എസ്ബിഐ റിക്കറിംഗ് ഡിപ്പോസിറ്റ് പലിശ നിരക്ക് കുറച്ചു, പുതിയ നിരക്കുകൾ ഇങ്ങനെ

രാജ്യത്തെ മുൻനിര ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) ജനുവരി 10 മുതൽ റിക്കറിംഗ് ഡിപ്പോസിറ്റ് (ആർ‌ഡി) പലിശ നിരക്ക് കുറച്ചു. 1 വർഷം മുതൽ 10 വർഷം വരെ കാലാവധിയുള്ള ആർ‌ഡികളാണ് എസ്‌ബി‌ഐ വാഗ്ദാനം ചെയ്യുന്നത്. പുതിയ പലിശ നിരക്ക് അനുസരിച്ച് എസ്‌ബി‌ഐയുടെ ഒരു വർഷത്തെ ആർ‌ഡി 6.10% പലിശ നൽകും. ഒരു വർഷത്തിനുള്ളിൽ കാലാവധി പൂർത്തിയാകുന്ന ആർഡിയുടെ നിരക്ക് 15 ബേസിസ് പോയിൻറാണ് ബാങ്ക് കുറച്ചത്. നേരത്തെ ഈ നിക്ഷേപങ്ങൾക്ക് 6.25% പലിശനിരക്ക് നൽകിയിരുന്നു.

പലിശ നിരക്കുകൾ

2020 ജനുവരി 10 മുതൽ പ്രാബല്യത്തിൽ വന്ന എസ്‌ബി‌ഐയുടെ ഏറ്റവും പുതിയ ആർ‌ഡി പലിശ നിരക്കുകൾ ഇതാ..

• 1 വർഷം മുതൽ 2 വർഷത്തിൽ താഴെ - 6.10%
• 2 വർഷം മുതൽ 3 വർഷത്തിൽ താഴെ - 6.10%
• 3 വർഷം മുതൽ 5 വർഷത്തിൽ താഴെ - 6.10%
• 5 വർഷം മുതൽ 10 വർഷം വരെ - 6.10%

നിക്ഷേപ തുക

100 രൂപ മുതലുള്ള ഏറ്റവും കുറഞ്ഞ പ്രതിമാസ നിക്ഷേപത്തോടെ എസ്‌ബി‌ഐ ആർ‌ഡി ആരംഭിക്കാം. എന്നാൽ നിക്ഷേപത്തിന് പരമാവധി പരിധിയില്ല. ആർ‌ഡി പലിശനിരക്ക്, ഒരിക്കൽ നിർ‌ണ്ണയിച്ചുകഴിഞ്ഞാൽ, ഡെപ്പോസിറ്റ് കാലയളവിൽ മാറില്ല. ദീർഘകാല എഫ്ഡി നിക്ഷേപത്തിന്റെ
പലിശ നിരക്കും എസ്ബിഐ അടുത്തിടെ കുറച്ചിരുന്നു.

ഭവന വായ്പ പലിശ നിരക്ക്

കഴിഞ്ഞ മാസം ബാങ്ക് ബാഹ്യ ബെഞ്ച്മാർക്ക് അധിഷ്ഠിത നിരക്ക് (ഇബിആർ) 25 ബിപിഎസ് കുറച്ചുകൊണ്ട് പ്രതിവർഷ പലിശനിരക്ക് 8.05 ശതമാനത്തിൽ നിന്ന് 7.80 ശതമാനമായി കുറച്ചിരുന്നു. ഇതോടെ ബാങ്കിന്റെ ഭവനവായ്പ പലിശ നിരക്ക് 8.15 ശതമാനത്തിൽ നിന്ന് 7.90 ശതമാനമായി കുറഞ്ഞു. 2019-20 സാമ്പത്തിക വർഷത്തിൽ ഇതുവരെ എട്ട് തവണ ഫണ്ട് അധിഷ്ഠിത വായ്പാ നിരക്കും (എംസി‌എൽ‌ആർ) ബാങ്ക് കുറച്ചിട്ടുണ്ട്. ബാങ്കിന്റെ ഒരു വർഷത്തെ എം‌സി‌എൽ‌ആർ നിലവിൽ 7.90% ആണ്.