തകർന്ന് അടിഞ്ഞ് സ്വിഗ്ഗി, ഓഹരി വില 400 രൂപയിലും താഴെ, നിക്ഷേപകർ എന്ത് ചെയ്യണം..?

ഭക്ഷ്യ വിതരണ രംഗത്തെ പ്രമുഖരായ സ്വിഗ്ഗിയുടെ ഓഹരികൾ കഴിഞ്ഞ ഒരുവർഷത്തിനിടെ 16 ശതമാനം നഷ്ടമാണ് നേരിട്ടത്. ദുർബലമായ ത്രൈമാസ ഫലങ്ങളും വർദ്ധിച്ചുവരുന്ന ചിലവുകളും കാരണം നിക്ഷേപകർ ഓഹരിയെ കൈ വിടുകയാണ്. കഴിഞ്ഞ കുറച്ച് ദിവസങ്ങളിൽ തിരിച്ചുവരവിന്‍റെ സൂചനകൾ ഓഹരി കാണിച്ചെങ്കിലും വീണ്ടും താഴേക്ക് പോയി. എന്താണ് സ്വിഗ്ഗി ഓഹരിയുടെ ഭാവി, നിക്ഷേപകർ എന്താണ് ചെയ്യേണ്ടത്..... നമുക്ക് വിശദമായി പരിശോധിക്കാം.

ചിലവുകളിൽ വർദ്ധനവ്

2026 സാമ്പത്തിക വർഷത്തെ ആദ്യ പാദത്തിൽ സ്വിഗ്ഗി 1,197 കോടി രൂപയുടെ അറ്റനഷ്ടം റിപ്പോർട്ട് ചെയ്തു. മുൻ വർഷം ഇതേ കാലയളവിൽ ഇത് 611 കോടി രൂപയായിരുന്നു. വരുമാനം 54% വർദ്ധിച്ച് 4,961 കോടി രൂപയായി. എന്നാൽ മൊത്തം ചെലവുകൾ 60% വർദ്ധിച്ച് 6,244 കോടി രൂപയായി. ഡെലിവറി സംബന്ധമായ ചെലവുകൾ (1,313 കോടി രൂപ), പരസ്യ ചെലവുകൾ (1,036 കോടി രൂപ), ജീവനക്കാരുടെ ആനുകൂല്യങ്ങൾ, ക്വിക്ക് കൊമേഴ്‌സ് വിഭാഗത്തിലെ ലോജിസ്റ്റിക്സ് ചെലവുകൾ എന്നിവയാണ് ഇതിന് കാരണം.

ഓഹരി വിപണിയിലെ പ്രകടനം

വെള്ളിയാഴ്ച 3.9 ശതമാനം നഷ്ടത്തോടെ 382.95 രൂപ എന്നതാണ് സ്വിഗ്ഗിയുടെ ഓഹരി വില. കഴിഞ്ഞ അഞ്ച് ദിവത്തെ നഷ്ടം 1.02 ശതമാനമാണ്. ഒരുമാസത്തെ പ്രകടനം പരിശോധിച്ചാൽ നേരിയ നേട്ടമുണ്ടാക്കാൻ സ്വിഗ്ഗി ഓഹരിക്ക് സാധിച്ചിട്ടുണ്ട് എന്ന് കാണാം. 2025-ൽ ഇതുവരെ 29.3 ശതമാനം നഷ്ടമാണ് ഓഹരി നേരിട്ടത്. 617.30 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില. 297 രൂപയാണ് 52 ആഴ്ചയിലെ ഏറ്റവും താഴ്ന്ന ഓഹരി വില.

നിക്ഷേപകർ ഇപ്പോൾ എന്തുചെയ്യണം..?

സ്വിഗ്ഗി ഓഹരി ഏറ്റവും താഴ്ന്ന നിലകളിൽ നിന്ന് ഏകദേശം 20-26% വരെ ഉയർന്നിട്ടുണ്ടെന്നും നിലവിൽ 375 മുതൽ 430 രൂപ വരെയുള്ള കൺസോളിഡേഷൻ ശ്രേണിയിലാണ് വ്യാപാരം നടത്തുന്നതെന്നും എസ്എംസി ഗ്ലോബൽ സെക്യൂരിറ്റീസിലെ സീനിയർ റിസർച്ച് അനലിസ്റ്റ് (ടെക്‌നിക്കൽസ്) ഷിതിജ് ഗാന്ധി വിലയിരുത്തുന്നു. വീക്കിലി ചാർട്ടുകളിൽ ഓഹരി ഇപ്പോൾ 200 ദിവസത്തെ എക്‌സ്‌പോണൻഷ്യൽ മൂവിംഗ് ആവറേജ് (EMA) യിലേക്ക് അടുക്കുകയാണെന്നും അദ്ദേഹം കൂട്ടിച്ചേർത്തു. ഇത് 420 രൂപയ്ക്കും 425 രൂപയ്ക്കും ഇടയിലാണ്. ഈ ലെവലിനു മുകളിലുള്ള ഒരു സ്ഥിരമായ ബ്രേക്ക്ഔട്ട് 450-470 രൂപ സോണിലേക്ക് ഓഹരിയെ ഉയർത്തുമെന്നും അദ്ദേഹം കൂട്ടിച്ചേർത്തു. അതേസമയം ഈ പ്രതിരോധം തകർക്കുന്നതിൽ പരാജയപ്പെടുന്നതും 370 രൂപയ്ക്ക് താഴെയുള്ള സ്ലിപ്പും പുതിയ വിൽപ്പന സമ്മർദ്ദത്തിന് കാരണമാകുമെന്നും അദ്ദേഹം പറഞ്ഞു.

സ്വിഗ്ഗി നിലവിൽ 396 രൂപയിലാണ് വ്യാപാരം നടത്തുന്നത്. സ്ഥിരമായി ഉയർന്നതും താഴ്ന്നതുമായ നിരക്കുകൾ സൃഷ്ടിക്കുന്നു. ഇത് ശക്തമായ ഒരു അപ്‌ട്രെൻഡിനെ സൂചിപ്പിക്കുന്നു എന്നാണ് ചോയ്‌സ് ബ്രോക്കിംഗിലെ സീനിയർ ഇക്വിറ്റി റിസർച്ച് അനലിസ്റ്റ് മന്ദർ ഭോജനെ പറയുന്നത്. 20, 50, 100 എന്നീ പ്രധാന ഇഎംഎ-കളിൽ നിന്ന് ഓഹരി പിന്തുണ സ്വീകരിക്കുന്നുണ്ട്. ഓഹരി 400 രൂപയ്ക്ക് മുകളിൽ ക്ലോസ് ചെയ്ത് നിലനിർത്താൻ കഴിഞ്ഞാൽ, 440, 480 രൂപ ലെവലുകളിലേക്ക് റാലി നടത്താൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.