നഷ്ടത്തില്‍ കച്ചവടം മതിയാക്കി ഓഹരി വിപണി; നേട്ടം കൊയ്ത് ബജാജ് ഓട്ടോ, കാലിടറി റിലയന്‍സ്

ബിഎസ്ഇ മിഡ്ക്യാപ് സൂചിക 1.1 ശതമാനം മാത്രമേ താഴോട്ടു പോയുള്ളൂ; 18,777.46 എന്ന നിലയില്‍ മിഡ്ക്യാപ് സൂചിക ഇപ്പോള്‍ തുടരുന്നു. ബിഎസ്ഇ സ്‌മോള്‍ക്യാപ് സൂചിക 0.93 ശതമാനം ഇടിവില്‍ 18,442 എന്ന നില രേഖപ്പെടുത്തിയിട്ടുണ്ട്.

മേഖലാ സൂചികകള്‍ വിലയിരുത്തിയാല്‍ പ്രധാന സൂചികകളെല്ലാം നഷ്ടത്തില്‍ത്തന്നെ വ്യാപാരം മതിയാക്കി. നിഫ്റ്റി ലോഹ സൂചിക 4 ശതമാനം വീഴ്ച്ച നേരിട്ടു. വ്യക്തിഗത ഓഹരികള്‍ പരിശോധിച്ചാല്‍ സെയില്‍ 14 ശതമാനവും ജെഎസ്പിഎല്‍ 8 ശതമാനവും ഹിന്ദുസ്താന്‍ കോപ്പര്‍ 4 ശതമാനവും പിന്നില്‍പ്പോയി.

നിഫ്റ്റി ബാങ്ക് സൂചിക 1,000 പോയിന്റ് അഥവാ 3.25 ശതമാനം നഷ്ടത്തില്‍ 31,176 എന്ന നിലയ്ക്കാണ് ഇടപാടുകള്‍ പൂര്‍ത്തിയാക്കിയത്.

നേട്ടം കൊയ്തവര്‍

5 ശതമാനത്തോളം നേട്ടം കൊയ്താണ് എസ്ബിഐ ഓഹരികള്‍ വെള്ളിയാഴ്ച്ച കച്ചവടം മതിയാക്കിയത്. ഡിസംബര്‍ പാദത്തില്‍ ആസ്തികളുടെ നിലവാരം വര്‍ധിച്ചെന്ന വിവരം എസ്ബിഐ ഓഹരികള്‍ക്ക് പുത്തനുണര്‍വ് നല്‍കി. എസ്ബിഐക്ക് പുറമെ ബജാജ് ഓട്ടോ ഓഹരികളും വന്‍കുതിപ്പ് നടത്തിയത് കാണാം. സെന്‍സെക്‌സ് സൂചികയില്‍ 11 ശതമാനം നേട്ടം ബജാജ് ഓട്ടോ ഓഹരികള്‍ കയ്യടക്കി. ഒരുഘട്ടത്തില്‍ ഓഹരിയൊന്നിന് റെക്കോര്‍ഡ് നിലവാരമായ 4,130 രൂപ ബജാജ് ഓട്ടോ ഓഹരികള്‍ തൊട്ടിരുന്നു.

ഇതേസമയം ദിനവ്യാപാരത്തിനിടെ ബയോകോണ്‍ ഓഹരികള്‍ 13 ശതമാനത്തോളം നഷ്ടം രേഖപ്പെടുത്തി. 11 ശതമാനം താഴ്ച്ചയിലാണ് ബയോകോണ്‍ വ്യാപാരം പൂര്‍ത്തിയാക്കിയതും. ഡിസംബര്‍ പാദത്തില്‍ പ്രതീക്ഷിച്ചതിലും കുറഞ്ഞ അറ്റാദായം കമ്പനിയുടെ പ്രകടനത്തെ പിടിച്ചിരുത്തി.

ഡിസംബര്‍ പാദത്തിലെ സാമ്പത്തിക ഫലം പുറത്തുവിടാനിരിക്കെ റിലയന്‍സ് ഇന്‍ഡസ്ട്രീസ് ഓഹരികളും 2.4 ശതമാനം നഷ്ടത്തിലാണ് ഇടപാട് മതിയാക്കിയത്. ഈ വാരം 6 ശതമാനത്തോളം നേട്ടം റിലയന്‍സ് ഓഹരികള്‍ കുറിച്ചിരുന്നു.

ആഗോള ചലനം

വെള്ളിയാഴ്ച്ച വ്യാപകമായ ലാഭമെടുപ്പ് മുന്‍നിര്‍ത്തി ഏഷ്യന്‍ ഓഹരികള്‍ റെക്കോര്‍ഡ് ഉയരത്തില്‍ നിന്നും താഴെ പോവുകയുണ്ടായി. ജപ്പാന് വെളിയിലുള്ള വിശാല സൂചികയായ എംഎസ്‌സിഐയില്‍ ഏഷ്യാ പസിഫിക് ഓഹരികള്‍ 0.6 ശതമാനം ഇടിഞ്ഞു. ഓസ്‌ട്രേലിയയുടെ ബെഞ്ച്മാര്‍ക്ക് സൂചിക 0.3 ശതമാനവും ജപ്പാന്റെ നിക്കെയ് സൂചിക 0.4 ശതമാനവും നഷ്ടം കുറിച്ചു.

യൂറോപ്പിലും ഓഹരി വിപണി ഇടിഞ്ഞത് കാണാം. യൂറോ മേഖലയിലെ യാത്രാ നിയന്ത്രണങ്ങളും ബ്രിട്ടണിലെ ദാരുണമായ ചില്ലറ വില്‍പ്പനച്ചിത്രവും യൂറോപ്യന്‍ ഓഹരികളുടെ കുതിപ്പിന് കടിഞ്ഞാണിട്ടു. പാന്‍ യൂറോപ്യന്‍ സ്റ്റോക്‌സ് 600 സൂചിക 0.4 ശതമാനമാണ് വെള്ളിയാഴ്ച്ച നഷ്ടം കുറിച്ചത്.