ഹജ്ജ് വിസ വിതരണം ഫെബ്രുവരി 8 മുതല്‍, തീര്‍ത്ഥാടന സീസണ്‍ മികവുറ്റതാക്കാന്‍ സൗദി അറേബ്യ

ഈ വര്‍ഷത്തെ ഹജ്ജ് വിസ വിതരണം ഞായറാഴ്ച (ഫെബ്രുവരി 8) ആരംഭിക്കും. ഹജ്ജിന് നാല് മാസം മുന്‍പ് തന്നെ വിസകള്‍ ലഭ്യമാകുന്നത് ഒരുക്കങ്ങള്‍ നേരത്തെ തുടങ്ങാന്‍ സഹായിക്കും. തീര്‍ത്ഥാടകര്‍ക്കും സേവന ദാതാക്കള്‍ക്കും ഇതിന്റെ ഗുണം ലഭിക്കുമെന്ന് സൗദി അറേബ്യയുടെ ഹജ്ജ്, ഉംറ മന്ത്രാലയം പറഞ്ഞു. ആദ്യമായാണ് ഹജ്ജ് വിസ നാല് മാസം മുന്‍പ് ലഭ്യമാക്കുന്നത്.

ദീര്‍ഘകാല ആസൂത്രണം
സേവന സന്നദ്ധത വര്‍ദ്ധിപ്പിക്കുന്നതിനും തീര്‍ത്ഥാടകരുടെ സുഖ സൗകര്യങ്ങള്‍ മെച്ചപ്പെടുത്തുന്നതിനുമാണ് വിസകള്‍ നേരത്തെയാക്കിയത്. കാര്യക്ഷമത, സേവന നിലവാരം എന്നിവ ഉറപ്പുവരുത്തുന്ന വിഷന്‍ 2030 ചട്ടക്കൂടിന്റെ ഭാഗമായാണ് നീക്കം.

ഹജ്ജ് സേവന, താമസ കരാറുകള്‍
വിദേശ തീര്‍ത്ഥാടകര്‍ സുസൂക്ക് പ്ലാറ്റ്‌ഫോം വഴി മക്കയിലെ താമസക്കരാറുകള്‍ പൂര്‍ത്തീകരിക്കുന്നു.75,000 തീര്‍ത്ഥാടകര്‍ രജിസ്റ്റര്‍ ചെയ്തതില്‍ 30,000 പേര്‍ സ്വന്തം രാജ്യത്തുനിന്നാണ് പാക്കേജുകള്‍ ബുക്ക് ചെയ്തിരിക്കുന്നത്.

ഹജ്ജ് ക്യാമ്പുകള്‍ 

വിദേശ രാജ്യങ്ങളിലെ തീര്‍ത്ഥാടകര്‍ക്കായി ഏകദേശം 485 ക്യാമ്പുകള്‍ അനുവദിക്കപ്പെട്ടു. സേവന, താമസ, ഗതാഗത, കരാറുകള്‍ പൂര്‍ത്തിയാക്കുക, ക്യാമ്പുകള്‍ അനുവദിക്കുക തുടങ്ങിയ പ്രവര്‍ത്തനങ്ങള്‍ക്കായി 73 ഹജ്ജ് കാര്യ ഓഫീസുകള്‍ സജ്ജമാണ്.