കാളക്കൂറ്റന്‍ നടമാടി; സെന്‍സെക്‌സ് 380 പോയിന്റ് കയറി, 15,300 കടന്ന് നിഫ്റ്റി — ലോഹത്തില്‍ വന്‍വീഴ്ച്ച

മുംബൈ: കഴിഞ്ഞ രണ്ടു ദിവസത്തെ ക്ഷീണം വിപണി മായ്ച്ചു. 380 പോയിന്റ് നേട്ടത്തിലാണ് ബോംബെ സൂചിക ഇന്ന് വ്യാപാരം പൂര്‍ത്തിയാക്കിയത്. ഒരു ഘട്ടത്തില്‍ 51,073 എന്ന നിലവരെ ഉയര്‍ന്ന സെന്‍സെക്‌സ് 51,017.5 എന്ന നിലയില്‍ ഇടപാടുകള്‍ക്ക് തിരശ്ശീലയിട്ടു (0.75 ശതമാനം നേട്ടം). ഇന്‍ഫോസിസ്, എച്ച്ഡിഎഫ്‌സി, ടിസിഎസ്, ബജാജ് ഫൈനാന്‍സ്, ബജാജ് ഫിന്‍സെര്‍വ്, ലാര്‍സന്‍ ആന്‍ഡ് ടൂര്‍ബോ, റിലയന്‍സ് ഇന്‍ഡസ്ട്രീസ് ഓഹരികളുടെ കുതിപ്പിലാണ് സെന്‍സെക്‌സിന്റെ ഇന്നത്തെ മുന്നേറ്റം.

മാര്‍ച്ച് 12 -ന് ശേഷം ആദ്യമായാണ് സെന്‍സെക്‌സ് 51,000 മാര്‍ക്കില്‍ തിരിച്ചെത്തുന്നത്. ദേശീയ സ്‌റ്റോക്ക് എക്‌സ്‌ചേഞ്ചില്‍ നിഫ്റ്റി ഫിഫ്റ്റി സൂചിക 15,300 മാര്‍ക്കും ഇന്ന് മറികടന്നു. അവസാന മണി മുഴങ്ങുമ്പോള്‍ 93 പോയിന്റ് വര്‍ധിച്ച് 15,301 എന്ന നിലയിലാണ് നിഫ്റ്റി കച്ചവടം മതിയാക്കിയത് (0.6 ശതമാനം നേട്ടം). ഇന്നത്തെ വ്യാപാരത്തിനിടെ 15,320 പോയിന്റ് വരെയും സൂചിക ഉയര്‍ന്നിരുന്നു. വ്യാഴാഴ്ച്ച പ്രതിമാസമുള്ള ഫ്യൂച്ചേഴ്‌സ് ആന്‍ഡ് ഓപ്ഷന്‍സ് കോണ്‍ട്രാക്ടുകള്‍ അവസാനിക്കാനിരിക്കെ, വിപണിയുടെ ചാഞ്ചാട്ടം അളക്കുന്ന ഇന്ത്യാ വിഐഎക്‌സ് സൂചിക 11 ശതമാനം കൂടി 21 പോയിന്റ് നിലയിലാണ് നില്‍ക്കുന്നത്.

ഇന്നത്തെ പ്രകടനം നോക്കിയാല്‍ ബജാജ് ഫൈനാന്‍സ്, ബജാജ് ഫിന്‍സെര്‍വ്, ഇന്‍ഫോസിസ്, ഗ്രാസിം ഇന്‍സ്ട്രീസ്, യുപിഎല്‍, മാരുതി സുസുക്കി, വിപ്രോ, ഇന്ത്യന്‍ ഓയില്‍ കോര്‍പ്പറേഷന്‍ ഓഹരികളാണ് ഇരു സൂചികകളിലും നിക്ഷേപകര്‍ക്ക് നേട്ടം നല്‍കിയത്. പവര്‍ഗ്രിഡ്, ജെഎസ്ഡബ്ല്യു സ്റ്റീല്‍, ഹിന്‍ഡാല്‍കോ, എന്‍ടിപിസി, ടാറ്റ സ്റ്റീല്‍, കോള്‍ ഇന്ത്യ ഓഹരികള്‍ കാര്യമായ നഷ്ടവും ഏറ്റുവാങ്ങി. ബെഞ്ച്മാര്‍ക്ക് സൂചികകളെ അപേക്ഷിച്ച് വിശാല വിപണികളില്‍ ചിത്രം ഒരല്‍പ്പം വ്യത്യസ്തമാണ്. ബുധനാഴ്ച്ച ബിഎസ്ഇ മിഡ്ക്യാപ് സൂചിക 0.14 ശതമാനം താഴോട്ടുപോയി. ബിഎസ്ഇ സ്‌മോള്‍ക്യാപ് സൂചിക 0.69 ശതമാനവും മുന്നേറി.

വ്യവസായങ്ങള്‍ അടിസ്ഥാനപ്പെടുത്തിയുള്ള വില സൂചികകളില്‍ നിഫ്റ്റി ലോഹം കനത്ത ഇടിവ് രേഖപ്പെടുത്തിയിട്ടുണ്ട്. പ്രമുഖ നിക്ഷേപ ബാങ്കിങ് സ്ഥാപനമായ ക്രെഡിറ്റ് സൂസി ലോഹ മേഖലയുടെ കാഴ്ച്ചപ്പാട് 'ഓവര്‍വെയ്റ്റില്‍' നിന്നും 'അണ്ടര്‍വെയ്റ്റാക്കി' തരംതാഴ്ത്തിയത് സൂചികയുടെ വീഴ്ച്ചയ്ക്ക് കാരണമായി. 2 ശതമാനം തകര്‍ച്ചയോടെയാണ് നിഫ്റ്റി ലോഹം ദിനം പിന്നിട്ടത്. നിഫ്റ്റിയില്‍ ലോഹത്തിന് പുറമെ പൊതുമേഖലാ ബാങ്ക് സൂചികയും 0.5 ശതമാനം തകര്‍ച്ച രേഖപ്പെടുത്തിയിട്ടുണ്ട്. മറുഭാഗത്ത് നിഫ്റ്റി റിയല്‍റ്റി (3 ശതമാനം), നിഫ്റ്റി ഐടി (2 ശതമാനം) സൂചികകള്‍ ഗൗരവമായ നേട്ടത്തില്‍ ഇടപാടുകള്‍ മതിയാക്കി.