പിഎസ്യു ബാങ്കുകൾ, ഓട്ടോ, റിയൽറ്റി മേഖലകളിലെ നേട്ടത്തെ തുടർന്ന് ഇന്ത്യൻ സൂചികകൾ ചൊവ്വാഴ്ച തുടർച്ചയായ മൂന്നാം സെഷനിലും റെക്കോഡ് നേട്ടത്തിൽ ക്ലോസ് ചെയ്തു. സെൻസെക്സ് 248 പോയിന്റ് ഉയർന്ന് 49,517 എന്ന നിലയിലെത്തി. നിഫ്റ്റി 79 പോയിന്റ് ഉയർന്ന് 14,563 എന്ന റെക്കോഡിലെത്തി.
മേഖല സൂചുകകളിൽ നിഫ്റ്റി പിഎസ്യു ബാങ്ക് സൂചിക 6 ശതമാനം ഉയർന്നു. റിയൽറ്റി, ഓട്ടോ സൂചികകൾ യഥാക്രമം 3 ശതമാനവും ഒരു ശതമാനവും ഉയർന്നു. നിഫ്റ്റി ബാങ്ക്, നിഫ്റ്റി ഫിൻ സർവീസസ്, നിഫ്റ്റി മെറ്റൽ സൂചിക എന്നിവയും ഇന്നത്തെ നേട്ടത്തെ കൂടുതൽ ഉയർത്തി. എന്നിരുന്നാലും, എഫ്എംസിജി, ഫാർമ സൂചികകൾ ഇന്നും നഷ്ടത്തിലായിരുന്നു.
നിഫ്റ്റി 50 സൂചികയിൽ ടാറ്റ മോട്ടോഴ്സ്, ഗെയിൽ, ഭാരതി എയർടെൽ, എസ്ബിഐ, കോൾ ഇന്ത്യ എന്നിവയാണ് ഏറ്റവും കൂടുതൽ നേട്ടമുണ്ടാക്കിയത്. ജാഗ്വാർ ലാൻഡ് റോവർ വിൽപ്പനയെ തുടർന്ന് ടാറ്റ മോട്ടോഴ്സ് 7.6 ശതമാനം ഉയർന്നു.
രാജ്യത്തെ ഏറ്റവും വലിയ ഗ്യാസ് വിതരണ സ്ഥാപനമായ ഗെയിൽ (ഇന്ത്യ) ഓഹരികൾ 4.5 ശതമാനം ഉയർന്നു. ഓഹരി തിരിച്ചുവാങ്ങൽ പരിഗണിക്കുന്നതിനായി ബോർഡ് ഇന്ന് യോഗം ചേരുമെന്ന് കമ്പനി അറിയിച്ചു. പിഎസ്യു ബാങ്ക് സൂചിക ഒരു മാസത്തിനിടെ ഏറ്റവും കൂടുതൽ നേട്ടം കൈവരിച്ചു.