ധനികരിൽ ധനികൻ; പക്ഷേ രണ്ട് വർഷമായി ശമ്പളമില്ല; മുകേഷ് അംബാനിയുടെ കാര്യങ്ങളിങ്ങനെയാണ്

പണിയെടുത്താൽ ശമ്പളം കിട്ടണം. എവിടെയായാലും ഏത് തൊഴിലിലും കാര്യങ്ങൾ അങ്ങനെയാണ്. എന്നാൽ കോടീശ്വരന്മാർക്ക് ശമ്പളം കിട്ടിയില്ലെങ്കിലും കാര്യങ്ങൾ മുന്നോട്ട് പോകു. ഇത്തരത്തിലാണ് കോടീശ്വരനായ മുകേഷ് അംബാനിയുടെ കാര്യം. രണ്ട് വർഷങ്ങളായി അദ്ദേഹത്തിന് ശമ്പളമില്ല.

റിലയൻസ് ഇൻഡസ്ട്രീസ് പോലൊരു സ്ഥാപനത്തിന്റെ ചെയർമാനും മാനേജിം​ഗ് ഡയറക്ടുമായ മുകേഷ് അംബാനി രാജ്യത്തെയും ലോകത്തിലെയും ധനികരുടെ പട്ടികയിൽ ആദ്യ സ്ഥാനക്കാരനാണ്. എന്നാൽ റലയന്‍സ് ഇന്‍ഡസ്ട്രീസിന്റെ വാർഷിക റിപ്പോർട്ടിൽ അദ്ദേഹത്തിന്റെ ശമ്പളം NIL എന്നാണ് രേഖപ്പെടുത്തിയിരിക്കുന്നത് ഇതിന്റെ കാരണം എന്താണെന്ന് നോക്കാം.

 

മുടങ്ങിയ ശമ്പളം

കോവിഡ് മഹാമാരി ബിസിനസിനെയും രാജ്യത്തെ സമ്പദ് വ്യവസ്ഥയെയും ബാധിച്ചതിനെ തുടര്‍ന്ന് മുകേഷ് അംബാനി കഴിഞ്ഞ സാമ്പത്തിക വര്‍ഷത്തില്‍ തന്റെ ശമ്പളം വേണ്ടെന്ന് വെച്ചിരുന്നു. പുതിയ വാര്‍ഷിക റിപ്പോര്‍ട്ടില്‍ 2020-21 സാമ്പത്തിക വര്‍ഷത്തില്‍ മുകേഷ് അമ്പാനിയുടെ ശമ്പളം nil എന്നാണ് രേഖപ്പെടുത്തിയിട്ടുള്ളത്.

ഇതേ കാരണം കൊണ്ടാണ് അദ്ദേഹം 2021-22 വര്‍ഷത്തിലും ശമ്പളം വാങ്ങാതെ ജോലിയെടുക്കുന്നത്. ശമ്പളം കൂടാതെ അലവന്‍സ്, ലാഭ വിഹിതം, വിരമിക്കല്‍ ആനുകൂല്യം, കമ്മീഷന്‍ തുടങ്ങിയവ അദ്ദേഹത്തിനുണ്ട്. എന്നാൽ ഇതൊന്നും കഴിഞ്ഞ വർഷങ്ങളിൽ മുകേഷ് അംബാനി കൈപ്പറ്റിയിട്ടില്ല. 

ശമ്പളം എത്രയാണ്

റിലയന്‍സ് ഇന്‍ഡസ്ട്രീസ് ചെയര്‍മാനായ മുകേഷ് അംബാനിയുടെ ശമ്പളം വര്‍ഷത്തില്‍ 15 കോടിയാണ്. 2008-09 സാമ്പത്തിക വര്‍ഷം മുതല്‍ അദ്ദേഹം 15 കോടി എന്ന ശമ്പളമാണ് വാങ്ങികൊണ്ടിരുന്നത്. അവസാനമായി ശമ്പളം കൈപ്പറ്റിയ 2019-20 വർഷത്തിലും ഇതേ ശമ്പളമാണ് അദ്ദേഹം സ്വീകരിച്ചത്.

