ഓഹരി വിപണിയിൽ ഇന്ന്: ഓട്ടോ ഓഹരികൾക്ക് കുതിപ്പ്

യുഎസ് ഫെഡറൽ മീറ്റിംഗ് ഫലത്തിനായി കാത്തിരിക്കുന്ന ആഗോള, ആഭ്യന്തര നിക്ഷേപകരെ തുട‍ർന്ന് ഇന്ത്യൻ ഓഹരി വിപണി ഇന്ന് കാര്യമായ നേട്ടങ്ങളില്ലാതെ വ്യാപാരം ആരംഭിച്ചു. ഓപ്പണിംഗ് ബെല്ലിൽ എൻ‌എസ്‌ഇ നിഫ്റ്റി 11 പോയിന്റ് നേടി 11,533 മാർക്കിലെത്തി. ബി‌എസ്‌ഇ സെൻ‌സെക്സ് 49 പോയിൻറ് ഉയർന്ന് 39,094ലെത്തി. ബാങ്ക് നിഫ്റ്റി 30 പോയിന്റ് താഴ്ന്ന് 22,437 ലെവലിൽ എത്തി.

നേട്ടവും നഷ്ടവും

ലക്ഷ്മി വിലാസ് ബാങ്ക്, സ്റ്റെർലൈറ്റ് ടെക്നോളജീസ്, അദാനി എന്റർപ്രൈസസ്, ആദിത്യ ബിർള ഫാഷൻ, അപ്പോളോ ഹോസ്പിറ്റൽസ്, അരബിന്ദോ ഫാർമ, ബയോകോൺ, ഇന്ത്യാബുൾസ് ഹൗസിംഗ് ഫിനാൻസ് എന്നിവയുടെ ഓഹരികൾ ഇന്ന് ഓപ്പണിംഗ് ബെല്ലിൽ മുൻ‌തൂക്കം നേടിയ ഓഹരികളിൽ ഉൾപ്പെടുന്നു. മെട്രോപോളിസ് ഹെൽത്ത് കെയർ, ഓറിയൻറ് ഇലക്ട്രിക്, മിൻഡ കോർപ്പറേഷൻ എന്നിവയ്ക്കാണ് അതിരാവിലെ നടന്ന വ്യാപാര സെഷനിൽ വലിയ നഷ്ടം നേരിട്ടത്.

ഓട്ടോ ഓഹരികൾ

ഓട്ടോ ഓഹരികൾ ഇന്ന് മികച്ച പ്രകടനം കാഴ്ച്ച വയ്ക്കുന്നുണ്ട്. ടാറ്റാ മോട്ടോഴ്‌സിന്റെ ഓഹരി വില രാവിലെ 2.36 ശതമാനം ഉയ‍ർന്നു. മഹീന്ദ്ര ആൻഡ് മഹീന്ദ്ര ഓഹരികൾ 2.88 ശതമാനവും ടിവിഎസ് മോട്ടോർ ഓഹരികൾ 1.90 ശതമാനവും, മദർസൺ സുമി സിസ്റ്റംസ് ഓഹരി 1.61 ശതമാനവും, ഹീറോ മോട്ടോകോർപ്പ് ഓഹരികൾ 1.66 ശതമാനവും ഉയർന്നു. ബജാജാ ഓട്ടോ ഓഹരി വില 2.59 ശതമാനം ഉയർന്നു.

ഏഷ്യൻ - ആ​ഗോള വിപണികൾ

ഏഷ്യയിലെ പ്രധാന ഓഹരി സൂചികകളിൽ ജാപ്പനീസ് നിക്കി 225 0.17 ശതമാനവും ഹാംഗ് സെങ് 0.31 ശതമാനവും കോസ്പി 0.15 ശതമാനവും ഷാങ്ഹായ് സൂചിക 0.24 ശതമാനവും ഉയർന്നു. വാൾസ്ട്രീറ്റിൽ ഇന്നലെ ഡോവ് ജോൺസ് 0.01 ശതമാനവും നാസ്ഡാക്ക് 1.21 ശതമാനവും സ്മോൾ ക്യാപ് 2000 0.03 ശതമാനവും എസ് ആന്റ് പി 500 0.52 ശതമാനവും ഉയർന്നു.