ശക്തമായ ആഭ്യന്തര നിക്ഷേപകരുടെ വാങ്ങൽ കാരണം ഇന്ത്യൻ സൂചികകൾ ഇന്ന് നേട്ടത്തിൽ വ്യാപാരം ആരംഭിച്ചു. ബിഎസ്ഇ സെൻസെക്സ് 218 പോയിൻറ് ഉയർന്ന് 36,689 മാർക്കിലെത്തിയപ്പോൾ എൻഎസ്ഇ നിഫ്റ്റി 53 പോയിൻറ് ഉയർന്ന് 10,793 ലെവലിൽ എത്തി. അതിരാവിലെ നടന്ന ട്രേഡിങ്ങ് സെഷനിൽ ബാങ്ക് നിഫ്റ്റി 158 പോയിന്റ് ഉയർന്ന് 21,755 ലെവലിൽ എത്തി. ഓപ്പണിംഗ് ബെൽ ട്രേഡ് സെഷനിൽ റിയൽറ്റി, മെറ്റൽ, ഐടി, ടെക് ഓഹരികൾ എന്നിവയാണ് പ്രധാന നേട്ടം കൈവരിച്ചത്.
പ്രധാന ഏഷ്യൻ വിപണികളിൽ ജാപ്പനീസ് നിക്കി ഇന്ന് 0.21 ശതമാനം ഇടിഞ്ഞു. ദക്ഷിണ കൊറിയൻ കോസ്പി 0.76 ശതമാനം ഉയർന്നു. ഹോങ്കോങ്ങിന്റെ ഹാംഗ് സെങ് 0.50 ശതമാനം ഉയർന്നപ്പോൾ ഷാങ്ഹായ് സൂചിക 0.51 ശതമാനം ഇടിഞ്ഞു. വാൾസ്ട്രീറ്റിൽ ഇന്നലെ ഡോവ് ജോൺസ് 0.50 ശതമാനവും നാസ്ഡാക്ക് 0.73 ശതമാനവും സ്മോൾകാപ്പ് 2000 0.90 ശതമാനവും എസ് ആന്റ് പി 500 0.34 ശതമാനവും ഇടിഞ്ഞു.
നിഫ്റ്റി 10,800ന് മുകളിൽ, സെൻസെക്സിൽ നേട്ടം; ബാങ്ക് ഓഹരികൾക്ക് കനത്ത ഇടിവ്
ടാറ്റ സ്റ്റീലിന്റെ നേതൃത്വത്തിൽ മെറ്റൽ സൂചിക ഒരു ശതമാനത്തിലധികം നേട്ടമുണ്ടാക്കിയപ്പോൾ എച്ച്സിഎൽ ടെക്, റിലയൻസ് ഇൻഡസ്ട്രീസ്, ഇൻഫോസിസ് എന്നിവയാണ് ഏറ്റവും സജീവമായ മറ്റ് ഓഹരികൾ. ഐടി കമ്പനിയായ എച്ച്സിഎൽ ടെക്നോളജീസ് ജൂൺ പാദത്തിൽ 7.3 ശതമാനം ഇടിവ് രേഖപ്പെടുത്തി. മാർച്ച് പാദത്തിൽ കമ്പനിയുടെ ലാഭം 3,154 കോടി രൂപയായിരുന്നു.
പ്രവർത്തനങ്ങളിൽ നിന്നുള്ള വരുമാനം 4 ശതമാനം ഇടിഞ്ഞ് 17,841 കോടി രൂപയായി. മുൻ പാദത്തിൽ 18,590 കോടി രൂപയായിരുന്നു വരുമാനം. കമ്പനിയുടെ ഡോളർ വരുമാനം 7.4 ശതമാനം ഇടിഞ്ഞ് 2,356 മില്യൺ ഡോളറിലെത്തി.