വില 30 രൂപയിൽ താഴെ, 1039 ശതമാനം നേട്ടം നൽകിയ പെന്നി ഓഹരി ഇതാണ്, നിങ്ങൾക്ക് സ്വന്തമാണോ..?

പെന്നി ഓഹരികളോട് നിക്ഷേപകർക്ക് എന്നും ഒരു പ്രത്യേക ഇഷ്ടമുണ്ടാകും. അതിനുള്ള കാരണമെന്നത് കുറഞ്ഞ ഓഹരി വിലയും മൾട്ടിബാഗർ റിട്ടേൺ തരാനുള്ള വലിയ സാധ്യതയുമാണ്. വിപണിയിൽ മൾട്ടിബാഗർ റിട്ടേൺ നൽകിയ നിരവധി ഓഹരികളെ നമുക്ക് കണ്ടെത്താനും സാധിക്കും. ഒരേ സമയം മികച്ച നേട്ടത്തിനുള്ള സാധ്യതയും അതേസമയം തന്നെ വലിയ അപകട സാധ്യതകളും പെന്നി ഓഹരികളിലുണ്ട് എന്നതാണ് വസ്തുത.

എന്തായാലും കഴിഞ്ഞ ഒരു വർഷത്തിനിടെ മികച്ച ലാഭം നിക്ഷേപകർക്ക് നൽകിയ ജ്യോതി സ്ട്രക്ചേഴ്സ് എന്ന പെന്നി ഓഹരിയുടെ വിശദാംശങ്ങൾ നമുക്ക് നോക്കാം.

വളർച്ച 200 ശതമാനത്തിന് മുകളിൽ

എൻഎസ്ഇയിൽ 28.71 രൂപ എന്നതാണ് നിലവിൽ ജ്യോതി സ്ട്രക്ചേഴ്സ് ഓഹരിയുടെ വില. കഴിഞ്ഞ അഞ്ച് ദിവസത്തിനിടെ 3.09 ശതമാനവും ഒരു മാസത്തിനിടെ 13.93 ശതമാനവും വളർച്ച കൈവരിക്കാൻ ഓഹരിക്ക് സാധിച്ചു. 2024-ൽ ഇതുവരെ 53.69 ശതമാനം വളർച്ചയാണ് ജ്യോതി സ്ട്രക്ചേഴ്സ് ഓഹരി നേടിയത്.

കഴിഞ്ഞ ഒരു വർഷത്തിനിടെ 263.88 ശതമാനമാണ് ഓഹരി നേടിയ കുതിപ്പ്. അഞ്ച് വർഷത്തിനിടെ 1039 ശതമാനം നേട്ടമുണ്ടാക്കാനും പെന്നി ഓഹരിക്ക് സാധിച്ചു. ജൂൺ 25ലെ ക്ലോസിംഗ് വില പ്രകാരം 2,431.89 കോടി രൂപയാണ് ഇതിൻ്റെ വിപണി മൂലധനം. 33.56 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 7.56 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില.

ജ്യോതി സ്ട്രക്ചേഴ്സ്

പവർ ട്രാൻസ്മിഷൻ മേഖലയിൽ പ്രവർത്തിക്കുന്ന കമ്പനിയാണ് ജ്യോതി സ്ട്രക്ചേഴ്സ്. ട്രാൻസ്മിഷൻ ലൈനുകൾ, സബ്‌സ്റ്റേഷനുകൾ, വിതരണ പദ്ധതികൾ എന്നിവയാണ് പ്രധാന ബിസിനസ് ഫോക്കസ് ഏരിയകൾ. ഡിസൈൻ, ടെസ്റ്റിംഗ്, മാനുഫാക്ചറിംഗ്, സോഴ്‌സിംഗ്, സപ്ലൈ, കൺസ്ട്രക്ഷൻ എന്നിവയിൽ കമ്പനി ആ​ഗോളതലത്തിൽ സേവനങ്ങൾ വാഗ്ദാനം ചെയ്യുന്നു. ജ്യോതി എനർജി ലിമിറ്റഡ്, ജ്യോതി സ്‌ട്രക്‌ചേഴ്‌സ് ആഫ്രിക്ക ലിമിറ്റഡ്, ജ്യോതി ഹോൾഡിംഗ് ഐഎൻസി, ജ്യോതി അമേരിക്കസ് എൽഎൽസി, ജ്യോതി പ്രോജക്‌ട്‌സ് എഫ്സെഡ്ഇ എന്നിവ ഇതിന്റെ അനുബന്ധ സ്ഥാപനങ്ങളാണ്.

അവകാശ ഓഹരികൾ

നിലവിലുള്ള നിക്ഷേപകർക്ക് അധിക ഓഹരികൾ അനുവദിച്ച് മൂലധന സമാഹരണം നടത്തുന്നതിനെയാണ് റൈറ്റ്സ് ഇഷ്യൂ എന്നു പറയുന്നത് എന്ന് നമുക്ക് അറിയാം. ജ്യോതി സ്ട്രക്ചേഴ്സും അവകാശ ഓഹരികൾ വഴി ഏകദേശം 175 കോടി രൂപ സമാഹരിച്ചിരുന്നു. 2 രൂപ വീതം മുഖവിലയുള്ള പൂർണ്ണമായി പണമടച്ചുള്ള ഇക്വിറ്റി ഷെയറുകളുടെ ഓഫറും ഇഷ്യൂവും ജ്യോതി സ്ട്രക്‌ചേഴ്‌സിൻ്റെ ബോർഡ് മാർച്ച് 20-നാണ് അംഗീകരിച്ചത്.

ഒരു ഇക്വിറ്റി ഷെയറിന് 13 രൂപ പ്രീമിയം ഉൾപ്പെടെ 15 രൂപയായി കമ്പനി അവകാശ ഇഷ്യു വില നിശ്ചയിച്ചിരുന്നു. ജ്യോതി സ്‌ട്രക്‌ചേഴ്‌സിൻ്റെ നിലവിലുള്ള ഓഹരിയുടമകൾക്ക് അവർ അക്കാലത്ത് കൈവശം വച്ചിരുന്ന ഓരോ 37 ഇക്വിറ്റി ഷെയറുകളിലും കമ്പനിയുടെ ആറ് റൈറ്റ് ഷെയറുകൾക്ക് അർഹതയുണ്ടായിരുന്നു. അവകാശ ഇഷ്യുവിൻ്റെ റെക്കോർഡ് തീയതി 2024 മാർച്ച് 21 ആയിരുന്നു. പ്രസ്തുത തീയതിക്ക് ശേഷം ജ്യോതി സ്‌ട്രക്‌ചേഴ്‌സിൻ്റെ ഓഹരികൾ വാങ്ങിയ ഷെയർഹോൾഡർമാർക്ക് അവകാശ ഇഷ്യൂവിൽ പങ്കെടുക്കാൻ അർഹതയില്ലെന്നാണ് ഇതിനർത്ഥം.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.