എസ്‌ബി‌ഐ ദീർഘകാല എഫ്ഡി പലിശ നിരക്കുകൾ കുറച്ചു, ഏറ്റവും പുതിയ നിരക്കുകൾ ഇതാ..

ഇന്ത്യയിലെ ഏറ്റവും വലിയ വാണിജ്യ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) ദീർഘകാല എഫ്ഡി പലിശ നിരക്ക് കുറച്ചു. എസ്‌ബി‌ഐ നിക്ഷേപങ്ങളുടെ ഏറ്റവും പുതിയ എഫ്ഡി നിരക്ക് ജനുവരി 10 മുതൽ പ്രാബല്യത്തിൽ വന്നു. ഒരു വർഷം മുതൽ 10 വർഷം വരെ കാലാവധി പൂർത്തിയാകുന്ന ദീർഘകാല നിക്ഷേപങ്ങളുടെ പലിശ നിരക്കിൽ ബാങ്ക് 15 ബേസിസ് പോയിൻറ് കുറവാണ് വരുത്തിയിരിക്കുന്നത്.

മാറ്റമില്ല

എസ്‌ബി‌ഐയുടെ കണക്കനുസരിച്ച്, 7 ദിവസം മുതൽ 1 വർഷം വരെ കാലാവധി പൂർത്തിയാകുന്ന നിക്ഷേപങ്ങളിൽ നിരക്കുകളിൽ മാറ്റമില്ല. നവംബർ മാസത്തിൽ ഒരു വർഷം മുതൽ രണ്ട് വർഷത്തിൽ താഴെ കാലാവധി പൂർത്തിയാകുന്ന എഫ്ഡി നിരക്ക് 15 ബേസിസ് പോയിന്റ് കുറച്ചിരുന്നു.

പലിശ നിരക്കുകൾ

7 ദിവസം മുതൽ 45 ദിവസം വരെയും 46 ദിവസം മുതൽ 179 ദിവസം വരെയും കാലാവധിയുള്ള എഫ്ഡിക്ക് എസ്ബിഐ യഥാക്രമം 4.50 ശതമാനം, 5.50 ശതമാനം പലിശയാണ് വാഗ്ദാനം ചെയ്യുന്നത്. 180 ദിവസം മുതൽ 210 ദിവസം വരെയും 211 ദിവസം മുതൽ 1 വർഷത്തിൽ താഴെയുമുള്ള എഫ്ഡികൾക്ക് ബാങ്ക് 5.80% പലിശനിരക്ക് നൽകും. 1 വർഷം മുതൽ 10 വർഷം വരെ കാലാവധി പൂർത്തിയാകുന്ന നിക്ഷേപങ്ങളുടെ പലിശ നിരക്ക് ബാങ്ക് കുറച്ചു. നേരത്തെ 6.25% പലിശ നേടിയ ഈ നിക്ഷേപങ്ങൾക്ക് ഇപ്പോൾ 6.10% പലിശയാണ് ലഭിക്കുക.

മുതിർന്ന പൗരന്മാർക്ക്

മുതിർന്ന പൗരന്മാർക്ക് എസ്‌ബി‌ഐ എല്ലാ കാലയളവിലും 50 ബേസിസ് പോയിൻറ് അധിക പലിശ നിരക്ക് വാഗ്ദാനം ചെയ്യുന്നുണ്ട്. 7 ദിവസം മുതൽ 45 ദിവസം വരെയും 46 ദിവസം മുതൽ 179 ദിവസം വരെയുമുള്ള എഫ്ഡിക്ക് യഥാക്രമം 5.00 ശതമാനവും 6.00 ശതമാനവും പലിശയാണ് ലഭിക്കുക. 180 ദിവസം മുതൽ 210 ദിവസം വരെയും 211 ദിവസം മുതൽ 1 വർഷത്തിൽ താഴെയുമുള്ള എഫ്ഡിക്ക് 6.30 ശതമാനം പലിശ നിരക്ക് നൽകും. ഏറ്റവും പുതിയ നിരക്ക് പരിഷ്കരണത്തിന് ശേഷം, മുതിർന്ന പൗരന്മാർക്ക് ഒരു വർഷത്തിനും 10 വർഷത്തിനും ഇടയിലുള്ള നിക്ഷേപത്തിന് എസ്‌ബി‌ഐ 6.60 ശതമാനം പലിശ നൽകും.