സെൻസെക്സും നിഫ്റ്റിയും നേട്ടത്തിൽ; ടാറ്റ മോട്ടോഴ്‌സിന് 5% നേട്ടം, അദാനി എന്റർപ്രൈസസ് 20% ഉയർന്നു

ഇന്ത്യൻ സൂചികകൾ ഇന്ന് നേട്ടത്തിൽ വ്യാപാരം അവസാനിച്ചു. ഓട്ടോ, ഫിനാൻഷ്യൽ ഓഹരികളാണ് ഏറ്റവും കൂടുതൽ നേട്ടമുണ്ടാക്കിയത്, ടാറ്റ മോട്ടോഴ്‌സ് അഞ്ച് ശതമാനത്തിലധികം ഉയർന്നു, ഇന്നത്തെ ഏറ്റവും മികച്ച നേട്ടം കൈവരിച്ചത് ടാറ്റാ മോട്ടോഴ്സ് ആണ്. സെൻസെക്സ് 45 പോയിൻറ് അഥവാ 0.12 ശതമാനം ഉയർന്ന് 38,844 ലെത്തി. നിഫ്റ്റി 50 സൂചിക 6 പോയിന്റ് ഉയർന്ന് 11,472 ൽ ആണ് വ്യാപാരം അവസാനിച്ചത്. നിഫ്റ്റി മിഡ്‌ക്യാപ്, നിഫ്റ്റി സ്‌മോൾകാപ്പ് സൂചികകൾ യഥാക്രമം 0.34 ശതമാനവും 0.54 ശതമാനവും ഉയർന്നു.

സെൻസെക്സും നിഫ്റ്റിയും നേട്ടത്തിൽ; ടാറ്റ മോട്ടോഴ്‌സിന് 5% നേട്ടം, അദാനി എന്റർപ്രൈസസ് 20% ഉയർന്നു

ടാറ്റാ മോട്ടോഴ്‌സിന്റെ ഓഹരികൾ എൻ‌എസ്‌ഇയിൽ അഞ്ച് ശതമാനം ഉയർന്ന് 127.40 രൂപയായി. കമ്പനിയുടെ വാർഷിക പൊതുയോഗത്തെ തുടർന്നാണ് ഓഹരി വില കുത്തനെ ഉയർന്നത്. കേരളം ആസ്ഥാനമായുള്ള കല്യാൺ ജ്വല്ലേഴ്‌സ് 1,750 കോടി രൂപയുടെ പ്രാരംഭ ഓഹരി വിൽപ്പന (ഐപിഒ) പ്രഖ്യാപിച്ചു. മാർക്കറ്റ് റെഗുലേറ്റർ സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ (സെബി) യിൽ കമ്പനി ഓഫർ രേഖ സമർപ്പിച്ചു. ടൈംലൈൻ, ഇഷ്യു വലുപ്പം, പ്രൈസ് ബാൻഡ് എന്നിവ പ്രഖ്യാപിച്ചിട്ടില്ല.

നിഫ്റ്റി പി‌എസ്‌യു ബാങ്ക് ഇന്നത്തെ ഏറ്റവും മികച്ച പ്രകടന കാഴ്ച്ച വച്ച സൂചികയായി തുടർന്നു. നിഫ്റ്റി ബാങ്ക് 1.34 ശതമാനം ഉയർന്നു. നിഫ്റ്റി ഫിനാൻഷ്യൽസ് 0.91 ശതമാനം ഉയർന്നു. അതേസമയം, നിഫ്റ്റി റിയൽ‌റ്റി 2.14 ശതമാനം ഇടിവ് രേഖപ്പെടുത്തി. ടാറ്റ മോട്ടോഴ്‌സ്, ബജാജ് ഫിനാൻസ്, എസ്‌ബി‌ഐ, ടെക് മഹീന്ദ്ര, ഐഷർ മോട്ടോഴ്‌സ് എന്നിവയാണ് നിഫ്റ്റിയിൽ ഏറ്റവും മികച്ച നേട്ടം കൈവരിച്ച ഓഹരികൾ. ഗെയിൽ, എൻ‌ടി‌പി‌സി, സൺ ഫാർമ, ടാറ്റ സ്റ്റീൽ, ഡോ. റെഡ്ഡീസ് ലബോറട്ടറീസ് എന്നിവയ്ക്ക് നഷ്ടം നേരിട്ടു.