കുതിപ്പ് തുടർന്ന് ബാങ്ക് ഓഹരി, ഇപ്പോൾ വാങ്ങാൻ ബ്രോക്കറേജ് ശുപാർശ, ലാഭവിഹിതവും കിട്ടിയേക്കും

ഇന്ത്യയിലെ ഏറ്റവും വലിയ സ്വകാര്യ ബാങ്കാണ് എച്ച്ഡിഎഫ്സി ബാങ്ക്. ബാങ്ക് കഴിഞ്ഞ ദിവസം നടപ്പ് സാമ്പത്തിക വർഷത്തെ ആദ്യ ത്രൈമാസത്തിലെ ഫലങ്ങൾ പുറത്ത് വിട്ടിരുന്നു. അതിന് പിന്നാലെ തിങ്കളാഴ്ച എച്ച്ഡിഎഫ്സി ബാങ്ക് ഓഹരി മുകളിലേക്ക് ഉയർന്നു. അതുമാത്രമല്ല ബ്രോക്കറേജ് സ്ഥാപനങ്ങൾ ഓഹരിക്ക് ബൈ കോൾ നൽകുകയും ടാർഗറ്റ് വില ഉയർത്തുകയും ചെയ്തു. നമുക്ക് വിശദമായി പരിശോധിക്കാം.

പാദഫലം

ബാങ്കിന്‍റെ ലാഭം 12.2 ശതമാനം ഉയർന്ന് 18,155 കോടി രൂപയായി. ബാങ്കിന്‍റെ അറ്റ പലിശ വരുമാനം അവലോകന കാലയളവിൽ 5.4 ശതമാനം ഉയർന്ന് 31438 കോടി രൂപയായപ്പോൾ, അറ്റ പലിശ മാർജിൻ 3.46 ശതമാനത്തിൽ നിന്ന് 3.35 ശതമാനമായി താഴ്ന്നിട്ടുണ്ട്.

ഓഹരി വിപണിയിലെ പ്രകടനം

എൻഎസ്ഇയിൽ 1992 രൂപ നിലവാരത്തിലാണ് എച്ച്ഡിഎഫ്സി ബാങ്ക് ഓഹരിയുടെ വ്യാപാരം പുരോഗമിക്കുന്നത്. കഴിഞ്ഞ അഞ്ച് ദിവസത്തിനിടെ 0.42 ശതമാനവും ഒരുമാസത്തിനിടെ 2.24 ശതമാനവും ഓഹരി വില ഉയർന്നു. 2025-ൽ ഇതുവരെ 11.74 ശതമാനം മുന്നേറ്റമാണ് ബാങ്ക് ഓഹരി നേടിയത്. ഒരുവർഷത്തിനിടെ 21 ശതമാനം നേട്ടമുണ്ടാക്കാനും ഓഹരിക്ക് സാധിച്ചു. 2027 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില.

ഓഹരി വാങ്ങാൻ ശുപാർശ

ബ്രോക്കറേജ് സ്ഥാപനമായ നോമുറ, എച്ച്ഡിഎഫ്സി ബാങ്ക് ഓഹരിയിൽ ബുള്ളിഷാണ്. 2026-2028 സാമ്പത്തിക വർഷത്തിൽ ബാങ്ക് 1.7 ശതമാനം മുതൽ 1.9 ശതമാനം വരെ ആസ്തികളിൽ നിന്നുള്ള വരുമാനം (RoA) നൽകുമെന്നും 13 ശതമാനം മുതൽ 14.5 ശതമാനം വരെ ഇക്വിറ്റിയിൽ നിന്നുള്ള വരുമാനം (RoE) നൽകുമെന്നും നോമുറ പ്രതീക്ഷിക്കുന്നു. 2190 രൂപ ടാർഗെറ്റ് വിലയോടെ എച്ച്ഡിഎഫ്സി ബാങ്ക് ഓഹരി വാങ്ങാമെന്നാണ് ബ്രോക്കറേജ് ശുപാർശ ചെയ്യുന്നത്. നേരത്തെ ടാർഗെറ്റ് വില 2140 രൂപയായിരുന്നു.

2,270 രൂപ എന്ന വില ലക്ഷ്യത്തോടെ നുവാമയ്ക്കും എച്ച്ഡിഎഫ്സി ബാങ്ക് ഓഹരിയിൽ "വാങ്ങൽ" റേറ്റിംഗ് ഉണ്ട്. ബാങ്കിന്‍റെ ആസ്തി ഗുണനിലവാരത്തെ "ക്ലാസിൽ ഏറ്റവും മികച്ചത്" എന്നാണ് ബ്രോക്കറേജ് വിശേഷിപ്പിച്ചത്. ഓഹരിക്ക് 2,300 രൂപ എന്ന വില ലക്ഷ്യത്തോടെ ബാങ്ക് ഓഹരിയിൽ ബ്രോക്കറേജ് സ്ഥാപനമായ ബെർൺസ്റ്റൈൻ, ബൈ റേറ്റിംഗ് ആവർത്തിച്ചു. 2027 സാമ്പത്തിക വർഷത്തിൽ ബാങ്ക് തങ്ങളുടെ ബാലൻസ് ഷീറ്റ് ശരിയാക്കി ആരോഗ്യകരമായ വായ്പാ വളർച്ചയിലേക്ക് തിരിച്ചുവരാനുള്ള പാതയിലാണെന്ന് ബ്രോക്കറേജ് ചൂണ്ടിക്കാട്ടി.

എച്ച്ഡിഎഫ്സി ബാങ്ക് ഓഹരിയിൽ കവറേജുള്ള 49 വിശകലന വിദഗ്ധരിൽ 46 പേർക്ക് ഓഹരിയിൽ "വാങ്ങുക" എന്ന റേറ്റിംഗ് ഉണ്ട്.

ബോണസ് ഓഹരി

നിക്ഷേപകർക്ക് ബോണസ് ഓഹരി നൽകാൻ കഴിഞ്ഞ ദിവസം ചേർന്ന ബോർഡ് യോഗത്തിൽ എച്ച്ഡിഎഫ്സി ബാങ്ക് തീരുമാനിച്ചിരുന്നു. ഓഹരി ഉടമകൾക്ക് 1:1 എന്ന രീതിയിൽ ബോണസ് ഓഹരി നൽകും. എച്ച്ഡിഎഫ്സി ബാങ്ക് ആദ്യമായിട്ടാണ് നിക്ഷേപകർക്ക് ബോണസ് ഓഹരികൾ നൽകുന്നത്.

ബോണസ് ഓഹരികൾക്കു പുറമേ ഓഹരി ഉടമകൾക്ക് നടപ്പു സാമ്പത്തിക വർഷം ഓഹരിയൊന്നിന് 5 രൂപ പ്രത്യേക ഇടക്കാല ലാഭവിഹിതം നൽകുന്നതിനും ബോർഡ് തീരുമാനിച്ചു. റെക്കോർഡ് തിയതി ഓഗസ്റ്റ് 27 ആണ്. ഈ തിയതിയ്ക്ക് മുമ്പ് ഓഹരിയുടമകളായവർക്ക് ബോണസിന് അർഹതയുണ്ട്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.