മുംബൈ: തിങ്കളാഴ്ച്ച ഓഹരി വിപണിയില് പുത്തനുണര്വ്. ഏഷ്യന് സൂചികകളുടെ കുതിപ്പ് മുന്നിര്ത്തി ഇന്ത്യന് സൂചികകളും റെക്കോര്ഡ് ഉയര്ച്ചയിലാണ് വ്യാപാരം തുടങ്ങിയിരിക്കുന്നത്. ബിഎസ്ഇ സെന്സെക്സ് സൂചിക 427 പോയിന്റ് മുന്നേറി 51,971 എന്ന നിലയിലെത്തി. എന്എസ്ഇ നിഫ്റ്റി സൂചിക 129 പോയിന്റ് ചാടി 15,292 എന്ന നിലയിലും ഇടപാടുകള്ക്ക് തുടക്കമിട്ടു.
ചരിത്രത്തില് ആദ്യമായി സെന്സെക്സ് 52,000 മാര്ക്ക് പിന്നിടുന്നതിനും വിപണി ഇന്ന് സാക്ഷിയായിട്ടുണ്ട്. എന്ടിപിസി (1.77 ശതമാനം), ഭാരതി എയര്ടെല് (1.44 ശതമാനം), എച്ച്സിഎല് ടെക്നോളജീസ് (1.30 ശതമാനം), ആക്സിസ് ബാങ്ക് (1.27 ശതമാനം) അള്ട്രാ സിമന്റ് (1.22 ശതമാനം), ഐടിസി (1.17 ശതമാനം) ഓഹരികളാണ് രാവിലെ സെന്സെക്സില് മുന്നേറി നില്ക്കുന്നത്. തിങ്കളാഴ്ച്ച ഏഷ്യന് ഓഹരികളും റെക്കോര്ഡ് മുന്നേറ്റം കാഴ്ച്ചവെക്കുന്നുണ്ട്.
ആഗോള തലത്തില് കോവിഡ് വാക്സിന് വിതരണം ചെയ്യപ്പെടുന്നതും സമ്പദ്ഘടനകള് തിരിച്ചുവരുന്നതും ഏഷ്യന് ഓഹരികളുടെ ഉയര്ച്ചയ്ക്ക് കാരണമാവുന്നു. രാവിലെ ടോക്കിയോ ഓഹരി വില സൂചിക 0.7 ശതമാനവും ജപ്പാന്റെ നിക്കെയ് സൂചിക 1.2 ശതമാനവും മുന്നേറി. കൊറിയന് സൂചികയായ കോസ്പി 1.5 ശതമാനം ഉയര്ന്നിട്ടുണ്ട്. ഓസ്ട്രേലിയയുടെ എഎസ്എക്സ് 200 സൂചിക 0.9 ശതമാനവും സിംഗപ്പൂരിലെ എസ്ജിഎക്സ് നിഫ്റ്റി സൂചിക 0.62 ശതമാനവും നേട്ടത്തില് തുടരുന്നു.
ആഗോള വിപണിയില് കാര്യമായ സംഭവവികാസങ്ങള് നടക്കാതിരുന്നതുകൊണ്ട് വെള്ളിയാഴ്ച്ച 'ബഹളമില്ലാതെയാണ്' സെന്സെക്സ്, നിഫ്റ്റി സൂചികകള് വ്യാപാരം പൂര്ത്തിയാക്കിയത്. ഒരു ഘട്ടത്തില് 30 കമ്പനികളുടെ ഓഹരികളുള്ള സെന്സെക്സ് 543.96 പോയിന്റ് മുന്നേറിയിരുന്നു. എന്നാല് അവസാന മണി മുഴങ്ങുമ്പോള് 12.78 പോയിന്റ് വര്ധനവ് മാത്രമാണ് സെന്സെക്സില് കണ്ടത്. 51,544.30 എന്ന നിലയിലാണ് സെന്സെക്സിന്റെ വെള്ളിയാഴ്ച്ചത്തെ ക്ലോസിങ്ങും.
മറുഭാഗത്ത് വിശാല എന്എസ്ഇ നിഫ്റ്റി സൂചിക 10 പോയിന്റ് ഇടറി 15,163.30 എന്ന നിലയില് തിരശ്ശീലയിട്ടു. കഴിഞ്ഞ ആഴ്ചയിലെ പൂര്ണ ചിത്രം അടിസ്ഥാനപ്പെടുത്തിയാല് സെന്സെക്സ് 812.67 പോയിന്റും (1.60 ശതമാനം നേട്ടം) നിഫ്റ്റി 239.05 പോയിന്റും (1.60 ശതമാനം നേട്ടം) കുതിപ്പ് രേഖപ്പെടുത്തി.
വെള്ളിയാഴ്ച്ച എസ് ആന്ഡ് പി 500, നാസ്ദാഖ് സൂചികകള് റെക്കോര്ഡ് ഉയര്ച്ചയിലാണ് അമേരിക്കയിലെ ഇടപാടുകള് പൂര്ത്തിയാക്കിയത്. ഊര്ജ്ജ, സാമ്പത്തിക ഓഹരികള് വാങ്ങാന് നിക്ഷേപകര് തിടുക്കം കാട്ടിയത് അമേരിക്കന് സൂചികകള്ക്ക് കരുത്തേകി. ഡൗ ജോണ്സ് വ്യാവസായിക ശരാശരി സൂചിക 0.09 ശതമാനവും എസ് ആന്ഡ് പി 500 സൂചിക 0.47 ശതമാനവുമാണ് വര്ധിച്ചത്. നാസ്ദാഖ് കോമ്പോസൈറ്റ് സൂചിക 0.5 ശതമാനം മുന്നേറ്റവും കുറിച്ചു.