റിപ്പോ നിരക്ക് 6.50 ശതമാനമായി തുടരും; ഭവന വായ്പകാർക്ക് ആശ്വാസം; സ്ഥിര നിക്ഷേപമിടാൻ അനുയോജ്യം

റിപ്പോ നിരക്കിൽ തൽസ്ഥിതി തുടരും എന്ന റിസർവ് ബാങ്ക് ഓഫ് ഇന്ത്യ പണ നയ അവലോകന യോ​ഗ തീരുമാനം പ്രതീക്ഷിച്ചതായിരുന്നു. 2022 മേയ് മുതൽ ആരംഭിച്ച റിപ്പോ നിരക്ക് വർധനവ് 2 തവണയായി മാറ്റമില്ലാതെ തുടരുകയാണ്. ഏപ്രിലിലും റിപ്പോ നിരക്ക് 6.50 ശതമാനമായി നിലനിർത്തിയിരുന്നു. 2022 മേയ് മുതൽ റിപ്പോ നിരക്കിൽ 250 അടിസ്ഥാന നിരക്കാണ് വർധിപ്പിച്ചത്.

നിലവിൽ പണപ്പെരുപ്പം കുറഞ്ഞതും മാർച്ച് പാദത്തിലെ ഇന്ത്യയുടെ വളർച്ചയും പലിശ നിരക്ക് മാറ്റമില്ലാതെ തുടരാനുള്ള തീരുമാനത്തിന് കാരണമായി. ഉപഭോക്തൃ സൂചികയെ അടിസ്ഥാനമാക്കിയുള്ള പണപ്പെരുപ്പം 2023 ഏപ്രിലിൽ 4.7 ശതമാനമായി കുത്തനെ ഇടിഞ്ഞിട്ടുണ്ട്. ഇത് റിസർവ് ബാങ്ക് ഓഫ് ഇന്ത്യയുടെ സഹിഷ്ണുത പരിധിയായ 6 ശതമാനത്തിന് താഴെയാണിത്. റിസർവ് ബാങ്കിന്റെ പുതിയ തീരുമാനം എങ്ങനെ സാധാരണക്കാരെ ബാധിക്കുമെന്ന് നോക്കാം.

സ്ഥിര നിക്ഷേപമിടാൻ അനുയോജ്യം

റിപ്പോ നിരക്ക് മാറ്റമില്ലാതെ തുടരുമെന്നതിന്റെ അർഥം സമീപ ഭാവിയിൽ ആർബിഐ പലിശ നിരക്ക് താഴേക്കാണ് എന്നതാണ്. ബാങ്ക് പലിശ നിരക്കിനെ സ്വാധീനിക്കുന്നൊരു ഘടകമാണ് റിപ്പോ നിരക്ക്. പണപ്പെരുപ്പ നിരക്ക് കുറയുമ്പോൾ, ആർബിഐ റിപ്പോ നിരക്ക് കുറയ്ക്കുകയും അതുവഴി വളർച്ചയെ പ്രേരിപ്പിക്കുകയും ചെയ്യുന്നു. റിപ്പോ നിരക്ക് താഴാൻ തുടങ്ങിയാൽ ബാങ്ക് പലിശ നിരക്കും താഴേക്ക് പോകും. പലിശ നിരക്കില്‍ തല്‍സ്ഥിതി തുടരുന്നതിനാല്‍ ഇനി വര്‍ധനവിനും സാധ്യതയില്ല.

ഏപ്രിലിൽ ആർബിഐ റിപ്പോ നിരക്ക് തൽസ്ഥിതി തുടരാൻ തീരുമാനിച്ചതിന് ശേഷം ചില ബാങ്കുകൾ പലിശ നിരക്ക് കുറച്ചിരുന്നു. ആക്‌സിസ് ബാങ്കും പഞ്ചാബ് നാഷണൽ ബാങ്കും സ്ഥിര നിക്ഷേപങ്ങളുടെ പലിശ നിരക്ക് ചില കാലയളവുകളിൽ കുറച്ചിട്ടുണ്ട്. അതിനാൽ സ്ഥിര നിക്ഷേപമിടാൻ ആ​ഗ്രഹിക്കുന്നവർ വേ​ഗത്തിൽ ഉയർന്ന നിരക്കിൽ നിക്ഷേപം ലോക്ക് ചെയ്യണം. 