എന്നാൽ മുകേഷ് അംബാനിയുടെ ഭാര്യ നിതാ അംബാനിയുടെ ശമ്പളത്തിൽ മുടക്കമൊന്നുമില്ല. കമ്പനിയുടെ നോണ്‍ എക്‌സിക്യൂട്ടീവ് ഡയറക്ടറായ നിതാ അംബാനിക്ക് സിറ്റിംഗ് ഫീയായി 5 ലക്ഷം രൂപയും 2 കോടി രൂപ കമ്മീഷനും ലഭിച്ചു. കഴിഞ്ഞ വര്‍ഷത്തില്‍ ഇത് യഥാക്രമം 8 ലക്ഷവും 1.65 കോടിയുമായിരുന്നു. 

റിലയന്‍സ് ഇന്‍ഡസ്ട്രീസ് ഡയറക്ടർ ബോര്‍ഡിലെ മറ്റ് അംഗങ്ങളായ അംബാനിയുടെ കസിന്‍സായ നിഖില്‍ മെസ്വാനി ഹിതല്‍ മെസ്വാനി എന്നിവർക്ക് ശമ്പളം കുറഞ്ഞിട്ടില്ല. 24 കോടി ശമ്പളവും 17.28 കോടി കമ്മീഷനും ലഭിച്ചു. മറ്റു ആജീവനാന്ത ഡയറക്ടര്‍മാരായ പിഎംഎസ് പ്രസാദിന് 11.89 കോടിയും പവന്‍ കുമാര്‍ കപിലിന് 4.22 കോടിയുമാണ് ശമ്പളം. 

മുകേഷ് അമ്പാനി ആസ്തി

2022 ജൂണ്‍ പ്രകാരമുള്ള അംബാനിയുടെ ആസ്തി, 9300 കോടി ഡോളറാണ്. ഓയില്‍ ആന്‍ഡ് ഗ്യാസ് വിതരണത്തില്‍ നിന്നാണ് അദ്ദേഹത്തിന്റെ വരുമാനത്തിന്റെ ഭൂരിഭാഗവും എത്തുന്നത്. ജിയോ ആരംഭിച്ചതിന് ശേഷം ആസ്തിയില്‍ വര്‍ധനവുണ്ടായി.

ഇതുപ്രകാരം ഇന്ത്യയിലെ സമ്പന്നനും ലോക സമ്പന്നരില്‍ ആദ്യ പത്തിലും അംബാനിയുണ്ട്. ലോകത്തിലെ ഏറ്റവും വിലകൂടിയ വീടും അദ്ദേഹത്തിനാണ്. മുംബൈയിലെ
ആന്റിലിയയ്ക്ക് 15,000 കോടിയാണ് മൂല്യം. 27 നിലകളുള്ള വീട്ടില്‍ മൂന്ന് റൂഫ്‌ടോപ്പ് ഹെലിപ്പാട്, സ്വകാര്യ സിനിമാ തിയേറ്റര്‍, ഐസ്‌ക്രീ പാര്‍ലര്‍, തുടങ്ങിയ വിവിധ സൗകര്യങ്ങളുണ്ട്.

ഇതോടൊപ്പം ലണ്ടൻ ന​ഗരത്തിൽ 592 കോടി വില വരുന്ന വസ്തു 2021 ഏപ്രിലിൽ അദ്ദേ​ഹം സ്വന്തമാക്കിയിരുന്നു. ബെന്റ്ലി, റോള്‍സ് റോയ്സ്, മെഴ്സിഡസ് ബെന്‍സ് മുതലായവ വാഹനങ്ങളും വിദേശ, ആഭ്യന്തര യാത്രകൾക്കായി ഒരു സ്വകാര്യ വിമാനവും അദ്ദേഹത്തിനുണ്ട്. ലോകത്തിലെ ഏറ്റവും വലിയ റിഫൈനറി ഗുജറാത്തിലെ ജംനഗറില്‍ മുകേഷ് അംബാനിക്കുണ്ട്. ദിവസത്തിൽ 6.6 ലക്ഷം ബാരല്‍ ശേഷിയുള്ളതാണ് ഈ റിഫൈനറി.