എസ്ബിഐ കാര്‍ഡ്‌ ഐപിഒ; മൂന്നാം ദിവസം ഓഹരികൾ പൂർണ്ണമായും വിറ്റഴിഞ്ഞു

ന്യൂഡൽഹി: ഓഹരി വിപണി തകര്‍ച്ച നേരിടുന്ന സമയത്തും എസ്‌ബിഐ കാര്‍ഡ്‌സിന്റെ ഐപിഒയ്‌ക്ക് മുന്നേറ്റം. ഓഹരി വിൽപ്പന തുടങ്ങി മൂന്നാം ദിവസം തന്നെ ഓഹരികൾ പൂർണ്ണമായും സബ്‌സ്‌ക്രൈബുചെയ്‌തു. 10.02 കോടി ഓഹരികളാണ് വിൽപനയ്ക്കുവെച്ചത്. മൂന്നാം ദിവസം 11 മണിയോടെ 11.02 കോടി ഓഹരികള്‍ക്കുള്ള അപേക്ഷ ലഭിച്ചതായി എന്‍എസ്ഇയില്‍ നിന്നുള്ള വിവരങ്ങള്‍ വ്യക്തമാക്കുന്നു. ഐപിഒ വഴി 10,355 കോടി രൂപ സമാഹരിക്കുകയാണ് കമ്പനിയുടെ ലക്ഷ്യം. 750 രൂപ മുതല്‍ 755 രൂപവരെ ആയിരിക്കും ലിസ്റ്റ് ചെയ്യുമ്പോഴത്തെ വില. മാര്‍ച്ച് രണ്ടിന് തുടങ്ങിയ എസ്‌ബിഐ കാര്‍ഡ്‌സിന്റെ ഐപിഒ അഞ്ചിനാണ് ഇഷ്യു ക്ലോസ് ചെയ്യുന്നത്.

എസ്‌ബി‌ഐ കാർഡ്‌സിനെക്കുറിച്ചറിയാം..

എസ്‌ബിഐ കാർഡ്‌സില്‍ 76 ശതമാനം ഓഹരിയാണ് സ്റ്റേറ്റ് ബാങ്കിനുളളത്. ബാക്കി വരുന്ന ഓഹരി കാർലൈൽ ഗ്രൂപ്പിനാണ്. വിപണി വിഹിതത്തിന്‍റെ അടിസ്ഥാനത്തില്‍ എസ്ബിഐ കാർഡ്‌സാണ് രാജ്യത്തെ രണ്ടാമത്തെ ഏറ്റവും വലിയ ക്രെഡിറ്റ് കാർഡ് കമ്പനി. ഐ‌പി‌ഒ പ്രകാരം 130.53 ലക്ഷം ഇക്വിറ്റി ഷെയറുകൾ എസ്‌ബി‌ഐ ഓഹരി ഉടമകൾക്കായി നീക്കിവച്ചിട്ടുണ്ട്. 500 കോടി രൂപ മൂല്യമുളള പുതിയ ഇക്വിറ്റി ഓഹരികളും എസ്ബിഐ കാര്‍ഡ്സ് വില്‍പ്പനയ്ക്ക് എത്തിക്കുന്നുണ്ട്. സ്റ്റേറ്റ് ബാങ്ക് ഓഫ് ഇന്ത്യയും ജി‌ഇ ക്യാപിറ്റലും ചേർന്ന് 1998 ഒക്ടോബറിലാണ് എസ്‌ബി‌ഐ കാർഡുകൾ ആരംഭിച്ചത്. 2017-ൽ ജിഇ ക്യാപിറ്റൽ അവരുടെ 40 ശതമാനം ഓഹരി പങ്കാളിത്തം എസ്‌ബിഐക്കും കാർലൈലിനുമായി വിൽക്കുകയായിരുന്നു.