മെറ്റല്‍, ധനകാര്യം, ഓട്ടോ ഓഹരികളില്‍ തിരിച്ചടി; സെന്‍സെക്‌സില്‍ 509 പോയിന്റ് നഷ്ടം; നിഫ്റ്റി 16,100-നും താഴെ

തുടര്‍ച്ചയായ രണ്ടാം ദിവസവും വിപണി നഷ്ടത്തില്‍. രാവിലെ ഏഷ്യന്‍ വിപണികളിലെ തകര്‍ച്ചയുടെ ചുവടുപിടിച്ച് നഷ്ടത്തോടെ ആഭ്യന്തര വിപണിയില്‍ പുനരാരംഭിച്ച വ്യാപാരം ഒരു ഘട്ടത്തിലും നേട്ടത്തിന്റെ പാതയിലേക്ക് മടങ്ങിയില്ല.

വ്യാപാരത്തിന്റെ ഏറിയപങ്കും ചെറിയ റേഞ്ചിനുള്ളിലായിരുന്നു. തുടര്‍ന്ന് ക്ലോസിങ് ഘട്ടത്തിലാണ് സൂചികകള്‍ കൂടുതല്‍ താഴ്ച്ചയിലേക്ക് വീണത്. ഒടുവില്‍ പ്രധാന സൂചികകളായ നിഫ്റ്റി 158 പോയിന്റ് നഷ്ടത്തില്‍ 16,058-ലും സെന്‍സെക്‌സ് 509 പോയിന്റ് ഇടിഞ്ഞ് 53,887-ലും ചൊവ്വാഴ്ചത്തെ വ്യാപാരം അവസാനിപ്പിച്ചു.

ഏതാനും ദിവസങ്ങളിലായി നിഫ്റ്റി സൂചിക 16,000 നിലവാരത്തിനും 16,275-നും ഇടയിലുള്ള ചെറിയ പരിധിക്കുള്ളില്‍ സ്ഥിരതയാര്‍ജിക്കുകയാണ്. തുടര്‍ന്ന് ഇന്നത്തെ വ്യാപാരത്തിനിടെ ഈ റേഞ്ചിന്റെ താഴ്ന്ന പരിധിയിലേക്ക് സമീപിക്കുകയാണ്. നാളത്തെ ക്ലോസിങ് അടിസ്ഥാനത്തില്‍ 16,000 നിലവാരം തകര്‍ക്കപ്പെടുന്നുമോ എന്നുള്ളത് നിര്‍ണായകമാകും. 16,000 നിലവാരം തകര്‍ക്കപ്പെട്ടാല്‍ സൂചിക വീണ്ടും ഹ്രസ്വകാല തിരുത്തല്‍ ഘട്ടത്തിലേക്ക് വീണ്ടും കടക്കും.

മാര്‍ക്കറ്റ് റിപ്പോര്‍ട്ട്

നാഷണല്‍ സ്റ്റോക്ക് എക്‌സ്‌ചേഞ്ചില്‍ ഇന്ന് ട്രേഡ് പൂര്‍ത്തിയാക്കപ്പെട്ട 2,140 ഓഹരികളില്‍ 700 എണ്ണം നേട്ടത്തോടെയും 1,130 ഓഹരികള്‍ നഷ്ടത്തോടെയും വ്യാപാരം അവസാനിപ്പിച്ചു. ഇതോടെ ആകെ ഓഹരികളിലെ മുന്നേറ്റവും ഇടിവ് നേരിട്ടതും തമ്മിലുള്ള അനുപാതമായ എഡി റേഷ്യോ 0.70 നിരക്കിലേക്ക് താഴ്ന്നു. കഴിഞ്ഞ ദിവസം എഡി അനുപാതം 1.80 നിരക്കിലായിരുന്നു. സൂചികകള്‍ നിര്‍ണായക സപ്പോര്‍ട്ട് തകര്‍ത്തപ്പോള്‍ ബുള്ളുകള്‍ക്കു മേല്‍ ബെയറുകള്‍ പിടിമുറുക്കുന്നതിന്റെ സൂചനയാണിത്.

