വിപണിയിൽ വഴി തെറ്റി ഓല ഇലക്ട്രിക്, ഓഹരി വില 43 ശതമാനം ഇടിഞ്ഞു, ഭാവിയിൽ കുതിക്കുമോ, കിതയ്ക്കുമോ..?

2024 ഓഗസ്റ്റ് മാസം ഇന്ത്യൻ ഓഹരി വിപണിയിലേക്കെത്തിയ കമ്പനിയാണ് ഓല ഇലക്ട്രിക് മൊബിലിറ്റി. ഓഗസ്റ്റ് 9-ആം തീയ്യതിയാണ് ഓല ഓഹരികൾ വിപണിയിൽ ലിസ്റ്റ് ചെയ്തത്. ഐപിഒ വിലയായ 76 രൂപയിൽ തന്നെയായിരുന്നു ലിസ്റ്റിങ്. എന്നാൽ, അന്നുതന്നെ ഓഹരി വില 20% ഉയർന്ന് അപ്പർ-സർക്യൂട്ടിലെത്തി. പിന്നീടുള്ള ദിവസങ്ങളിലും ഓഹരി മുകളിലേക്ക് ഉയർന്നു. എന്നാൽ ഓഹരി വില ഇതുവരെയുള്ള ഏറ്റവും ഉയർന്ന വിലയായ 157.40 രൂപയിൽ എത്തിയതിന് പിന്നാലെ തകർന്നു.

തിങ്കളാഴ്ച ആദ്യ സെഷനിൽ തന്നെ ഏകദേശം 8 ശതമാനത്തോളം നഷ്ടമാണ് ഓല ഇലക്ട്രിക് മൊബിലിറ്റി ഓഹരിക്ക് സംഭവിച്ചത്. കഴിഞ്ഞ ആറ് ട്രേഡിംഗ് സെഷനുകളിൽ അഞ്ചിലും ഇടിവ് രേഖപ്പെടുത്തിയ ഓഹരിക്ക് ഇത് തുടർച്ചയായ മൂന്നാം ദിവസമാണ് നഷ്ടം. ഏറ്റവും ഉയർന്ന വിലയിൽ നിന്നും ഇതുവരെ 43 ശതമാനത്തോളം ഇടിവാണ് ഓല ഇലക്ട്രിക് മൊബിലിറ്റി ഓഹരി നേരിട്ടത്. 91 രൂപയാണ് നിലവിലെ ഓഹരി വില. എന്താണ് ഇടിവിന് പിന്നിലെ കാരണമെന്ന് നമുക്ക് വിദശദമായി പരിശോധിക്കാം.

ഇടിവിന് കാരണം

നടപ്പ് സാമ്പത്തിക വർഷത്തിൻ്റെ തുടക്കം മുതൽ തന്നെ ഓലയുടെ വിപണി വിഹിതത്തിൽ കാര്യമായ ഇടിവ് രേഖപ്പെടുത്തി. ഏപ്രിലിൽ 52 ശതമാനം ആയിരുന്നത് സെപ്തംബർ മാസത്തിൽ 27 ശതമാനം ആയി കുറഞ്ഞു. വാഹൻ ഡാറ്റ പ്രകാരം. ബജാജ് ഓട്ടോ, ടിവിഎസ് മോട്ടോർ തുടങ്ങിയ ലെഗസി ഓട്ടോ പ്ലെയറുകൾ ഓല ഇലക്ട്രിക് മൊബിലിറ്റിക്ക് വലിയ വെല്ലുവിളി ഉയർത്തുന്നുണ്ട്. ഏപ്രിലിൽ ഏകദേശം 12% വിപണി വിഹിതം ഉണ്ടായിരുന്ന ബജാജ് ഓട്ടോയ്ക്കും ടിവിഎസ് മോട്ടോറിനും സെപ്റ്റംബറിൽ ഏകദേശം 20% വിപണി വിഹിതം നേടാൻ സാധിച്ചു.

