ജൻധൻ അക്കൗണ്ട് ഉടമകളാണോ? 2 ലക്ഷം രൂപയുടെ അപകട ഇൻഷുറൻസ് ആനുകൂല്യവുമായി എസ്ബിഐ

ദില്ലി; ജൻ ധൻ അക്കൗണ്ട് ഉടമകൾക്ക് എസ്‌ബി‌ഐ രണ്ട് ലക്ഷം രൂപയുടെ അപകട മരണ ഇൻഷുറൻസ് ആനുകൂല്യ പദ്ധതിയുമായി സ്റ്റേറ്റ് ബാങ്ക് ഓഫ് ഇന്ത്യ. എസ് ബി ഐ യുടെ റുപേ ജന്‍ധന്‍ കാര്‍ഡിന് അപേക്ഷിക്കുന്നവർക്ക് മാത്രമാണ് ആനുകൂല്യം ലഭിക്കുക.

രാജ്യത്തെ കുടുംബങ്ങളിൽ ഒരാൾക്കെങ്കിലും ബാങ്ക് അക്കൗണ്ടും ബാങ്കിംഗ് സേവനങ്ങളും ഉറപ്പു വരുത്തുകയെന്ന ലക്ഷ്യത്തോടെയായിരുന്നു മോദി സർക്കാർ അധികാരത്തിലേറിയ ആദ്യ ഘട്ടത്തിൽ ജൻധൻ അക്കൗണ്ടുകൾ ആരംഭിച്ചത്. സർക്കാരിന്റെ ആനുകൂല്യങ്ങളും സബ്സിഡികളും കൃത്യമായി അർഹതപ്പെട്ടവരിലേക്ക് എത്തിക്കുക എന്ന ലക്ഷ്യം കൂടി അക്കൗണ്ടിന് പിന്നിലുണ്ടായിരുന്നു.

പ്രധാൻ മന്ത്രി ജൻ ധൻ യോജന (പിഎംജെഡിവൈ) പ്രകാരം ആകെ 41.75 കോടി അക്കൗണ്ടുകൾ തുറന്നിട്ടുണ്ടെന്ന് കഴിഞ്ഞ ദിവസം കേന്ദ്ര ധനകാര്യ സഹമന്ത്രി അനുരാഗ് സിംഗ് താക്കൂർ ലോക്സഭയെ അറിയിച്ചിരുന്നു. ഇതിൽ 35.96 കോടി അക്കൗണ്ടുകൾ നിലവിൽ പ്രവർത്തിക്കുന്നുണ്ടെന്നും അദ്ദേഹം ലോക്സഭയിൽ പ്രതിപക്ഷ ചോദ്യത്തിന് രേഖാ മൂലം നൽകിയ മറുപടിയിലാണ് മന്ത്രി ഇക്കാര്യം അറിയിച്ചത്.പൊതുമേഖലാ ബാങ്കുകൾക്ക് കീഴിൽ 40.48 കോടി അക്കൗണ്ടുകളാണ് തുറന്നിരിയ്ക്കുന്നത്. റൂറൽ റീജിയണൽ ബാങ്കുകൾക്ക് കീഴിൽ 1.27 കോടി അക്കൗണ്ടുകളും.

ജൻധൻ അക്കൗണ്ടിലൂടെ ഉപഭോക്താവിന് ലഭിക്കുന്ന ഏറ്റവും പ്രധാനപ്പെട്ട നേട്ടം രണ്ട് ലക്ഷം രൂപയുടെ അപകട ഇൻഷുറൻസ് ആണ്. മാത്രമല്ല മിനിമം ബാലൻസും അക്കൗണ്ടിൽ ആവശ്യമില്ല. കൂടാതെ എളുപ്പത്തിലുള്ള പണമിടപാടും സാധ്യമാകും. ആറുമാസം ബാങ്ക് അക്കൗണ്ട് മികച്ച രീതിയിൽ ഉപയോഗിക്കുകയാണെങ്കിൽ ഓവർ ഡ്രാഫ്റ്റ് സൗകര്യവും ലഭ്യമാണ്.പതിനായിരം രൂപയോളം ഇങ്ങനെ ഓവർഡ്രാഫ്റ്റായി ലഭിക്കും.