി വില

എൻഎസ്ഇയിൽ 1,288 രൂപയാണ് എൻഎസ്ഡിഎൽ ഓഹരിയുടെ വില. കഴിഞ്ഞ അഞ്ച് ദിവസത്തിനിടെ 2.9 ശതമാനം വളർച്ച കൈവരിക്കാൻ ഓഹരിക്ക് സാധിച്ചു. കഴിഞ്ഞ മാസം ഓഗസ്റ്റ് 6-നാണ് എൻ‌എസ്‌ഡി‌എൽ വിപണിയിൽ പ്രവേശിച്ചത്. ഇഷ്യു വിലയായ 800 രൂപയിൽ നിന്ന് കമ്പനി 880 രൂപയ്ക്ക് ലിസ്റ്റ് ചെയ്തു. ഇത് ലിസ്റ്റിംഗ് നേട്ടത്തിൽ 10% നേട്ടം കൈവരിച്ചു. ഓഹരിയുടെ 52 ആഴ്ചയിലെ ഏറ്റവും ഉയർന്ന വില 1,425 രൂപയാണ്. വിപണി മൂലധനം നിലവിൽ 25,000 കോടി രൂപയിലധികമാണ്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.