പിഎംജെജെബിവൈ: വർഷം 330 രൂപ അടച്ച് 2 ലക്ഷം രൂപയുടെ പരിരക്ഷ നേടൂ

കേന്ദ്ര സർക്കാറിന്റെ പിന്തുണയോടെ അവതരിപ്പിക്കുന്ന ഒരു ലൈഫ് ഇൻഷൂറൻസ് പദ്ധതിയാണ് പ്രധാൻ മന്ത്രി ജീവൻ ജ്യോതി ബീമ യോജന (പി.എം.ജെ.ജെ.ബി.വൈ). 18 നും 50 നും മദ്ധ്യേ പ്രായമുള്ള ആര്‍ക്കും ഇതിൽ ചേരാവുന്നതാണ്. 55 വയസ് വരെ പരിരക്ഷ ലഭിക്കും. ബാങ്ക് അക്കൗണ്ട് വഴിയാണ് പദ്ധതിയുടെ പണം അടയ്‌ക്കേണ്ടത്. 2015-ലെ ബജറ്റ് പ്രസംഗത്തിലാണ് ധനമന്ത്രി അരുൺ ജെയ്‌റ്റിലി ഗവൺമെന്റ് ഇൻഷുറൻസ്, പെൻഷൻ വിഭാഗത്തിൽപ്പെടുന്ന മൂന്നു സാമൂഹ്യ സുരക്ഷാ പദ്ധതികൾ പ്രഖ്യാപിച്ചത്.

പ്രധാന മന്ത്രി ജീവൻ ജ്യോതി ബീമാ യോജന (പി.എം.ജെ. ജെ.ബി.വൈ), പ്രധാൻ മന്ത്രി സുരക്ഷാ ബീമ യോജന (പിഎം എസ്‌ബിവൈ), അടൽ പെൻഷൻ യോജന (എപിവൈ) എന്നിവ. കേന്ദ്ര സർക്കാറിന്റെ കണക്ക് പ്രകാരം പ്രധാൻ മന്ത്രി ജീവൻ ജ്യോതി ഭീമ യോജനയിൽ 5.91 കോടി ആളുകളും, പ്രധാൻ മന്ത്രി സുരക്ഷാ ഭീമ യോജനയിൽ (പിഎംഎസ്‌ബിവൈ) 15.47 കോടി ആളുകളും അംഗമായിട്ടുണ്ട്. പ്രധാന മന്ത്രി ജീവൻ ജ്യോതി ബീമാ യോജനയിൽ 2 ലക്ഷം വരെയുള്ള ഇൻഷൂറസ് ലഭിക്കും. ഇതിന്റെ വാര്‍ഷിക പ്രീമിയം 330 രൂപയാണ്.

ഓരോ വര്‍ഷവും പദ്ധതി പുതുക്കണം. സാധാരണ മരണം, അസ്വാഭാവികമായ മരണം, ആത്മഹത്യ എന്നിവയ്ക്ക് രണ്ട് ലക്ഷം രൂപയുടെ പരിരക്ഷ ലഭിക്കും. രാജ്യത്തെ മുഴുവന്‍ ജനങ്ങള്‍ക്കും ഇന്‍ഷുറന്‍സ് പരിരക്ഷ ഉറപ്പാക്കുകയെന്നതാണ് പദ്ധതികളുടെ ലക്ഷ്യം. എൽ‌ഐ‌സി, മറ്റ് ഇന്ത്യൻ സ്വകാര്യ ലൈഫ് ഇൻ‌ഷുറൻസ് കമ്പനികൾ തുടങ്ങിയവയിലൂടെയാണ് ഈ പദ്ധതി ജനങ്ങളിലേക്ക് എത്തിക്കുന്നത്. എൻറോൾമെന്റിനായി ബാങ്കുകൾ ഇത്തരം ഇൻഷുറൻസ് കമ്പനികളുമായി യോജിച്ചു പ്രവർത്തിക്കുന്നു. പ്രീമിയം തുക ഉപഭോക്താവിന്റെ അക്കൗണ്ടിൽ നിന്ന് ഓട്ടോ ഡെബിറ്റ് സൗകര്യത്തിലൂടെയാണ് ഈടാക്കുന്നത്.