വെള്ളിയാഴ്ച നല്ല ദിവസം, 100 രൂപയിൽ താഴെ വിലയുള്ള 3 ഓഹരികൾ വാങ്ങാം, ശുപാർശ സുമീത് ബഗാഡിയയുടേത്

ഏപ്രിൽ 30 ബുധനാഴ്ച ഇന്ത്യയുടെ പ്രധാന ഓഹരി സൂചികകളായ സെൻസെക്സും നിഫ്റ്റി 50 ഉം നേരിയ തോതിൽ താഴ്ന്നാണ് വ്യാപാരം അവസാനിപ്പിച്ചത്. ബജാജ് ഗ്രൂപ്പ് ഓഹരികളിലെ ഇടിവും പാകിസ്ഥാനുമായുള്ള തുടർച്ചയായ സംഘർഷങ്ങളും വിപണിയുടെ വികാരത്തെ താഴേക്ക് വലിച്ചു. സെൻസെക്സ് 0.06 ശതമാനം അഥവാ 46 പോയിന്‍റ് ഇടിഞ്ഞ് 80,242.24 ൽ വ്യാപാരം അവസാനിപ്പിച്ചു. അതേസമയം, നിഫ്റ്റി 50 0.01 ശതമാനം നഷ്ടത്തോടെ 24,334.20 ൽ അവസാനിച്ചു. ബി‌എസ്‌ഇ മിഡ്‌ക്യാപ് സൂചിക 0.72% ഇടിഞ്ഞ് 42,883.72 ലും ബി‌എസ്‌ഇ സ്‌മോൾക്യാപ് സൂചിക 1.74% ഇടിഞ്ഞ് 47,400.31 ലും എത്തി.

വിപണി വിലയിരുത്തൽ

നിഫ്റ്റി 50 സൂചിക 24,050 മുതൽ 24,350 വരെയുള്ള ശ്രേണിയിലായതിനാൽ ഇന്ത്യൻ ഓഹരി വിപണിയിലെ വികാരം ഈ പരിധിക്കുള്ളിലാണെന്ന് ചോയ്‌സ് ബ്രോക്കിംഗിന്റെ എക്‌സിക്യൂട്ടീവ് ഡയറക്ടർ സുമീത് ബഗാഡിയ വിലയിരുത്തുന്നു. ഈ ശ്രേണിയുടെ ഇരുവശങ്ങളിലെയും തകർച്ചയെ അടിസ്ഥാനമാക്കി ബുള്ളിഷ് അല്ലെങ്കിൽ ബെയറിഷ് പ്രവണത അനുമാനിക്കാം. 2025 സീസൺ നാലാം പാദ ഫലങ്ങൾ സജീവമായതിനാൽ സാങ്കേതിക ചാർട്ടിൽ ശക്തമായി കാണപ്പെടുന്ന ഓഹരികളിൽ നിക്ഷേപം പരിഗണിക്കുകയും ചെയ്യാമെന്നാണ് ബഗാഡിയ പറയുന്നത്. പിൽ ഇറ്റാലിക്ക ലൈഫ്‌സ്റ്റൈൽ , ഡെൽറ്റ കോർപ്പ് , മദർസൺ സുമി വയറിംഗ് ഇന്ത്യ എന്നീ മൂന്ന് ഓഹരികളെ അദ്ദേഹം ശുപാർശ ചെയ്യുകയും ചെയ്യുന്നു.

1. പിൽ ഇറ്റാലിക്ക ലൈഫ്‌സ്റ്റൈൽ

1992-ൽ സ്ഥാപിതമായ പിൽ ഇറ്റാലിക്ക ലൈഫ്‌സ്റ്റൈൽ ലിമിറ്റഡ് പ്ലാസ്റ്റിക് മോൾഡഡ് ഫർണിച്ചറുകളും മറ്റ് വസ്തുക്കളും നിർമ്മിക്കുന്നു. 376 കോടി രൂപയാണ് വിപണി മൂലധനം. എൻഎസ്ഇയിൽ 2.24 ശതമാനം നേട്ടത്തോടെ 15.99 രൂപ എന്ന നിലയിലാണ് ബുധനാഴ്ച പിൽ ഇറ്റാലിക്ക, ഓഹരി വ്യാപാരം അവസാനിപ്പിച്ചത്. കഴിഞ്ഞ ഒരു മാസത്തിനിടെ 8.11 ശതമാനം നേട്ടമുണ്ടാക്കാൻ ഓഹരിക്ക് സാധിച്ചിട്ടുണ്ട്. 14.54 ശതമാനം വളർച്ചയാണ് 2025-ൽ ഇതുവരെ ഓഹരി നേടിയത്. 16.99 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില.

