സെൻസെക്സ് റെക്കോർഡ് നേട്ടത്തിൽ ക്ലോസ് ചെയ്തു, നിഫ്റ്റി 13,650ന് മുകളിൽ

ആഭ്യന്തര ഓഹരി വിപണി ഇന്ന് മികച്ച പ്രകടനം കാഴ്ച്ച വച്ചു. ബെഞ്ച്മാർക്ക് സൂചികകളായ എസ് ആന്റ് പി ബിഎസ്ഇ സെൻസെക്സ്, എൻ‌എസ്‌ഇ നിഫ്റ്റി എന്നിവ റെക്കോർഡ് ക്ലോസിംഗിൽ അവസാനിച്ചു. സെൻസെക്സ് 403 പോയിൻറ് അഥവാ 0.87 ശതമാനം ഉയർന്ന് 46,666.46 ലെവലിൽ അവസാനിച്ചു. പകൽ വ്യാപാരത്തിനിടെ എക്കാലത്തെയും ഏറ്റവും ഉയർന്ന നിരക്കായ 46,704.97 എന്ന നിലയിലെത്തി.

എച്ച്ഡിഎഫ്സി, എച്ച്ഡിഎഫ്സി ബാങ്ക്, ടിസിഎസ്, ഇൻഫോസിസ്, ഭാരതി എയർടെൽ എന്നിവയാണ് സെൻസെക്‌സിന്റെ നേട്ടത്തിൽ പ്രധാന പങ്കുവഹിച്ചത്. എൻ‌എസ്‌ഇ നിഫ്റ്റി 50 സൂചിക 115 പോയിൻറ് അഥവാ 0.85 ശതമാനം ഉയർന്ന് 13,682.70 എന്ന റെക്കോർഡ് തലത്തിൽ ക്ലോസ് ചെയ്തു. ഇൻട്രാ-ഡേ ട്രേഡിൽ, സൂചിക 13,692.35 എന്ന എക്കാലത്തെയും ഉയർന്ന നിരക്കിലെത്തിയിരുന്നു.

സെൻസെക്സ് റെക്കോർഡ് നേട്ടത്തിൽ ക്ലോസ് ചെയ്തു, നിഫ്റ്റി 13,650ന് മുകളിൽ

എസ് ആന്റ് പി ബിഎസ്ഇ മിഡ്കാപ്പ് സൂചിക 0.87 ശതമാനം ഉയർന്ന് 17,888 ലെവലിൽ എത്തി. എസ് ആന്റ് പി ബിഎസ്ഇ സ്മോൾകാപ്പ് സൂചിക 0.88 ശതമാനം ഉയർന്ന് 17,852 ൽ എത്തി. എൻ‌എസ്‌ഇയിലെ മേഖലാ സൂചികകളിൽ നിഫ്റ്റി പി‌എസ്‌യു ബാങ്ക് ഒഴികെ മറ്റെല്ലാ സൂചികകളും മുന്നേറി. നിഫ്റ്റി റിയൽ‌റ്റി ഏറ്റവും കൂടുതൽ നേട്ടം കൈവരിച്ചു. അഞ്ച് ശതമാനം ഉയർന്ന് 303.85 എന്ന ലെവലിൽ എത്തി. നിഫ്റ്റി പി‌എസ്‌യു ബാങ്ക് 1.6 ശതമാനം ഇടിഞ്ഞ് 1,803.75 പോയിന്റിലെത്തി.

വ്യക്തിഗത ഓഹരികളിൽ, പുതുതായി ലിസ്റ്റുചെയ്ത ബർഗർ കിംഗ് ഇന്ത്യ ഓഹരി ഇന്നും കുതിച്ച് ഉയർന്നു. തുടർച്ചയായ മൂന്നാം ദിവസവും ഓഹരി 20 ശതമാനം അപ്പർ സർക്യൂട്ട് പരിധിയിലെത്തി.