എസ്‌ബി‌ഐയുടെ വിവിധ സേവിംസ് അക്കൗണ്ടുകൾ — അറിഞ്ഞിരിക്കണം ഇക്കാര്യങ്ങൾ

ഇന്ത്യയിലെ ഏറ്റവും വലിയ പൊതു മേഖല ബാങ്കായ സ്റ്റേറ്റ് ബാങ്ക് ഓഫ് ഇന്ത്യ ഉപഭോക്താക്കൾക്കായി വിവിധ തരം സേവിംഗ്‌സ് അക്കൗണ്ടുകൾ തുറക്കുന്നതിനുള്ള ഓപ്‌ഷൻ നൽകുന്നുണ്ട്. ഇതല്ലാതെ സാധാരണ സേവിംഗ്സ് അക്കൗണ്ടുകൾക്ക് പുറമെ, സ്ഥിര നിക്ഷേപം (എഫ്‌ഡി), റിക്കറിം​ഗ് ഡിപ്പോസിറ്റ് (ആർ‌ഡി), സാലറി അക്കൗണ്ട്, എസ്‌ബി‌ഐ സേവിംഗ്സ് പ്ലസ് അക്കൗണ്ട് തുടങ്ങിയ അക്കൗണ്ടുകളും ഉണ്ട്. ഉപഭോക്താക്കൾക്ക് അവരുടെ ആവശ്യാനുസരണം അക്കൗണ്ടുകൾ തിരഞ്ഞെടുക്കാവുന്നതാണ്.

എസ്‌ബി‌ഐ ഏതെല്ലാം സേവിംഗ്‌സ് അക്കൗണ്ടുകളാണ് നൽകുന്നത് :

ബേസിക് സേവിംഗ്‌സ് ബാങ്ക് അക്കൗണ്ട്

കെവൈസി ഡോക്യുമെന്റുകൾ നൽകികൊണ്ട് ആർക്കും ഈ സേവിംഗ്‌സ് അക്കൗണ്ട് തുറക്കാവുന്നതാണ്. ഇത് സാധാരണക്കാർക്കായുള്ളത് കൊണ്ടുതന്നെ മിനിമം ബാലൻസ് സൂക്ഷിക്കേണ്ട ആവശ്യമില്ല. എസ്‌ബിഐയുടെത് ഉൾപ്പെടെ എടിഎമ്മുകളിൽ നിന്ന് ഒരു മാസം പരമാവധി 4 തവണ മാത്രമേ ബേസിക് സേവിംഗ്സ് ബാങ്ക് അക്കൗണ്ടിൽ നിന്ന് സൗജന്യമായി പണം പിൻവലിക്കാൻ കഴിയൂ. അതിനുശേഷം നടത്തുന്ന ഓരോ പണമിടപാടിനും സർവീസ് ചാർജായി 15 രൂപയും ജിഎസ്ടിയും ഈടാക്കുന്നതാണ്.

സ്‌മോൾ അക്കൗണ്ട്

സാധുവായ കെവൈസി ഡോക്യുമെന്റുകൾ ഇല്ലാത്ത 18 വയസ്സിന് മുകളിലുള്ള ഏത് വ്യക്തികൾക്കും ഈ സേവിംഗ്സ് അക്കൗണ്ട് തുറക്കാം. മതിയായ കെവൈസി ഡോക്യുമെന്റുകൾ ഇല്ലാത്തതുകൊണ്ട് ഈ അക്കൗണ്ടിന് ചില നിയന്ത്രണങ്ങൾ ഉണ്ട്. ബാങ്ക് ആവശ്യപ്പെടുന്ന കൃത്യമായ കെവൈസി ഡോക്യുമെന്റുകൾ നൽകിയാൽ മാത്രമേ ഈ അക്കൗണ്ട് സാധാരണ സേവിംഗ്സ് അക്കൗണ്ടായി പരിഗണിക്കൂ. എസ്‌ബിഐയുടെത് ഉൾപ്പെടെയുള്ള എടിഎമ്മുകളിൽ നിന്ന് ഒരു മാസം പരമാവധി 4 തവണ മാത്രമേ സ്‌മോൾ അക്കൗണ്ട് ഉടമയ്‌ക്ക് സൗജന്യമായി പണം പിൻവലിക്കാൻ കഴിയൂ.

ഇൻസ്റ്റാ സേവിംഗ്സ് അക്കൗണ്ട്

18 വയസ്സിന് മുകളിലുള്ള, ഇന്ത്യയ്‌ക്ക് പുറത്ത് നികുതി ബാധ്യതകളില്ലാതെ താമസിക്കുന്ന ഇന്ത്യക്കാർക്ക് മാത്രമേ എസ്‌ബി‌ഐ ഇൻസ്റ്റാ സേവിംഗ്സ് അക്കൗണ്ട് തുറക്കാൻ അർഹതയുള്ളൂ. ഇതിൽ ഉപഭോക്താക്കൾ മിനിമം ബാലൻസ് നിലനിർത്തേണ്ടതുണ്ട്.

സ്പെഷ്യൽ സാലറി അക്കൗണ്ട്

കോർപ്പറേറ്റ് സ്ഥാപനങ്ങളിൽ ജോലിചെയ്യുന്നവർക്ക് ഉള്ളതാണ് ഈ അക്കൗണ്ട്. പ്രതിമാസ വേതനം കണക്കാക്കി ഈ അക്കൗണ്ടുകൾ പ്ലാറ്റിനം, ഡയമണ്ട്, ഗോൾഡ്, സിൽ‌വർ എന്നിങ്ങനെ നാലായി തിരിച്ചിട്ടുണ്ട്.

സേവിംഗ്സ് പ്ലസ് അക്കൗണ്ട്

മെട്രോ നഗരങ്ങളിൽ സേവിംഗ്സ് അക്കൗണ്ട് ഉള്ള ഒരാൾ പ്രതിമാസം ശരാശരി 3,000 രൂപ ബാലൻസ് നിലനിർത്തേണ്ടതുണ്ട്. ചെറിയ നഗരങ്ങളിൽ അല്ലെങ്കിൽ ഗ്രാമപ്രദേശങ്ങളിൽ ഉള്ള അക്കൗണ്ടുകളിൽ യഥാക്രമം 2000, 1000 എന്നിങ്ങനെ ബാലൻസ് നിലനിർത്തേണ്ടതുണ്ട്. അക്കൗണ്ടിൽ മിനിമം ബാലൻസ് നിലനിർത്തുന്നില്ലെങ്കിൽ ഉപഭോക്താവിൽ നിന്ന് ചാർജ് ഈടാക്കുന്നതാണ്. സേവിംഗ്സ് അക്കൗണ്ടിലെ ഒരു ലക്ഷത്തിന് മുകളിലുള്ള നിക്ഷേപത്തിന് പ്രതിവർഷം 3% പലിശ ലഭിക്കുന്നതാണ്.