കുതിപ്പിന് വേഗം കൂട്ടി പേടിഎം, ഓഹരി ഇപ്പോൾ വാങ്ങാൻ ശുപാർശ, കാരണം ഇതാണ്

കഴിഞ്ഞ ഒരുമാസത്തിനിടെ 17.45 ശതമാനം വളർച്ചയാണ് ഫിൻടെക് ഭീമനായ പേടിഎം (One97 Communications) ഓഹരികൾ നേടിയത്. വളർച്ച വരും ദിവസങ്ങളിൽ തുടരുമെന്നാണ് ബ്രോക്കറേജ് സ്ഥാപനമായ ആക്സിസ് സെക്യൂരിറ്റീസ് വിലയിരുത്തുന്നത്. 1400-1440 രൂപ ടാർഗെറ്റ് വിലയോടെ ഓഹരി വാങ്ങാമെന്നാണ് ആക്സിസ് സെക്യൂരിറ്റീസ് സീനിയർ വൈസ് പ്രസിഡന്‍റ് (റിസർച്ച്) രാജേഷ് പാൽവിയ വ്യക്തമാക്കുന്നത്. കുതിപ്പിനുള്ള കാരണവും അദ്ദേഹം ചൂണ്ടിക്കാട്ടുന്നുണ്ട്. എന്താണ് അതെന്നും ഓഹരിയുടെ നിലവിലെ പ്രകടനം എങ്ങനെയാണെന്നും നമുക്ക് വിശദമായി പരിശോധിക്കാം.

ഓഹരി വിപണിയിലെ പ്രകടനം

എൻഎസ്ഇയിൽ 1,246.40 രൂപ എന്നതാണ് നിലവിൽ പേടിഎം ഓഹരിയുടെ വില. കഴിഞ്ഞ അഞ്ച് ദിവസത്തിനിടെ 1.52 ശതമാനം നേട്ടമുണ്ടാക്കാൻ ഓഹരിക്ക് സാധിച്ചു. ഒരുമാസത്തിനിടെ 17 ശതമാനവും ആറ് മാസത്തിനിടെ 87.3 ശതമാനവും വളർച്ച നേടാൻ ഫിൻടെക് ഭീമന് സാധിച്ചു. 2025-ൽ ഇതുവരെ 27 ശതമാനം മുന്നേറ്റമാണ് ഓഹരി നേടിയത്. കഴിഞ്ഞ ഒരുവർഷത്തിനിടെ 99 ശതമാനം കുതിപ്പോടെ നിക്ഷേപകർക്ക് മൾട്ടിബാഗർ റിട്ടേൺ നൽകാനും പേടിഎം ഓഹരിക്ക് സാധിച്ചു. 1,296.60 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില.

സാങ്കേതിക കാര്യങ്ങൾ

52 വീക്ക് ഹൈ/ ലോ: 1,297 / 584 രൂപ
ബുക്ക്‌വാല്യൂ: 236 രൂപ
ആര്‍ഒസിഇ:-10.1%
ആര്‍ഒഇ: -10.3 %
മുഖവില: 1 രൂപ

കുതിപ്പിന് കാരണം

ദിന ചാർട്ടുകളിൽ Higher Highs, Higher Lows രൂപപ്പെട്ടിരിക്കുന്നതിന്‍റെ അടിസ്ഥാനത്തിൽ പേടിഎം ഓഹരികൾക്ക് തുടർച്ചയായ ബുള്ളിഷ് ട്രെൻഡ് ഉണ്ടെന്നാണ് രാജേഷ് പാൽവിയ പറയുന്നത്. സാധാരണയായി ഇത്തരത്തിലുള്ള ചാർട്ട് രൂപങ്ങൾ വിപണിയിൽ വാങ്ങൽ സമ്മർദ്ദം ശക്തമാണെന്ന് സൂചിപ്പിക്കുന്നു. 1,300-1,320 രൂപ നിരക്കുകൾക്ക് സമീപം ഓഹരിക്ക് ശക്തമായ പിന്തുണയുണ്ട്. അതോടൊപ്പം അടുത്ത റെസിസ്റ്റൻസ് ലെവൽ 1,400-1,440 രൂപ നിരക്കിലാണ്.

ടാർഗെറ്റ് വില

ഓഹരിയിൽ ബൈ ഓൺ ഡിപ് നിക്ഷേപ രീതി സ്വീകരിക്കണമെന്നാണ് രാജേഷ് പാൽവിയ നിർദ്ദേശിക്കുന്നത്. 1400-1440 രൂപയാണ് ടാർഗെറ്റ് വില. 1210 രൂപയാണ് സ്റ്റോപ്പ് ലോസ്. വിപണിയിൽ അനിശ്ചിതത്വം നിലനിൽക്കുന്നതിനാൽ സ്റ്റോപ്പ് ലോസ് നിർബന്ധമായും പാലിക്കണമെന്നും അദ്ദേഹം കൂട്ടിച്ചേർത്തു.

കൂടാതെ, പേടിഎം ഓഹരികൾ സാങ്കേതികമായി ശക്തമാണെന്നും വളർച്ചയിലേക്ക് നീങ്ങാൻ തയ്യാറാണെന്നും ഒരു മാർക്കറ്റ് അനലിസ്റ്റ് ET Now-നോട് പറഞ്ഞു. ശക്തമായ ഒരു റാലി പ്രതീക്ഷിക്കുന്നു. ട്രേഡിങ് അടിസ്ഥാനത്തിൽ, പേടിഎം ഓഹരികൾ 1300 രൂപയായി ഉയരുമെന്ന് പ്രതീക്ഷിക്കുന്നു.

നേരിട്ടത് വലിയ തകർച്ച

2021 നവംബറിൽ പേടിഎം അതിന്‍റെ ഐപിഒ ആരംഭിച്ചു, 2150 രൂപ വിലയ്ക്ക് ഓഹരികൾ പുറത്തിറക്കി. കമ്പനിയുടെ മൂല്യനിർണ്ണയം, നിയന്ത്രണ വെല്ലുവിളികൾ, വർദ്ധിച്ച മത്സരം, മറ്റ് ഘടകങ്ങൾ എന്നിവ കാരണം 2024 മെയ് 9 ന് കമ്പനിയുടെ ഓഹരി വില 310 രൂപയായി കുറഞ്ഞു. നിലവിലെ വിപണി വിലയിൽ, പേടിഎം ഓഹരികൾ ഇപ്പോഴും ഐപിഒ വിലയേക്കാൾ 40% കിഴിവിലാണ് വ്യാപാരം നടത്തുന്നത്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.