ഭവന വായ്പകാർക്ക് ആശ്വാസം

റിപ്പോ നിരക്ക് മാറ്റമില്ലാതെ നിലനിർത്താനുള്ള ആർബിഐയുടെ തീരുമാനം ഭവന വായ്പകാർക്ക് ആശ്വാസമാണ്. പലിശ നിരക്ക് വർധനവിന് സാധ്യതയില്ലാത്തതിനാലും പലിശ നിരക്ക് കുറയാനുള്ള സാധ്യതയും ഭവന വായ്പകാരെ സംബന്ധിച്ച് ആശ്വാസമാണ്. ഇത് റിയൽ എസ്റ്റേറ്റ് മേഖലയ്ക്ക് സ്ഥിരത നൽകും. നിലവിൽ തന്നെ ഭവന വായ്പകളുടെ പലിശനിരക്ക് എക്കാലത്തെയും ഉയർന്ന നിരക്കിലെത്തിയിട്ടുണ്ട്.

സമീപഭാവിയിൽ പലിശനിരക്കിൽ കൂടുതൽ കുറവ് വരുത്തുന്നത് മൊത്തത്തിലുള്ള വിപണി ആത്മവിശ്വാസം വർധിപ്പിക്കുന്നതിന് കാരണമാകും. കഴിഞ്ഞ മാസങ്ങളിൽ ഐസിഐസിഐ ബാങ്ക് വായ്പാ നിരക്കുകൾ കുറച്ചിരുന്നു. ഐസിഐസിഐ ഒരു മാസത്തെ എംസിഎൽആർ 8.50 ശതമാനത്തിൽ നിന്ന് 8.35 ശതമാനമായും മൂന്ന് മാസത്തെ എംസിഎൽആർ 8.55 ശതമാനത്തിൽ നിന്ന് 8.40 ശതമാനമായും കുറച്ചിരുന്നു.  

വായ്പകാർ എന്തുചെയ്യണം

പഴയ ഭവന വായ്പ അടച്ചു കൊണ്ടിരിക്കുന്നവരാണെങ്കിൽ എം‌സി‌എൽ‌ആർ അല്ലെങ്കിൽ ബേസ് റേറ്റ് പോലെയുള്ള മുൻ വ്യവസ്ഥകൾക്ക് കീഴിലാണ് വായ്പ അടക്കുന്നതെങ്കിൽ പുതിയ ഇബി‌എൽ‌ആർ വ്യവസ്ഥയിലേക്ക് മാറാനുള്ള നല്ല സമയമാണിത്. കാരണം, പലിശനിരക്കിൽ ഇടിവുണ്ടാകുമ്പോൾ വേഗത്തിൽ പ്രയോജനം ലഭിക്കാൻ ഇത് സഹായിക്കും.

വിപണിക്ക് നേട്ടം

റിപ്പോ നിരക്കിൽ തൽസ്ഥിതി തുടരുമെന്ന തീരുമാനം വിപണി പ്രതീക്ഷിച്ചതാണ്. ഈ പ്രതീക്ഷയുടെ പുറത്ത് ബുധനാഴ്ച മികച്ച നേട്ടത്തിലാണ് വിപണി ക്ലോസ് ചെയ്തത്. സെൻസെക്സ് 63,142.96 ലും നിഫ്റ്റി 18,726.40 ലുമാണ് വ്യാപാരം അവസാനിപ്പിച്ചത്. വ്യാഴാഴ്ചയും നേട്ടം തുടർന്ന സൂചികകൾ നേട്ടം തുടർന്നു. സെൻസെക്സ് 138.42 പോയിന്റ് ഉയർന്ന് 63281.38ലും 39.40 പോയിന്റുയർന്ന് നിഫ്റ്റി 18765.80 ലുമാണ് വ്യാപാരം നടക്കുന്നത്.