ഓഹരി വിപണിയിൽ ഇന്നും തുടക്കം നഷ്ടത്തിൽ, ലക്ഷ്മി വിലാസ് ബാങ്ക് ഓഹരികൾ 20% നഷ്ടത്തിൽ

ഇന്നലത്തേത് പോലെ തന്നെ ഇന്ത്യൻ സൂചികകൾ ഇന്നും നഷ്ടത്തിൽ വ്യാപാരം ആരംഭിച്ചു. നിഫ്റ്റി 12850ന് അടുത്താണ് വ്യാപാരം നടത്തുന്നത്. രാവിലെ 09:16ന് സെൻസെക്സ് 284,74 പോയിൻറ് അഥവാ 0.64% കുറഞ്ഞ് 43895.31ലെത്തി. നിഫ്റ്റി 76.20 പോയിന്റ് അഥവാ 0.59% താഴ്ന്ന് 12862,10ൽ എത്തി. ഏകദേശം 483 ഓഹരികൾ രാവിലെ മുന്നേറിയപ്പോൾ 642 ഓഹരികൾ ഇടിഞ്ഞു. 77 ഓഹരികൾ മാറ്റമില്ലാതെ തുട‍ർന്നു.

പവ‍ർ​ഗ്രിഡ്, എസ്ബിഐ, ആക്സിസ് ബാങ്ക്, ഐസിഐസിഐ ബാങ്ക്, എച്ച്ഡിഎഫ്സി, എൽ ആൻഡി ടി തുടങ്ങിയ ഓഹരികളാണ് ബിഎസ്ഇ സെൻസെക്സിൽ രാവിലെ ഏറ്റവും കൂടുതൽ നഷ്ടം രേഖപ്പെടുത്തുന്നത്. ബജാജ് ഫിൻസെ‍ർവ്, ടിസിഎസ്, ടാറ്റാ സ്റ്റീൽ, മാരുതി, ബജാജ് ഫിനാൻസ്, റിലയൻസ് എന്നിവയ്ക്കാണ് ഏറ്റവും കൂടുതൽ നേട്ടം.

ഓഹരി വിപണിയിൽ ഇന്നും തുടക്കം നഷ്ടത്തിൽ

എൻ‌എസ്‌ഇയിൽ ഇന്ന് ഏറ്റവും സജീവമായ ഓഹരികൾ വൊഡ ഐഡിയ, ടാറ്റ മോട്ടോഴ്‌സ്, യെസ് ബാങ്ക് എന്നിവയാണ്. ലക്ഷ്മി വിലാസ് ബാങ്ക് ഓഹരികൾ 20% നഷ്ടത്തിലാണ്. സ്‌പൈസ് ജെറ്റ് ഓഹരികൾ 6% ഉയ‍‍ർന്നു. 7,000 കോടി രൂപയ്ക്ക് മുകളിലുള്ള മെഗാ കരാറിനെ തുട‍ർന്ന് എൽ ആൻഡ് ടി ഓഹരികൾ ഇന്ന് ഒരു ശതമാനം ഉയർന്ന് 1,160 രൂപയായി.

കൊറോണ വൈറസ് വ്യാപനത്തെ തുട‍ർന്ന് യുഎസിലെ പ്രധാന നഗരങ്ങളിൽ വീണ്ടും ലോക്ക്ഡൗൺ പ്രഖ്യാപിക്കുമെന്ന ആശങ്കകൾക്കിടയിൽ വാൾസ്ട്രീറ്റിലെ ഇടിവിനെ തുട‍ർന്ന് മിക്ക ഏഷ്യൻ ഓഹരികളും ഇന്ന് നഷ്ടത്തിലാണ്. ഓസ്‌ട്രേലിയയുടെ എസ് ആന്റ് പി ആദ്യ വ്യാപാരത്തിൽ 0.5 ശതമാനം നഷ്ടം നേരിട്ടപ്പോൾ ഹോങ്കോങ്ങിന്റെ ഹാംഗ് സെങ് സൂചിക 0.02 ശതമാനം നഷ്ടപ്പെട്ടു. ജപ്പാനിലെ നിക്കി 225 0.4 ശതമാനം ഇടിഞ്ഞു.