അതേസമയം വിപണിയിലെ ചാഞ്ചാട്ടത്തിന്റെ തോത് വെളിവാക്കുന്ന വിക്സ് നിരക്കുകളില്‍ വലിയ മാറ്റമില്ലാതെ 18.55 നിലവാരത്തില്‍ തുടരുന്നത് ആശ്വാസമാണ്. ഇതിനിടെ എന്‍എസ്ഇയിലെ 15 ഓഹരി വിഭാഗം സൂചികകളില്‍ നിഫ്റ്റി റിയാല്‍റ്റി ഒഴികെ ബാക്കി 14 സൂചികകളും ഇന്ന് നഷ്ടത്തോടെയാണ് ക്ലോസ് ചെയ്തത്. നിഫ്റ്റി ബാങ്ക്, ഓട്ടോ, ഫിനാന്‍ഷ്യല്‍ സര്‍വീസസ്, എഫ്എംസിജി, ഐടി, മീഡിയ, മെറ്റല്‍, പ്രൈവറ്റ് ബാങ്ക്, ഫാര്‍മ വിഭാഗം ഓഹരി സൂചികകള്‍ ഒരു ശതമാനത്തോളം നഷ്ടം രേഖപ്പെടുത്തി.

എന്‍എസ്ഇയിലെ മിഡ് കാപ്, സ്മോള്‍ കാപ് വിഭാഗം സൂചികകളും ഇന്ന് തിരിച്ചടി നേരിട്ടു. യഥാക്രമം 0.85 %, 0.42 % വീതവും സൂചികകള്‍ നഷ്ടം കുറിച്ചു. ഇതിനിടെ ചൊവ്വാഴ്ച വ്യാപാരം പൂര്‍ത്തിയാക്കിയ 29 ഓഹരികള്‍ ഒരു വര്‍ഷ കാലയളവിലെ ഉയര്‍ന്ന നിലവാരത്തിലേക്ക് എത്തിച്ചേര്‍ന്നപ്പോള്‍ 15 ഓഹരികള്‍ താഴ്ന്ന നിലവാരവത്തിലേക്കും വീണു. അതേസമയം 102 ഓഹരികള്‍ അപ്പര്‍ സര്‍ക്യൂട്ടിലും 41 ഓഹരികള്‍ ലോവര്‍ സര്‍ക്യൂട്ടിലും ഇന്നത്തെ വ്യാപാരം പൂര്‍ത്തിയാക്കി.

നിഫ്റ്റി-50 സൂചികയില്‍ 6 ഓഹരികള്‍ നേട്ടത്തോടെയും 44 എണ്ണം നഷ്ടത്തിലും ചൊവ്വാഴ്ച വ്യാപാരം പൂര്‍ത്തിയാക്കി.

• നേട്ടം-: എന്‍ടിപിസി 1.42 %, കോള്‍ ഇന്ത്യ 0.23 %, ശ്രീ സിമന്റ്‌സ് 0.18 %, ഭാരതി എയര്‍ടെല്‍ 661.55 %, ബജാജ് ഫൈനാന്‍സ് 0.13 %, അദാനി പോര്‍ട്ട്‌സ് 0.12 % വീതവും മുന്നേറ്റം രേഖപ്പെടുത്തി.
• നഷ്ടം-: ഐഷര്‍ മോട്ടോര്‍സ് -3.34 %, ഹിന്‍ഡാല്‍കോ -2.78 %, ഇന്‍ഫോസിസ് -2.45 %, ബിപിസിഎല്‍ -2.33 %, ഗ്രാസിം -1.99 %, ടാറ്റ മോട്ടോര്‍സ് -1.99 % വീതവും ഇടിവ് നേരിട്ടു.