വായ്പ മൊറട്ടോറിയം കാലാവധി നീട്ടണമെന്ന ആവശ്യം, സുപ്രീം കോടതി വാദം ഒക്ടോബർ 5 ലേക്ക് മാറ്റി

വായ്പകൾ തിരിച്ചടയ്ക്കുന്നതിനുള്ള മൊറട്ടോറിയം കാലാവധി നീട്ടണമെന്നും കൊവിഡ് -19 മഹാമാരി കണക്കിലെടുത്ത് വായ്പ തുകയുടെ പലിശ ഒഴിവാക്കണമെന്നും ആവശ്യപ്പെട്ട രണ്ട് ഹർജികൾ സംബന്ധിച്ച വാദം കേൾക്കുന്നത് സുപ്രീംകോടതി ഒക്ടോബർ 5 ലേക്ക് മാറ്റി. പ്രശ്നങ്ങൾ സർക്കാരിന്റെ സജീവ പരിഗണനയിലാണെന്നും 2-3 ദിവസത്തിനുള്ളിൽ തീരുമാനമെടുക്കുമെന്നും സർക്കാരിനെ പ്രതിനിധീകരിച്ച് സോളിസിറ്റർ ജനറൽ കോടതിയെ അറിയിച്ചു.

വാദം നീട്ടി

റിസർവ് ബാങ്ക്, ഇന്ത്യാ സർക്കാർ, ബാങ്കുകൾ തുടങ്ങിയവർ എടുക്കുന്ന എല്ലാ തീരുമാനങ്ങളും പരിഗണനയ്ക്കായി സമർപ്പിക്കണമെന്ന് നിർദേശം നൽകി സുപ്രീം കോടതി സെപ്റ്റംബർ 10 ന് വാദം മാറ്റിവച്ചിരുന്നു. സത്യവാങ്മൂലം സമർപ്പിക്കാൻ കോടതി റിസർവ് ബാങ്കിന് സമയം നൽകിയിരുന്നു. ഓഗസ്റ്റ് 31 വരെ നിഷ്ക്രിയ ആസ്തി (എൻ‌പി‌എ) ആയി പ്രഖ്യാപിച്ചിട്ടില്ലാത്ത അക്കൗണ്ടുകൾ കേസ് തീർപ്പാക്കുന്നതുവരെ മോശം വായ്പയായി പ്രഖ്യാപിക്കരുതെന്ന് മുൻ ഹിയറിംഗുകളിൽ സുപ്രീംകോടതി വ്യക്തമാക്കിയിരുന്നു.

നിർദ്ദേശം

അഭിഭാഷകൻ വിശാൽ തിവാരി സമർപ്പിച്ച ഹർജി പരിഗണിച്ച കോടതി, അഭിഭാഷകർ / സേവന മേഖല, ഗതാഗതം, ടൂറിസ്റ്റ് വ്യവസായം, ഡ്രൈവർമാർ, ഈ മേഖലകൾക്ക് കീഴിലുള്ളവർക്കുള്ള മൊറട്ടോറിയം കാലാവധി നീട്ടിനൽകാൻ കോടതി വീണ്ടും തുറക്കുന്നതുവരെ എല്ലാ ബാങ്കുകളോടും നിർദ്ദേശം തേടിയിരുന്നു.

കൊറോണ പ്രതിസന്ധി

ഇന്ത്യയിൽ കൊവിഡ് മഹാമാരി എന്ന വിപത്ത് ഈ രാജ്യത്ത് നടക്കുന്ന ആരോഗ്യ ദുരന്തത്തോടൊപ്പം കടുത്ത സാമ്പത്തിക ബുദ്ധിമുട്ടും വരുത്തി വച്ചിട്ടുണ്ട്. വിവിധ സാഹചര്യങ്ങളിൽ നിരവധി വിവിധ ആളുകൾക്ക് ജോലി നഷ്‌ടപ്പെട്ടു. വിവിധ പ്രൊഫഷണലുകളും മറ്റുള്ളവരും യഥാർത്ഥ സാമ്പത്തിക ഞെരുക്കത്തിലൂടെ കടന്നുപോയിക്കൊണ്ടിരിക്കുകയാണെന്ന് അപേക്ഷയിൽ പറയുന്നു.

കേന്ദ്ര നിലപാട്

ചില നിബന്ധനകൾക്ക് വിധേയമായി വായ്പകൾ തിരിച്ചടയ്ക്കുന്നതിനുള്ള മൊറട്ടോറിയം രണ്ട് വർഷം വരെ നീട്ടാൻ കഴിയുമെന്നും സാമ്പത്തിക മാന്ദ്യം മൂലം ഏറ്റവും കൂടുതൽ ദുരിതത്തിലായ മേഖലകളെ തിരിച്ചറിയുകയാണെന്നും കേന്ദ്രവും റിസർവ് ബാങ്കും (ആർബിഐ) കോടതിയെ അറിയിച്ചു. മൊറട്ടോറിയം കാലയളവിൽ മാറ്റിവച്ച ഇഎംഐകൾക്കുള്ള പലിശ എഴുതിത്തള്ളൽ അടിസ്ഥാന ധനകാര്യ നിയമങ്ങൾക്ക് വിരുദ്ധമാണെന്നും കാലാവധിയനുസരിച്ച് വായ്പ തിരിച്ചടച്ചവരോട് കാണിക്കുന്ന അന്യായമാണെന്നും വാദിച്ചു.