'കോലാഹലമില്ലാതെ' ഓഹരി വിപണിക്ക് സമാപ്തി; റിലയന്‍സിന് നേട്ടം, ഐടിസിക്ക് തകര്‍ച്ച

ഐടിസി, സണ്‍ ഫാര്‍മ, ഓഎന്‍ജിസി, ഭാരതി എയര്‍ടെല്‍ കമ്പനികള്‍ സെന്‍സെക്‌സിലും നിഫ്റ്റിയിലും ഒരുപോലെ പതറുന്നത് നിക്ഷേപകര്‍ കണ്ടു. വിശാല വിപണികളിലും സമ്മിശ്ര പ്രതികരണമാണ് ഇന്ന് ഉയര്‍ന്നത്. ബിഎസ്ഇ മിഡ്ക്യാപ് സൂചിക 0.06 ശതമാനം ഉയര്‍ച്ച കുറിച്ചപ്പോള്‍ ബിഎസ്ഇ സ്‌മോള്‍ക്യാപ് സൂചിക 0.02 ശതമാനം ഇടറി.

മേഖല വിലയിരുത്തിയാല്‍ നിഫ്റ്റി ലോഹ സൂചിക 1.7 ശതമാനം താഴോട്ടു വീണു. നിഫ്റ്റി എഫ്എംസിജി സൂചിക 1.5 ശതമാനവും നഷ്ടം രേഖപ്പെടുത്തി. നിഫ്റ്റി സ്വകാര്യ ബാങ്ക്, നിഫ്റ്റി ബാങ്ക് സൂചികകളാണ് മറുഭാഗത്ത് മുന്നേറ്റം കാഴ്ച്ചവെച്ചത്. ഇരു സൂചികകളും 1 ശതമാനം വീതം നേട്ടം കണ്ടെത്തി.

വെള്ളിയാഴ്ച്ച ഓഹരിയൊന്നിന് 2,808 രൂപയിലേക്ക് എച്ച്ഡിഎഫ്‌സി കുതിച്ചതിന് പിന്നാലെ കമ്പനിയുടെ വിപണി മൂല്യം 5 ലക്ഷം കോടി പിന്നിടുന്നതിനും നിക്ഷേപകര്‍ സാക്ഷിയായി. അവസാന മണി മുഴുങ്ങുമ്പോള്‍ 1 ശതമാനം നേട്ടത്തിലാണ് എച്ച്ഡിഎഫ്‌സി വ്യാപാരം പൂര്‍ത്തിയാക്കിയത്. നിലവില്‍ ബോംബെ സ്‌റ്റോക്ക് എക്‌സ്‌ചേഞ്ചില്‍ എച്ച്ഡിഎഫ്‌സി ഓഹരിയൊന്നിന് 2,790 രൂപയാണ് വില.

5 ലക്ഷം കോടി വിപണി മൂല്യം പിന്നിടുന്ന ആറാമത്തെ ഇന്ത്യന്‍ കമ്പനിയാണ് ഇപ്പോള്‍ എച്ച്ഡിഎഫ്‌സി. നേരത്തെ, റിലയന്‍സ് ഇന്‍ഡസ്ട്രീസ്, ടാറ്റ കണ്‍സള്‍ട്ടന്‍സി സര്‍വീസസ്, എച്ച്ഡിഎഫ്‌സി ബാങ്ക്, ഹിന്ദുസ്താന്‍ യുണിലെവര്‍, ഇന്‍ഫോസിസ് കമ്പനികള്‍ ഈ നേട്ടം കരസ്ഥമാക്കിയിരുന്നു. ഇന്ത്യയിലെ ഏറ്റവും മൂല്യമേറിയ 50 കമ്പനികളില്‍ ഒന്നാകാന്‍ അദാനി എന്റര്‍പ്രൈസസിനും വെള്ളിയാഴ്ച്ച സാധിച്ചു.

ദിവസ വ്യാപാരത്തില്‍ 9 ശതമാനത്തോളമാണ് കമ്പനിയുടെ ഓഹരി വില കുതിച്ചത് (719 രൂപ). എസ്ബിഐ കാര്‍ഡ്‌സ് ആന്‍ഡ് പെയ്‌മെന്റ് സര്‍വീസസ് ഓഹരികളും വെള്ളിയാഴ്ച്ച പുതിയ ഉയര്‍ച്ച കയ്യടക്കി. ബോംബെ സ്‌റ്റോക്ക് എക്‌സ്‌ചേഞ്ചില്‍ 2 ശതമാനം നേട്ടത്തോടെ 1,040 രൂപയിലാണ് കമ്പനിയുടെ ഓഹരി എത്തിയത്.

ഈ വര്‍ഷം ഇതുവരെ എസ്ബിഐ കാര്‍ഡ്‌സ് 23 ശതമാനം മുന്നേറ്റം കാഴ്ച്ചവെച്ചത് കാണാം. സെന്‍സെക്‌സ് പോലും 8.5 ശതമാനം മാത്രമേ നേട്ടം കയ്യടക്കിയിട്ടുള്ളൂവെന്ന് ഇവിടെ പ്രത്യേകം പരാമര്‍ശിക്കണം. ഓഹരി വില ഉയര്‍ന്ന പശ്ചാത്തലത്തില്‍ എസ്ബിഐ കാര്‍ഡ്‌സിന്റെ വിപണി മൂല്യം 1 ലക്ഷം കോടി രൂപയിലേക്ക് അടുക്കുകയാണ്.