സന്തോഷത്തിന്‍റെ വെള്ളിയാഴ്ച, ഓഹരി വിലയിൽ കുതിപ്പുമായി മോത്തിലാൽ ഓസ്വാൾ, കുതിപ്പിന്‍റെ കാരണം ഇതാണ്

കഴിഞ്ഞ കുറച്ച് ദിവസമായി ചുവപ്പിലവസാനിച്ച ഓഹരി വിപണി വെള്ളിയാഴ്ച പച്ച തൊട്ടാണ് വ്യാപാരം അവസാനിപ്പിച്ചത്. രാവിലെ വലിയ ഇടിവിലേക്ക് നീങ്ങിയെങ്കിലും ഉച്ചയ്ക്ക് ശേഷം മുന്നേറ്റത്തിലേക്ക് തിരിച്ചെത്തി. വാരാന്ത്യത്തിൽ വലിയ നേട്ടമുണ്ടാക്കിയ ഓഹരികളിലൊന്ന് മോത്തിലാൽ ഓസ്വാൾ ഫിനാൻഷ്യൽ സർവീസസ്. 7.16 ശതമാനത്തോളം മുന്നേറ്റം നടത്താൻ കമ്പനിക്ക് സാധിച്ചു. മുന്നേറ്റത്തിന് കാരണമെന്താണെന്ന് വിശദമായി നമുക്ക് പരിശോധിക്കാം.

ബോണസ് ഷെയർ നൽകാൻ മോത്തിലാൽ

ഏപ്രിൽ 26 ന് നടക്കുന്ന ബോർഡ് മീറ്റിംഗിൽ ബോണസ് ഷെയറുകൾ നൽകാനുള്ള നിർദ്ദേശം പരിഗണിക്കുമെന്ന് പ്രഖ്യാപിച്ചതിന് ശേഷമാണ് മോത്തിലാൽ ഓസ്വാൾ ഫിനാൻഷ്യൽ സർവീസസിൻ്റെ ഓഹരികൾ ഉയർന്നത്. ഏകദേശം 8 ശതമാനം നേട്ടമാണ് ആദ്യ പകുതിയിൽ തന്നെ ഓഹരി നേടിയത്. അതോടെ വില 52 ആഴ്ചയിലെ ഏറ്റവും ഉയർന്ന നിരക്കായ 2,269.50 രൂപയിലെത്തി.

ഉച്ചയോടെ എക്സ്ചേഞ്ചുകളിൽ ഏഴ് ലക്ഷം ഓഹരികൾ മാറി, ഒരു മാസത്തെ പ്രതിദിന ശരാശരിയായ രണ്ട് ലക്ഷത്തേക്കാൾ കുത്തനെ ഉയർന്നു. ബോണസ് ഷെയർ ഇഷ്യുവിന് പുറമെ, ബ്രോക്കറേജിൻ്റെ ക്യൂ4 ഫലങ്ങളും ബോർഡ് മീറ്റിംഗിൽ പരിഗണിക്കുന്നുണ്ട്.

ബോണസ് ഷെയറുകൾക്ക് അംഗീകാരം ലഭിച്ചാൽ ഓസ്വാൾ ഫിനാൻഷ്യൽ സർവീസസിന്‍റെ ചരിത്രത്തിലെ ആദ്യ ബോണസ് ഇഷ്യുവായിരിക്കും ഇത്. ഫെബ്രുവരിയിൽ കമ്പനി ഓഹരി ഒന്നിന് 14 രൂപ ലാഭവിഹിതം പ്രഖ്യാപിച്ചിരുന്നു. കഴിഞ്ഞ അഞ്ച് വർഷത്തിനിടെ കമ്പനി മൊത്തം 56 രൂപ ലാഭവിഹിതം നൽകി.

മൾട്ടിബാഗർ ഓഹരി

കഴിഞ്ഞ 5 ദിവസത്തിനിടെ ശരാശരി 9.40 ശതമാനത്തിന്‍റെ നേട്ടമാണ് ഓഹരി വിപണിയിൽ നിന്നും ഓസ്വാൾ ഫിനാൻഷ്യൽ സർവീസസ് നേടിയത്. ഒരു മാസത്തിനിടെ 41.37 ശതമാനം മുന്നേറ്റമുണ്ടാക്കാനും ഓഹരിക്ക് സാധിച്ചു. 127.84 ശതമാനത്തിന്‍റെ നേട്ടമാണ് ആറ് മാസത്തിനിടെ കമ്പനി നേടിയത്. ഒരു വർഷത്തിനിടെ 272 ശതമാനം ലാഭം നിക്ഷേപകർക്ക് നൽകി മൾട്ടിബാഗർ ഓഹരിയാകാനും ഓസ്വാൾ ഫിനാൻഷ്യൽ സർവീസസിന് സാധിച്ചു.

കഴിഞ്ഞ 2 വർഷങ്ങളിൽ ഓഹരി 152 ശതമാനം കുതിച്ചുയർന്നു, കഴിഞ്ഞ 3 വർഷങ്ങളിൽ 288 ശതമാനം ഉയർന്നു. കഴിഞ്ഞ 10 വർഷത്തിനിടെ മോത്തിലാൽ ഓസ്വാൾ ഫിനാൻഷ്യൽ സർവീസസ് സ്റ്റോക്ക് 2083 ശതമാനം ഉയർന്നു.

വരുമാനത്തിൽ വർധനവ്

ഡിസംബറിൽ അവസാനിച്ച പാദത്തിൽ കമ്പനിയുടെ ഏകീകൃത അറ്റാദായം കഴിഞ്ഞ വർഷം ഇതേ പാദത്തിലെ 226.45 കോടി രൂപയിൽ നിന്ന് 191.4 ശതമാനം ഉയർന്ന് 659.87 കോടി രൂപയായി. ഉയർന്ന വരുമാനവും കുറഞ്ഞ ചെലവും അതിൻ്റെ ലാഭം വർദ്ധിപ്പിക്കാൻ സഹായിച്ചു. പ്രവർത്തനങ്ങളിൽ നിന്നുള്ള വരുമാനം കഴിഞ്ഞ വർഷം ഇതേ പാദത്തിൽ പ്രഖ്യാപിച്ച 1075.52 കോടിയിൽ നിന്ന് 65.90% വർധിച്ച് 1784.31 കോടി രൂപയായി.

വൈവിധ്യമാർന്ന സാമ്പത്തിക സേവനം

1987 ലാണ് മോത്തിലാൽ ഓസ്വാൾ ഫിനാൻഷ്യൽ സർവീസസ് ലിമിറ്റഡ് സ്ഥാപിതമാകുന്നത്. അന്ന് ചെറിയ സബ് ബ്രോക്കിംഗ് യൂണിറ്റായി തുടങ്ങിയ കമ്പനി ഇന്ന് റീട്ടെയിൽ ബ്രോക്കിംഗും വിതരണവും, ഇൻസ്റ്റിറ്റ്യൂഷണൽ ബ്രോക്കിംഗ്, അസറ്റ് മാനേജ്‌മെൻ്റ്, ഇൻവെസ്റ്റ്‌മെൻ്റ് ബാങ്കിംഗ്, പ്രൈവറ്റ് ഇക്വിറ്റി, കമ്മോഡിറ്റി ബ്രോക്കിംഗ് തുടങ്ങിയ നിരവധി സാമ്പത്തിക ഉൽപ്പന്നങ്ങളും സേവനങ്ങളും വാഗ്ദാനം ചെയ്യുന്ന വൈവിധ്യമാർന്ന സാമ്പത്തിക സേവന സ്ഥാപനമായി വളർന്നു.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.