ഓല ഇലക്ട്രിക് അടുത്തിടെ 40,000 രൂപ വരെയുള്ള ഉത്സവ കിഴിവുകളും 49,999 രൂപ മുതൽ ആരംഭിക്കുന്ന S1 X സ്‌കൂട്ടർ ശ്രേണിയും അവതരിപ്പിച്ചിരുന്നു. എന്നാൽ കമ്പനിയുടെ സേവനത്തെ ചൊല്ലി സോഷ്യൽ മീഡിയയിൽ വലിയ വിവാദങ്ങളുയർന്നത് തിരിച്ചടിയായി. കമ്പനിയുടെ സേവനത്തെ വിമർശിച്ച ഹാസ്യനടൻ കുനാൽ കംറയുടെ ട്വീറ്റ് ഓൺലൈനിൽ വ്യാപകമായ ചർച്ചയ്ക്ക് കാരണമായതിനെത്തുടർന്ന് വിഷയം പൊതുജനശ്രദ്ധ നേടി. ഒലയുടെ സ്ഥാപകൻ ഭവിഷ് അഗർവാൾ പ്രതികരണമായി രംഗത്തെത്തിയെങ്കിലും സ്ഥിതി കൂടുതൽ വഷളാവുകയാണ് ചെയ്തത്.

ഓഹരിയുടെ ഭാവി

ഓല ഇലക്ട്രികിന്‍റെ പ്രാരംഭ പബ്ലിക് ഓഫറിംഗ് (IPO) 4.4 തവണ സബ്‌സ്‌ക്രൈബുചെയ്‌ത് വൻ വിജയമായിരുന്നു. എന്നിരുന്നാലും, സമീപകാല ഓഹരി പ്രകടനം കമ്പനിയുടെ വളർച്ചാ പാതയെക്കുറിച്ച് ആശങ്ക ഉയർത്തുന്നു. സേവന പ്രശ്‌നങ്ങൾ പരിഹരിക്കുന്നതിനും ഉപഭോക്തൃ സംതൃപ്തി മെച്ചപ്പെടുത്തുന്നതിനും തിരക്കേറിയ മേഖലയിൽ മത്സരാധിഷ്ഠിത വിലനിർണ്ണയം നിലനിർത്തുന്നതിനും ഇന്ത്യയുടെ ഇവി വിപണിയിൽ നേതൃത്വം നിലനിർത്താനുള്ള ഓലയുടെ കഴിവിനെ ആശ്രയിച്ചിരിക്കും വരും ദിവസങ്ങളിൽ ഓഹരിയുടെ പ്രകടനം.

ബജാജ്, ടിവിഎസ് തുടങ്ങിയ പ്രമുഖ വാഹന കമ്പനികൾ അവരുടെ ഇവി പോർട്ട്‌ഫോളിയോകൾ അതിവേഗം വിപുലീകരിക്കുന്നതിനാൽ, ഓലയുടെ മുന്നോട്ടുള്ള പാതയ്ക്ക് വിപണി വിഹിതം വീണ്ടെടുക്കാൻ ശക്തമായ തന്ത്രപരമായ നീക്കങ്ങൾ ആവശ്യമാണ്.

ബ്രോക്കറേജ് വിലയിരുത്തൽ

ഓല ഇലക്ട്രികിന്‍റെ സേവന നിലവാരം അതിൻ്റെ മോട്ടോർസൈക്കിളുകൾ അവതരിപ്പിക്കുന്നതിന് മുമ്പ് അഭിസംബോധന ചെയ്യേണ്ട ഒരു നിർണായക വശമാണെന്ന് ബ്രോക്കറേജ് സ്ഥാപനമായ എച്ച്എസ്ബിസി അതിന്‍റെ സെപ്റ്റംബർ 26-കുറിപ്പിൽ സൂചിപ്പിച്ചിരുന്നു. 140 രൂപ ടാർഗെറ്റ് വിലയോടെ ഓല ഇലക്ട്രിക് ഓഹരി വാങ്ങാമെന്നാണ് അന്ന് ബ്രോക്കറേജ് ചൂണ്ടിക്കാട്ടിയത്.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.