6 ദിവസത്തെ നേട്ടത്തിന് ശേഷം ഇന്ത്യന്‍ ഓഹരി വിപണിയില്‍ ഇടര്‍ച്ച

തുടര്‍ച്ചയായി ആറ് ദിവസത്തെ കുതിപ്പിന് വിരാമം; ചൊവാഴ്ച്ച ഓഹരി വിപണിയില്‍ നേരിയ ഇടിവ്. അവസാന മണി മുഴങ്ങുമ്പോള്‍ ബിഎസ്ഇ സെന്‍സെക്‌സ് സൂചിക 19 പോയിന്റ് കുറഞ്ഞ് 51,329 എന്ന നിലയില്‍ വ്യാപാരം അവസാനിപ്പിച്ചു. എന്‍എസ്ഇ നിഫ്റ്റി സൂചിക 6 പോയിന്റ് ഇടിവില്‍ 15,109 എന്ന നിലയ്ക്കാണ് ഇടപാടുകള്‍ക്ക് തിരശ്ശീലയിട്ടത്. ഓട്ടോ, ലോഹ, പൊതുമേഖലാ ബാങ്ക്, ഫാര്‍മ ഓഹരികളില്‍ ലാഭമെടുപ്പ് നടന്നത് ഇന്ത്യന്‍ സൂചികകളുടെ ഇടര്‍ച്ചയ്ക്ക് വഴിയൊരുക്കി.

സെന്‍സെക്‌സില്‍ ഏഷ്യന്‍ പെയിന്റ്‌സാണ് പ്രധാന നേട്ടം കുറിച്ചത്. ചൊവാഴ്ച്ച ഏഷ്യന്‍ പെയിന്റസ് ഓഹരികള്‍ 3.6 ശതമാനം നേട്ടത്തില്‍ ദിനം പൂര്‍ത്തിയാക്കി. ഓന്‍ജിസി, ടൈറ്റന്‍ ഓഹരികളും സെന്‍സെക്‌സില്‍ മുന്നേറിയത് കാണാം. ഇരു കമ്പനികളുടെ ഓഹരികളും 1 ശതമാനം വീതം നേട്ടം കയ്യടക്കി. മഹീന്ദ്ര ആന്‍ഡ് മഹീന്ദ്ര, സണ്‍ ഫാര്‍മ, ഐടിസി ഓഹരികളാണ് നഷ്ടം നേരിട്ടവരില്‍ പ്രമുഖര്‍. ഈ അവസരത്തില്‍ ചൊവാഴ്ച്ച വിപണിയില്‍ നടന്ന വ്യാപാര ഇടപാടുകളുടെ സംഗ്രഹം ചുവടെ കാണാം.

• ഐടി, എഫ്എംസിജി കമ്പനികള്‍ ചൊവാഴ്ച്ച നഷ്ടം രേഖപ്പെടുത്തി.
• സെന്‍സെക്‌സിലെ 30 സ്റ്റോക്കുകളില്‍ 16 ഉം നഷ്ടത്തിലാണ് ദിവസം പൂര്‍ത്തിയാക്കിയത്.
• ടിസിഎസ്, ഐടിസി, ബജാജ് ഫൈനാന്‍സ്, ഹിന്ദുസ്താന്‍ യുണിലെവര്‍ ഓഹരികള്‍ സൂചികയുടെ പ്രകടനത്തില്‍ നിര്‍ണായകമായി.
• പ്രധാന നേട്ടക്കാര്‍: ഏഷ്യന്‍ പെയിന്റ്‌സ് (3.70%), ഓഎന്‍ജിസി (1.30%), ടൈറ്റന്‍ (1.23%)
• നഷ്ടം സംഭവിച്ചവര്‍: മഹീന്ദ്ര ആന്‍ഡ് മഹീന്ദ്ര (-3.62%), ഐടിസി (-1.76 ശതമാനം), സണ്‍ ഫാര്‍മ (-1.73%)
• മേഖലാ സൂചികകളില്‍ ബിഎസ്ഇ കണ്‍സ്യൂമര്‍ ഡ്യൂറബിള്‍സ് 1.43 ശതമാനം നേട്ടം കുറിച്ചു.
• ബിഎസ്ഇ ഓട്ടോ സൂചിക 1.43 ശതമാനം നഷ്ടവും രേഖപ്പെടത്തി.
• വില്‍പ്പന നടന്ന ഓഹരികളുടെ എണ്ണത്തില്‍ ആക്‌സിസ് ബാങ്ക്, റിലയന്‍സ് ഇന്‍ഡസ്ട്രീസ്, എസ്ബിഐ, ഏഷ്യന്‍ പെയിന്റ്‌സ്, എയര്‍ടെല്‍ എന്നീ കമ്പനികള്‍ മുന്നിലെത്തി.

ചൊവാഴ്ച്ച ഡോളറിനെതിരെ 10 പൈസ നേട്ടത്തില്‍ 72.87 എന്ന നിലയ്ക്കാണ് രൂപ വിനിമയം പൂര്‍ത്തിയാക്കിയത്. ഫോറക്‌സ് വിപണിയില്‍ 72.87 എന്ന നിലയ്ക്കായിരുന്നു രൂപയുടെ തുടക്കം. ദിവസ വ്യാപാരത്തില്‍ 72.85 എന്ന ഉയര്‍ന്ന നിലയും 72.92 എന്ന താഴ്ന്ന നിലയും രൂപ തൊട്ടു. ഒടുവില്‍ 10 പൈസ നേട്ടത്തില്‍ 72.87 എന്ന നിലയ്ക്കാണ് രൂപയുടെ വിനിമയം പൂര്‍ത്തിയായത്.