ഓഹരി വിപണി ഇന്ന് നേരിയ നേട്ടത്തിൽ, ഫിനാൻസ്, മെറ്റൽ, ഓട്ടോ ഓഹരികൾ മുന്നേറി

ഇന്ത്യൻ ബെഞ്ച്മാർക്ക് ഇക്വിറ്റി സൂചികകളായ സെൻസെക്സ്, നിഫ്റ്റി എന്നിവ വെള്ളിയാഴ്ച നേരിയ നേട്ടത്തിൽ അവസാനിച്ചു. ബാങ്ക്, മെറ്റൽ, ഓട്ടോ, എഫ്എംസിജി ഓഹരികളിലെ നേട്ടമാണ് വിപണിയ്ക്ക് തുണയായത്. ബി‌എസ്‌ഇ സെൻസെക്സ് 15.52 പോയിൻറ് അഥവാ 0.04 ശതമാനം ഉയർന്ന് 38,040.57 ൽ എത്തി. നിഫ്റ്റി 13.90 പോയിൻറ് അഥവാ 0.12 ശതമാനം ഉയർന്ന് 11,214.05 ലെത്തി. നിഫ്റ്റി ബാങ്ക് 111 പോയിൻറ് അഥവാ 0.51 ശതമാനം ഉയർന്ന് 21,754 ലെത്തി.

നിഫ്റ്റി സ്‌മോൾകാപ്പ്, നിഫ്റ്റി മിഡ്‌കാപ്പ് സൂചികകൾ ഒരു ശതമാനം വീതം നേട്ടം കൈവരിച്ചു. ഈ ആഴ്ചയിൽ സെൻസെക്സ് 1.2 ശതമാനവും നിഫ്റ്റി 1.3 ശതമാനവും ഉയർന്നു. നിഫ്റ്റി ബാങ്ക് സൂചിക 0.5 ശതമാനവും നിഫ്റ്റി മിഡ്‌ക്യാപ് സൂചിക 4.1 ശതമാനവും ഉയ‍‍ർന്നു. മേഖല സൂചികകളിൽ നിഫ്റ്റി പി‌എസ്‌യു ബാങ്ക് ഏറ്റവും കൂടുതൽ നേട്ടമുണ്ടാക്കി. നിഫ്റ്റി മെറ്റൽസ്, നിഫ്റ്റി ഓട്ടോ, നിഫ്റ്റി എഫ്എം‌സിജി എന്നിവയും മികച്ച പ്രകടനം കാഴ്ച്ച വച്ചു.

ഓഹരി വിപണി ഇന്ന് നേരിയ നേട്ടത്തിൽ, ഫിനാൻസ്, മെറ്റൽ, ഓട്ടോ ഓഹരികൾ മുന്നേറി

ഏഷ്യൻ പെയിന്റ്സ്, ബജാജ് ഫിനാൻസ്, യു‌പി‌എൽ, ബജാജ് ഫിൻ‌സെർവ്, ഇൻ‌ഡസ് ഇൻ‌ഡ് ബാങ്ക് എന്നിവ നിഫ്റ്റിയിൽ നേട്ടമുണ്ടാക്കിയപ്പോൾ ടൈറ്റൻ കമ്പനി, എച്ച്സി‌എൽ ടെക്നോളജീസ്, ഇൻ‌ഫോസിസ്, സൺ ഫാർമസ്യൂട്ടിക്കൽ ഇൻഡസ്ട്രീസ്, എം ആൻഡ് എം എന്നിവയ്ക്കാണ് ഏറ്റവും കൂടുതൽ നഷ്ടം നേരിട്ടത്.

2021 ഏപ്രിൽ മുതൽ ജൂൺ വരെയുള്ള പാദത്തിൽ 97 ശതമാനം ഇടിവ് രേഖപ്പെടുത്തിയതിനെ തുട‍‍ർന്ന് മഹീന്ദ്ര ആൻഡ് മഹീന്ദ്ര ഓഹരികൾ ഒരു ശതമാനം ഇടിവ് രേഖപ്പെടുത്തി. കമ്പനിയുടെ വരുമാനം 67.8 കോടി രൂപയായി ചുരുങ്ങി. കഴിഞ്ഞ സാമ്പത്തിക വർഷം ഇതേ കാലയളവിൽ ഇത് 2,259.74 കോടി രൂപയായിരുന്നു. ലുപിൻ ഓഹരികൾ ഇന്ന് അഞ്ച് ശതമാനം കുറഞ്ഞു. കമ്പനിയുടെ മൊത്തം അറ്റാദായത്തിൽ 65 ശതമാനം ഇടിവ് രേഖപ്പെടുത്തിയതിനെ തുട‍ർന്നാണിത്.