Click it and Unblock the Notifications
റമദാന് ഇഅ്തികാഫ്: മാര്ഗനിര്ദേശങ്ങള് പുറപ്പെടുവിച്ച് ഖത്തര്, വിശ്വാസികള് അറിയേണ്ടത്
റമദാനിലെ അവസാന ദിവസങ്ങളില് മസ്ജിദുകളില് ആചരിക്കുന്ന ആത്മീയ പ്രാര്ത്ഥനയായ
ഇഅ്തികാഫ് സംബന്ധിച്ച് മാര്ഗ്ഗനിര്ദ്ദേശങ്ങള് പുറപ്പെടുവിച്ചിരിക്കയാണ് ഖത്തര്. മസ്ജിദുകളുടെയും മതകാര്യങ്ങളുടെയും മേല്നോട്ടം വഹിക്കുന്ന ഖത്തര് ഔഖാഫ് ആന്ഡ് ഇസ്ലാമിക് അഫയേഴ്സ് മന്ത്രാലയം ആണ് പുതിയ മാര്ഗനിര്ദേശങ്ങള് പുറത്തിറക്കിയത്.
ദൈനംദിന ജീവിതത്തിലെ തിരക്കുകളില് നിന്ന് മാറി ആത്മീയ ചിന്തയ്ക്കും ആരാധനയ്ക്കും സമയം കണ്ടെത്താനുള്ള അവസരമായാണ് വിശ്വാസികള് ഇഅ്തികാഫിനെ കാണുന്നത്.
ആര്ക്കെല്ലാം പങ്കെടുക്കാം
- പുതിയ മാര്ഗനിര്ദേശങ്ങള് പ്രകാരം 18 വയസ്സായവര്ക്ക് മാത്രമാണ് ഇഅ്തികാഫില് സ്വതന്ത്രമായി പങ്കെടുക്കാനാകുക.
- എന്നാല് 8 മുതല് 18 വയസ് വരെ പ്രായമുള്ളവര്ക്ക് രക്ഷിതാവിന്റെയും ഗാര്ഡിയന്റെയും സാന്നിധ്യത്തില് പങ്കെടുക്കാം
- പുരുഷന്മാര്ക്ക് മാത്രമാണ് പങ്കെടുക്കാനാകുക.
ഇഅ്തികാഫ് ആചരിക്കുന്നവര്ക്കുള്ള നിര്ദ്ദേശങ്ങള്
- ഉറങ്ങുന്നതിനും ഭക്ഷണം കഴിക്കുന്നതിനും മസ്ജിദുകളില് പ്രത്യേകം നിശ്ചയിച്ചിരിക്കുന്ന ഇടങ്ങള് മാത്രം ഉപയോഗിക്കണം.
- അതോടൊപ്പം വ്യക്തിഗത ശുചിത്വവും മസ്ജിദുകളുടെ ശുചിത്വവും ഉറപ്പാക്കണം
- ആരാധനയെ തടസപ്പെടുത്തുന്ന സംസാരവും പ്രവര്ത്തനങ്ങളും ഒഴിവാക്കണം
- മസ്ജിദുകളുടെ പവിത്രത സംരക്ഷിക്കണം
- മസ്ജിദിന്റെ മതിലുകളിലും തൂണുകളിലും ഫര്ണിച്ചറുകളിലും വസ്ത്രങ്ങള് തൂക്കരുത്.
- മസ്ജിദ് ഭരണസമിതികളുടെ നിര്ദേശങ്ങള് കര്ശനമായി പാലിക്കണം
റമദാനിലെ അവസാന രാത്രികള് മുസ്ലിംകള്ക്ക് ഏറെ ആത്മീയ പ്രാധാന്യമുള്ളതാണ്. ഈ സമയത്ത് മസ്ജിദുകളില് വലിയ തോതില് ആളുകള് എത്തുമെന്നതിനാല് ഖത്തറിലെ വിവിധ മസ്ജിദുകള് ഇതിനായി പ്രത്യേക ഒരുക്കങ്ങള് നടത്തുകയാണ്.
ഖുര്ആന് പഠന വൃത്തങ്ങള്, മതപ്രഭാഷണങ്ങള്, സാമൂഹിക പരിപാടികള് തുടങ്ങിയവയും ഈ കാലയളവില് സംഘടിപ്പിക്കും. കൂടാതെ തരാവീഹ്, ഖിയാം പ്രാര്ത്ഥനകള്ക്കായി മസ്ജിദുകളില് പ്രത്യേക സൗകര്യങ്ങളും ഒരുക്കിയിട്ടുണ്ട്.
ആത്മീയ അനുഭവമായി ഇഅ്തികാഫ്
റമദാനിലെ അവസാന ദിവസങ്ങളില് ലോകമെമ്പാടുമുള്ള മുസ്ലിംകള് ആചരിക്കുന്ന പ്രധാന ആത്മീയ ആരാധനകളിലൊന്നാണ് ഇഅ്തികാഫ്.
ദൈനംദിന ജീവിതത്തിലെ തിരക്കുകളില് നിന്ന് മാറി പ്രാര്ത്ഥനയിലും ആത്മീയ ചിന്തയിലും മുഴുകാനുള്ള അവസരമാണ് ഇത്. മാര്ഗനിര്ദേശങ്ങള്, ആരാധന ക്രമബദ്ധമായി നടത്താനുദ്ദേശിച്ചുള്ളവയാണെന്ന് അധികൃതര് വ്യക്തമാക്കി.
Sign in with Google