കാളക്കൂറ്റന്‍ വിളയാടി; റെക്കോര്‍ഡിട്ട് നിഫ്റ്റി ക്ലോസ് ചെയ്തു — റിലയന്‍സാണ് താരം

മുംബൈ: കാളക്കൂറ്റന്റെ വിളയാട്ടമായിരുന്നു ഇന്ന് വിപണിയില്‍. ജൂണ്‍ എഫ് ആന്‍ഡ് ഓ സീരീസിലെ (ഫ്യൂച്ചേഴ്‌സ് ആന്‍ഡ് ഓപ്ഷന്‍സ്) ആദ്യദിനം സെന്‍സെക്‌സും നിഫ്റ്റിയും തകര്‍ത്തു. പ്രതിദിന കോവിഡ് കേസുകളിലെ കുറവും രാജ്യതലസ്ഥാനമായ ദില്ലിയില്‍ ലോക്ക്ഡൗണ്‍ നിയന്ത്രണങ്ങള്‍ പിന്‍വലിക്കുന്നതും ഇന്ന് നിക്ഷേപകരുടെ ആത്മവിശ്വാസം കൂട്ടി. ബൈഡന്‍ സര്‍ക്കാര്‍ 6 ലക്ഷം കോടി ഡോളറിന്റെ സാമ്പത്തിക ഉത്തേജന പാക്കേജ് പ്രഖ്യാപിച്ചതും ഇന്ത്യന്‍ വിപണിയുടെ കുതിപ്പിന് വേഗം പകര്‍ന്നു.

ദേശീയ സ്റ്റോക്ക് എക്‌സ്‌ചേഞ്ചില്‍ നിഫ്റ്റി സൂചിക 15,469.6 എന്ന പുതുറെക്കോര്‍ഡാണ് വെള്ളിയാഴ്ച്ച കുറിച്ചത്. ഇന്നത്തെ വ്യാപാരത്തിനിടെ സെന്‍സെക്‌സ് 51,529 പോയിന്റ് വരെയും ഉയരുകയുണ്ടായി. അവസാനമണി മുഴങ്ങുമ്പോള്‍ സെന്‍സെക്‌സ് 308 പോയിന്റ് സമ്പാദിച്ച് 51,423 എന്ന നില രേഖപ്പെടുത്തി (0.6 ശതമാനം നേട്ടം). നിഫ്റ്റി ഫിഫ്റ്റി 98 പോയിന്റ് കൂട്ടിച്ചേര്‍ത്ത് 15,436 എന്ന നിലയിലും ഇടപാടുകള്‍ക്ക് തിരശ്ശീലയിട്ടു (0.64 ശതമാനം നേട്ടം).

റിലയന്‍സ് ഇന്‍ഡസ്ട്രീസാണ് ഇന്ന് ഇരു സൂചികകളിലും കാര്യമായ സംഭാവന നടത്തിയത്. കഴിഞ്ഞ രണ്ടു മാസത്തിനിടെയുള്ള ഏറ്റവും മികച്ച ഏകദിന മുന്നേറ്റം റിലയന്‍സ് ഓഹരികള്‍ വെള്ളിയാഴ്ച്ച കാഴ്ച്ചവെച്ചു. ബോംബെ സ്‌റ്റോക്ക് എക്‌സ്‌ചേഞ്ചില്‍ 5.9 ശതമാനം നേട്ടത്തില്‍ ദിനം പൂര്‍ത്തിയാക്കിയ റിലയന്‍സ് ഫണ്ടമെന്റല്‍ തലത്തിലും ടെക്‌നിക്കല്‍ തലത്തിലും ദൃഢത പുലര്‍ത്തുന്നു. പ്രമുഖ ബ്രോക്കറേജ് സ്ഥാപനമായ ജെഫറീസ് 'ബൈ' റേറ്റിങ്ങാണ് റിലയന്‍സിന് കല്‍പ്പിച്ചിട്ടുള്ളത്. ടാര്‍ഗറ്റാകട്ടെ, പ്രതി ഓഹരിക്ക് 2,580 രൂപയും.

ഗ്രാസിം, അദാനി പോര്‍ട്‌സ്, മഹീന്ദ്ര ആന്‍ഡ് മഹീന്ദ്ര, ഐഷര്‍ മോട്ടോര്‍സ്, കോള്‍ ഇന്ത്യ, എച്ച്ഡിഎഫ്‌സി, കൊട്ടാക്ക് മഹീന്ദ്ര ബാങ്ക്, ഇന്‍ഡസ്ഇന്‍ഡ് ബാങ്ക് ഓഹരികളും ഇന്ന് നേട്ടക്കാരുടെ പട്ടികയില്‍ ഇടംപിടിച്ചു. 1 മുതല്‍ 3 ശതമാനം വരെ നേട്ടം ഈ ഓഹരികളില്‍ കാണാം. മറുഭാഗത്ത് സണ്‍ ഫാര്‍മ, ഐസിഐസിഐ ബാങ്ക്, ബജാജ് ഫിന്‍സെര്‍വ്, എന്‍ടിപിസി, പവര്‍ഗ്രിഡ്, ശ്രീ സിമന്റ്, നെസ്‌ലെ ഇന്ത്യ ഓഹരികള്‍ 4.5 ശതമാനം വരെ തകര്‍ച്ചയുമായി പിന്നില്‍പ്പോയി.

ബെഞ്ച്മാര്‍ക്ക് സൂചികകള്‍ മുന്നേറിയെങ്കിലും വിശാല വിപണികളില്‍ ലാഭമെടുപ്പ് വിനയായി. ചുവപ്പിലാണ് ബിഎസ്ഇ മിഡ്ക്യാപും സ്‌മോള്‍ക്യാപും ഇടപാടുകള്‍ നിര്‍ത്തിയത്. ഇന്ന് ബിഎസ്ഇ മിഡ്ക്യാപ് 0.12 ശതമാനവും സ്‌മോള്‍ക്യാപ് 0.48 ശതമാനവും താഴോട്ടുപോയി. വ്യവസായങ്ങള്‍ അടിസ്ഥാനപ്പെടുത്തിയുള്ള വില സൂചികകളില്‍ നിഫ്റ്റി പൊതുമേഖലാ ബാങ്കാണ് ചൊവാഴ്ച്ച തിളങ്ങിയത്. 0.7 ശതമാനം നേട്ടം സൂചികയില്‍ കാണാം. നിഫ്റ്റി സ്വകാര്യ ബാങ്ക് 0.3 ശതമാനവും മുന്നേറി. മറുഭാഗത്ത് നിഫ്റ്റി ഫാര്‍മ 1.2 ശതമാനം തകര്‍ച്ച രേഖപ്പെടുത്തിയിട്ടുണ്ട്.