ടാർഗെറ്റ് വില

17.15 രൂപ ടാർഗെറ്റ് വിലയോടെ പിൽ ഇറ്റാലിക്ക ലൈഫ്‌സ്റ്റൈൽ ഓഹരി വാങ്ങാമെന്നാണ് സുമീത് ബഗാഡിയ പറയുന്നത്. 15.5 രൂപയിൽ സ്റ്റോപ്പ് ലോസ് നിലനിർത്തണമെന്നും അദ്ദേഹം ഓർമ്മിപ്പിച്ചു.

2. ഡെൽറ്റ കോർപ്പ്

ഇന്ത്യൻ സ്റ്റോക്ക് എക്സ്ചേഞ്ചുകളിൽ ലിസ്റ്റ് ചെയ്യപ്പെട്ടിട്ടുള്ള ഏക കാസിനോ ഗെയിമിങ് ഓഹിരയാണ് ഡെൽറ്റ കോർപ് ലിമിറ്റഡ്. 1990ൽ റിയൽ എസ്റ്റേറ്റ്, ടെക്സ്റ്റൈൽ മേഖലകളിലായിരുന്നു കമ്പനിയുടെ തുടക്കം. കാലക്രമേണ കാസിനോ ഗെയിമിങ്, ഓൺലൈൻ ഗെയിമിങ്, ഹോസ്പിറ്റാലിറ്റി തുടങ്ങിയ മേഖലകളിലേക്കും ബിസിനസ് വ്യാപിപ്പിച്ചു. എൻഎസ്ഇയിൽ 92.11 രൂപ എന്നതാണ് ഡെൽറ്റ കോർപ്പ് ഓഹരിയുടെ വില. കഴിഞ്ഞ ഒരു മാസത്തിനിടെ 7.08 ശതമാനം നേട്ടമുണ്ടാക്കാൻ ഓഹരിക്ക് സാധിച്ചു.

ടാർഗെറ്റ് വില

99 രൂപ ടാർഗെറ്റ് വിലയോടെ ഓഹരി വാങ്ങാമെന്നാണ് ശുപാർശ. 89.7 രൂപയാണ് സ്റ്റോപ്പ് ലോസ്.

3. മദർസൺ സുമി വയറിംഗ് ഇന്ത്യ

ഇന്ത്യയിലെ വയറിംഗ് ഹാര്‍നെസ് ബിസിനസില്‍ ശ്രദ്ധ കേന്ദ്രീകരിക്കുന്നു. ആഭ്യന്തര വാഹന വയറിംഗ് ഹാര്‍നെസ് വ്യവസായത്തില്‍ 40% വിപണി വിഹിതമുണ്ട്. മാതൃ കമ്പനിയായ സംവര്‍ദ്ധന മദര്‍സണ്‍ ഇന്റര്‍നാഷണല്‍ ലിമിറ്റഡില്‍ നിന്നു ഡിമെര്‍ജ് ചെയ്ത സ്ഥാപനം. എൻഎസ്ഇയിൽ 55.70 രൂപ എന്നതാണ് നിലവിലെ ഓഹരി വില. ഒരുമാസത്തിനിടെ 10 ശതമാനം നേട്ടമുണ്ടാക്കാൻ ഓഹരിക്ക് സാധിച്ചിട്ടുണ്ട്.

ടാർഗെറ്റ് വില

60 രൂപ ടാർഗെറ്റ് വിലയോടെ മദർസൺ സുമി വയറിംഗ് ഓഹരി വാങ്ങാമെന്നാണ് സുമീത് ബഗാഡിയ ശുപാർശ ചെയ്യുന്നത്. 53.6 രൂപയാണ് സ്റ്റോപ്പ് ലോസ്.

അറിയിപ്പ്:

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.