വെള്ളിയാഴ്ച്ച ഓഹരി വിപണി വലിയ ചലനങ്ങളില്ലാതെ ഉണര്ന്നു. രാവിലെ സമയം 9.19 -ന് ബിഎസ്ഇ സെന്സെക്സ് സൂചിക 99 പോയിന്റ് മുന്നേറി 51,630.37 പോയിന്റ് രേഖപ്പെടുത്തി (0.19 ശതമാനം നേട്ടം). എന്എസ്ഇ നിഫ്റ്റി ഫിഫ്റ്റി സൂചികയാകട്ടെ, 19 പോയിന്റ് കയറി 15,192.25 എന്ന നിലയിലും ഇടപാടുകള്ക്ക് തുടക്കമിട്ടു (0.12 ശതമാനം). ഐടി ഓഹരികളിലെ കുതിപ്പാണ് വെള്ളിയാഴ്ച്ച ഓഹരി വിപണിക്ക് കരുത്തു പകരുന്നത്. ഐടി ഓഹരികളുടെ ചിത്രം വെളിപ്പെടുത്തുന്ന എന്എസ്ഇ ഉപസൂചിക 'നിഫ്റ്റി ഐടി' 1.10 ശതമാനം മുന്നേറ്റം രാവിലെ കാഴ്ച്ചവെക്കുന്നുണ്ട്. ബാങ്ക് ഓഹരികളും ഭേദപ്പെട്ട നിലയിലാണ് വ്യാപാരം നടത്തുന്നത്.
നിഫ്റ്റി സൂചികയില് വിപ്രോയാണ് നേട്ടക്കാരില് മുന്നില്. വിപ്രോ ഓഹരികള് 2.15 ശതമാനം നേട്ടം കുറിക്കുന്നു. ഇന്ഫോസിസ്, എച്ച്സിഎല് ടെക്നോളജീസ് ഓഹരികളും ചിത്രം മോശമാക്കന്നില്ല. 1.61 ശതമാനം മുന്നേറ്റമുണ്ട് ഇന്ഫോസിസ് ഓഹരികളില്. എച്ച്സിഎല് ടെക്ക് ഓഹരികളില് 0.80 ശതമാനവും നേട്ടം കാണാം. ഇവര്ക്ക് പിറകില് ടെക്ക് മഹീന്ദ്ര, എച്ച്ഡിഎഫ്സി ബാങ്ക്, ഗ്രാസിം, ടിസിഎസ്, ബ്രിട്ടാണിയ, ബജാജ് ഫൈനാന്സ്, ഐസിഐസിഐ ബാങ്ക്, ഐഷര് മോട്ടോര്സ്, ടൈറ്റന് കമ്പനി എന്നിവരും നേട്ടക്കാരുടെ പട്ടികയില് കടന്നുകയറി.
നഷ്ടം നേരിടുന്നവരുടെ കാര്യമെടുത്താല് ഐടിസിയാണ് ഏറ്റവും മുന്നില്. സിഗരറ്റ് നിര്മാതാക്കളായ ഐടിസി 2.74 ശതമാനം തകര്ച്ചയിലാണ് ഇടപാടുകള് നടത്തുന്നത്. ഡിസംബര് പാദത്തിലെ സാമ്പത്തിക ഫലമാണ് ഐടിസിക്ക് വിനയാവുന്നത്. ഒക്ടോബര് - ഡിസംബര് കാലയളവില് 11 ശതമാനം ഇടിവ് അറ്റാദായത്തില് കമ്പനി നേരിട്ടു. 3,587 കോടി രൂപയാണ് കഴിഞ്ഞ ത്രൈമാസപാദം ഐടിസി കണ്ടെത്തിയത്. കൃത്യം ഒരു വര്ഷം മുന്പ് അറ്റാദായം 4,050.40 കോടി രൂപയായിരുന്നു. എന്തായാലും ഐടിസിയുടെ പ്രവര്ത്തന വരുമാനം കൂടിയെന്ന കാര്യം അല്പ്പം ആശ്വാസമേകുന്നുണ്ട്. കഴിഞ്ഞ പാദത്തില് 14,124 കോടി രൂപയാണ് പ്രവര്ത്തനങ്ങളില് നിന്നും ഐടിസി വരുമാനം കുറിച്ചത്. വര്ധനവ് 6 ശതമാനം.