രാജ്യത്തെ പൗരന്മാർക്കായുള്ള സർക്കാർ അംഗീകൃത പെൻഷൻ പദ്ധതിയാണ് നാഷണൽ പെൻഷൻ സ്ക്രീം അഥവാ എൻപിഎസ്. സർക്കാർ ജീവനക്കാർക്ക് ഇത് നിർബന്ധമാണെങ്കിലും മറ്റുള്ളവർക്ക് വിശ്രമകാലത്തേക്കുള്ള ഒരു സാമ്പത്തിക മുൻ കരുതൽ എന്ന നിലയിൽ ആവശ്യമെങ്കിൽ ഈ പദ്ധതിയിൽ അംഗമാകാവുന്നതാണ്. 18 മുതൽ 80 വയസ്സുവരെയുള്ളവർക്ക് എൻപിഎസിന്റെ പ്രയോജനം ലഭിക്കും.
2020 ജൂലൈ 7-ലെ ഒരു ഗസറ്റ് വിജ്ഞാപനത്തിലൂടെ കേന്ദ്രസർക്കാർ നാഷണൽ പെൻഷൻ പദ്ധതി 'ടയർ-2 ടാക്സ് സേവർ സ്കീം 2020' അവതരിപ്പിച്ചു. ഈ സ്കീം പ്രകാരം, ഒരു സർക്കാർ ഉദ്യോഗസ്ഥൻ എൻപിഎസിന്റെ ടയർ-2 അക്കൗണ്ടിലേക്ക് സംഭാവന ചെയ്യുകയാണെങ്കിൽ, അവർക്ക് സെക്ഷൻ 80 സി പ്രകാരം 1.50 ലക്ഷം രൂപ വരെയുള്ള നിക്ഷേപത്തിന് നികുതി ആനുകൂല്യം ലഭിക്കും. ടയർ-2 അക്കൗണ്ടിലെ നിക്ഷേപത്തിന് 3 വർഷത്തെ ലോക്ക്-ഇൻ കാലയളവ് ഉണ്ടായിരിക്കും. ടയർ-2 ആക്റ്റീവായി നിലനിർത്തുന്നതിന് ആവശ്യമായ ഏറ്റവും കുറഞ്ഞ തുക 1000 രൂപയും തുടർന്നുള്ള ഏറ്റവും കുറഞ്ഞ സംഭാവന 250 രൂപയുമാണ്.
ടയർ 1, ടയർ 2 അക്കൗണ്ടുകൾ
ടയർ 1, ടയർ 2 എന്നിങ്ങനെ രണ്ട് തരം അക്കൗണ്ടുകളാണ് ഈ സ്കീമിലൂടെ വാഗ്ദാനം ചെയ്യുന്നത്. ടയർ 1 ഒരു പെൻഷൻ അക്കൗണ്ടാണ്, ടയർ 2 അക്കൗണ്ട് ഒരു വൊളണ്ടറി സേവിംഗ്സ് അക്കൗണ്ടുമാണ്. ടയർ 1 അക്കൗണ്ടുള്ള എൻപിഎസ് വരിക്കാർക്ക് ഓഫ്ലൈനായോ ഓൺലൈനായോ ഒരു ടയർ 2 അക്കൗണ്ട് തുറക്കാൻ കഴിയും. നിങ്ങൾ ഒരു എൻപിഎസ് അക്കൗണ്ട് തുറക്കുമ്പോൾ, ടയർ 1 അക്കൗണ്ട് സ്ഥിരസ്ഥിതിയായി തുറക്കുകയും ആദായ നികുതി സെക്ഷൻ പ്രകാരം ടയർ 1 നിക്ഷേപത്തിന് നികുതി ആനുകൂല്യം നേടുകയും ചെയ്യാം.
നികുതി ആനുകൂല്യം
സെക്ഷൻ 80 സി പ്രകാരം ലഭിക്കുന്ന ഒന്നര ലക്ഷം രൂപയ്ക്ക് പുറമെ 50,000 രൂപ വരെ അധികമായ കിഴിവും സെക്ഷൻ 80 സിസിഡി (1ബി) പ്രകാരം എൻപിഎസ് നൽകുന്നു. ഈ ആനുകൂല്യം ശമ്പളമുള്ളവർക്കും സ്വയംതൊഴിൽ ചെയ്യുന്നവർക്കും ബാധകമാണ്. ഇവയ്ക്കു പുറമെ തൊഴിലുടമയോ സർക്കാരോ അടയ്ക്കുന്ന വിഹിതം ശമ്പളത്തിന്റെ ഭാഗമായാണ് വരുന്നതെങ്കിൽ സെക്ഷൻ 80 സിസി(2) അനുസരിച്ച് 10 ശതമാനം കിഴിവ് കൂടുതലായും ജീവനക്കാർക്ക് ലഭിക്കുന്നു.