ഇന്ധന വില്‍പ്പന കുതിക്കുന്നു, ഇത് സാമ്പത്തിക വളര്‍ച്ചയിലേക്കുള്ള പോക്കാണെന്ന് ഐഒസി!!

ദില്ലി: കൊവിഡ് കാരണം സാമ്പത്തിക മേഖല തകര്‍ന്ന് തരിപ്പണമായെങ്കിലും ഇന്ധന വില്‍പ്പനയില്‍ കുതിപ്പ്. പ്രധാന കാരണം കാര്‍ വിപണിയിലൊക്കെ ഉണ്ടായിരിക്കുന്ന ഉണര്‍വാണ്. മിഡ് റേഞ്ച് കാറുകള്‍ ധാരാളം ചെലവാകുന്നുമുണ്ട്. സ്വാഭാവികമായും ഇന്ധനത്തിന്റെ വില്‍പ്പനയും കുതിക്കുകയാണ്. അത് മാത്രമല്ല പാചകവാതകത്തിന്റെയും ഡീസലിന്റെയും വില്‍പ്പനയും വര്‍ധിച്ചിരിക്കുകയാണ്. ഈ വര്‍ഷത്തില്‍ അത് മുന്നോട്ട് പോയത് പ്രതിസന്ധി മാറി സമ്പദ് വ്യവസ്ഥ കുതിക്കാന്‍ തുടങ്ങിയതിന്റെ ലക്ഷണമാണെന്ന് ഇന്ത്യന്‍ ഓയില്‍ കോര്‍പ്പറേഷന്‍ പറയുന്നു.

ഈ വര്‍ഷം മോട്ടോര്‍ സ്പിരിറ്റിന്റെ വില്‍പ്പന 108 ശതമാനം വരെ കുതിച്ചിരിക്കുകയാണ്. ഡീസലിന്റേത് 96 ശതമാനം വര്‍ധനവാണ് ഉണ്ടായത്. കഴിഞ്ഞ വര്‍ഷത്തെ അപേക്ഷിച്ച് വന്‍ നേട്ടമാണ് ഉണ്ടായതെന്ന് ഇന്ത്യന്‍ ഓയിലിന്റെ മാര്‍ക്കറ്റിംഗ് ഡയറക്ടര്‍ ഗുര്‍മീത് സിംഗ് പറഞ്ഞു. സാമ്പത്തിക പ്രതിസന്ധിയെ രാജ്യം മറികടന്ന് തുടങ്ങിയതെന്നതിന്റെ ലക്ഷണമാണെന്ന് സിംഗ് വ്യക്തമാക്കി. ലോക്ഡൗണ്‍ കാലത്ത് എല്‍പിജിയുടെ ഡിമാന്‍ഡ് പത്ത് ശതമാനം വര്‍ധിച്ചെന്ന് ഐഒസി ചെയര്‍മാന്‍ എസ്എം വൈദ്യ വ്യക്തമാക്കി.

ഐഒസിയെ സംബന്ധിച്ച് ഡിജിറ്റലൈസേഷന്‍ കൂടുതലായി ഉപയോഗിച്ച വര്‍ഷമാണ് 2020 എന്ന് വൈദ്യ പറഞ്ഞു. ബിസിനസ് നല്ല രീതിയില്‍ മുന്നോട്ട് പോയത് അതുകൊണ്ടാണ്. അതേസമയം ഐഒസിയുടെ ഹൈ ഒക്ടേന്‍ പ്രീമിയം പെട്രോളിന്റെ ഡെസ്ബാച്ച് സെന്റര്‍ അസമിലെ ദിഗ്‌ബോയില്‍ കേന്ദ്ര പെട്രോളിയം വകുപ്പ് മന്ത്രി ധര്‍മേന്ദ്ര പ്രധാന്‍ ഉദ്ഘാടനം ചെയ്തു. ഇത് രാജ്യത്തിന്റെ വിവിധ ഭാഗങ്ങളിലേക്ക് വ്യാപിപ്പിക്കും. കൊല്‍ക്കത്ത അടക്കമുള്ള ഏഴ് നഗരങ്ങളാണ് മുന്നിലുള്ളത്.

എല്‍പിജി ബുക്കിംഗുകള്‍ക്കായും റീഫില്‍ ബുക്കിംഗുകള്‍ക്കായും പുതിയൊരു മിസ്ഡ് കോള്‍ സംവിധാനവും മന്ത്രി അവതരിപ്പിച്ചിട്ടുണ്ട്. പുതിയ കണക്ഷനുകള്‍ക്കും ഇത് ഉപയോഗിക്കാം. നിലവില്‍ ഈ സൗകര്യം ഭുവനേശ്വറില്‍ മാത്രമാണ് ഉള്ളത്. ഉടന്‍ തന്നെ രാജ്യത്തിന്റെ എല്ലായിടത്തും ലഭ്യമാകും. രാജ്യത്തെ എല്‍പിജി ഉപയോക്താക്കളുടെ എണ്ണം 30 കോടി കവിഞ്ഞതായി ഐഒസി പറഞ്ഞു. കഴിഞ്ഞ ആറ് വര്‍ഷത്തിനിടെ 17 കോടി പേര്‍ക്കാണ് ഗ്യാസ് ലഭിച്ചത്.