ചൈന എഫക്ട്: റബ്ബര്‍ വില കുതിച്ചുയരുന്നു; കേരളത്തിലെ കര്‍ഷകര്‍ക്കും നേട്ടം, മഴ വിപണിയെ ബാധിച്ചു

വില കുതിക്കുന്നു

വിപണിയില്‍ റബ്ബര്‍ വില കുതിച്ചുകയറുകയാണ്. ഒക്ടോബര്‍ 19 ന് ആര്‍എസ്എസ്- 4 റബ്ബറിന് കിലോഗ്രാമിന് 140 രൂപ വരെയായി ഉയര്‍ന്നു. അന്താരാഷ്ട്ര വിപണിയിലെ പ്രതിഫലനം തന്നെയാണ് കേരളത്തിലും ഇപ്പോള്‍ പ്രകടമാകുന്നത്.

അന്താരാഷ്ട്ര വിപണിയില്‍

ബാങ്കോക്ക് വിപണിയിലും റബ്ബര്‍ വില കുതിച്ചുയരുകയാണ്. ആര്‍എസ്എസ് - കിലോ ഗ്രാമിന് 156.40 രൂപ വരെ വില എത്തിയിട്ടുണ്ട്. ഇന്ത്യയിലെ ആര്‍എസ്എസ്- 4 ന് തുല്യമാണ് ബാങ്കോക്കിലെ ആര്‍എസ്എസ്- 3.

ചൈന എഫക്ട്

കൊവിഡ് സാമ്പത്തിക മാന്ദ്യം ബാധിക്കാതെ ചൈനയുടെ വളര്‍ച്ചാനിരക്ക് മുന്നോട്ട് കുതിക്കുകയാണ്. അതാണ് ഇപ്പോഴത്തെ റബ്ബര്‍ വില വര്‍ദ്ധനയ്ക്ക് കാരണം എന്നാണ് റിപ്പോര്‍ട്ടുകള്‍. ടയര്‍ ഉത്പാദനത്തിന് ചൈന റബ്ബര്‍ ഇറക്കുമതി കൂട്ടിയേക്കും എന്ന റിപ്പോര്‍ട്ടുകളാണ് വിപണിയ്ക്ക് ഊര്‍ജ്ജമായത്.

തായ്‌ലാന്‍ഡും വിയറ്റ്‌നാമും

വിപണിയില്‍ പ്രകൃതിദത്ത റബ്ബറിന്റെ ലഭ്യത കുറഞ്ഞതും വിലകൂടാന്‍ ഒരു കാരണമായിട്ടുണ്ട്. പ്രധാന റബ്ബര്‍ ഉത്പാദക രാജ്യങ്ങളായ തായ്‌ലാന്‍ഡിലും വിയറ്റ്‌നാമിലും മഴ സൃഷ്ടിച്ച പ്രശ്‌നങ്ങള്‍ റബ്ബര്‍ ഉത്പാദനത്തെ ബാധിച്ചിട്ടുണ്ട്. അതുകൊണ്ട് തന്നെ ഇന്ത്യയില്‍ നിന്നുള്ള റബ്ബറിന് ഡിമാന്‍ഡും കൂടിയിട്ടുണ്ട്.

മഴ ഇവിടേയും പ്രശ്‌നം

കേരളത്തിലും റബ്ബര്‍ ഉത്പാദനത്തെ മഴ ബാധിച്ചിട്ടുണ്ട്. ടാപ്പിങ്ങ് തടസ്സപ്പെടുന്നതാണ് പ്രധാന പ്രശ്‌നം. ഇതോടൊപ്പം വിലകൂടുമെന്ന പ്രതീക്ഷയില്‍ കര്‍ഷകര്‍ റബ്ബര്‍ സംഭരിച്ചുവയ്ക്കുന്നതും വിപണിയിലെ ലഭ്യത കുറച്ചിട്ടുണ്ട്. വിലകൂടാനുള്ള മറ്റൊരു കാരണം ഇതാണ്.

എണ്ണവിലയും റബ്ബറും

ആഗോള വിപണിയില്‍ അസംസ്‌കൃത എണ്ണ വിപണിയില്‍ ഉണ്ടായ ഇടിവും പ്രകൃതിദത്ത റബ്ബറിന്റെ വില കൂടാന്‍ കാരണമായിട്ടുണ്ട് എന്നാണ് റിപ്പോര്‍ട്ടുകള്‍. കൊവിഡ് വ്യാപനം തുടങ്ങിയതോടെ അസംസ്‌കൃത എണ്ണവില കുത്തനെ ഇടിഞ്ഞിരിക്കുകയാണ്.