സെൻസെക്സിൽ 1,200 പോയിന്റ് നേട്ടത്തിൽ തുടക്കം, ആഗോള വിപണികളിലെ നേട്ടം ഗുണം ചെയ്തു

തിങ്കളാഴ്ച ആഗോള വിപണികളുലുണ്ടായ നേട്ടത്തിന് പിന്നാലെ നിഫ്റ്റിയും സെൻസെക്സും ഇന്ന് വ്യാപാരത്തിൽ കുതിച്ചുയർന്നു. ഇന്നലെ ഇന്ത്യൻ വിപണികൾക്ക് അവധിയായിരുന്നെങ്കിലും ഇന്ന് സെൻസെക്സ് 1248 പോയിൻറ് ഉയർന്നപ്പോൾ നിഫ്റ്റി വ്യാപാരത്തിൽ 344 പോയിന്റ് നേട്ടം കൈവരിച്ചു.

രാജ്യത്തെ ഏറ്റവും വലിയ കൊറോണ വൈറസ് ഹോട്ട് സ്പോട്ടായ ന്യൂയോർക്കിൽ ദിവസേനയുള്ള മരണസംഖ്യയിൽ ഇടിവുണ്ടായതിനെത്തുടർന്ന് യുഎസ് ഓഹരികൾ തിങ്കളാഴ്ച 7 ശതമാനം ഉയർന്നു. പ്രധാന രാജ്യങ്ങളിൽ മരണങ്ങളും അണുബാധകളും കുറവാണെന്ന റിപ്പോർട്ടുകളിൽ ആഗോള വിപണികളിൽ ഭൂരിഭാഗവും മികച്ച പ്രകടനം കാഴ്ച്ച വച്ചിരുന്നു. ബി‌എസ്‌ഇയിൽ ഇന്ന് 1,091 ഓഹരികൾ നേട്ടം കൈവരിക്കുമ്പോൾ 195 ഓഹരികൾ നഷ്ടത്തിലാണ്. എൻ‌എസ്‌ഇയിൽ 1,354 ഓഹരികൾ മുന്നേറിയപ്പോൾ 227 ഓഹരികൾ ഇടിഞ്ഞു.

സെൻസെക്സിൽ 1,200 പോയിന്റ് നേട്ടത്തിൽ തുടക്കം, ആഗോള വിപണികളിലെ നേട്ടം ഗുണം ചെയ്തു

ബാങ്ക് ഓഹരികളാണ് ഇന്ന് വ്യാപാരത്തിൽ ഏറ്റവും കൂടുതൽ നേട്ടമുണ്ടാക്കുന്നത്. ബാങ്ക് നിഫ്റ്റി വ്യാപാരത്തിൽ ആറ് ശതമാനം ഉയർന്നു. ഐസിഐസിഐ ബാങ്ക്, ബന്ദൻ ബാങ്ക്, ആക്സിസ് ബാങ്ക്, ഇൻഡസ്ഇൻഡ് ബാങ്ക് എന്നിവയാണ് വ്യാപാരത്തിൽ വലിയ നേട്ടമുണ്ടാക്കുന്ന ഓഹരികൾ. ഓട്ടോ ഓഹരികളും ഇന്ന് മികച്ച പ്രകടനമാണ് കാഴ്ച്ച വയ്ക്കുന്നത്. മഹീന്ദ്ര ആൻഡ് മഹീന്ദ്രയാണ് ഓട്ടോ ഓഹരികളിൽ മികച്ച പ്രകടനം കാഴ്ച്ച വയ്ക്കുന്നത്.

വ്യാപാരത്തിന്റെ തുടക്കത്തിൽ ഇന്ന് നിഫ്റ്റിയിൽ ഒരു ഓഹരികളും നഷ്ടത്തിലല്ല. ഇൻ‌ഡസ് ഇൻ‌ഡ് ബാങ്ക്, മഹീന്ദ്ര ആൻഡ് മഹീന്ദ്ര, എച്ച്സി‌എൽ ടെക്, ആക്സിസ് ബാങ്ക്, ഐ‌സി‌ഐ‌സി‌ഐ ബാങ്ക്, ഇൻ‌ഫോസിസ് എന്നിവയാണ് 5.78 ശതമാനത്തിനും 14.08 ശതമാനത്തിനും ഇടയിൽ വ്യാപാരം നടത്തുന്നത്. എച്ച്ഡിഎഫ്സി ബാങ്ക് (5.15 ശതമാനം), ഇൻഫോസിസ് (5.87 ശതമാനം), ഐസിഐസിഐ ബാങ്ക് (6.20 ശതമാനം) എന്നിവ ചേർന്ന് സെൻസെക്‌സിൽ 400 പോയിൻറിൻറെ നേട്ടം കൈവരിച്ചു. മഹാവീർ ജയന്തി പ്രമാണിച്ച് തിങ്കളാഴ്ച വിപണികൾക്ക് അവധിയായിരുന്നു. ഏപ്രിൽ 10 ന് ദു:ഖ വെള്ളിയും അവധി ദിനമായതിനാൽ ഈ ആഴ്ച്ച മൂന്ന് ദിവസം മാത്രമേ വിപണികൾ തുറക്കുകയുള്ളൂ. ആഗോള വിപണികളിൽ ഹോങ്കോംഗ് ഫ്യൂച്ചറുകളും ഓസ്‌ട്രേലിയ ഫ്യൂച്ചറുകളും ഉയർന്നു. ജപ്പാനിലെ നിക്കി ഫ്യൂച്ചേഴ്സ് നഷ്ട്ടത്തിലാണ് വ്യാപാരം ആരംഭിച്ചതെങ്കിലും 2.3 ശതമാനം നേട്ടത്തിൽ ക്ലോസ് ചെയ്തു.