ആശ്വാസം നൽകാതെ സ്വർണവില, ഇപ്പോൾ വാങ്ങുന്നത് ബുദ്ധിയാണോ, ഈ മാസം പവന് കൂടിയത് 2500 രൂപ

മലയാളികളെ സംബന്ധിച്ചിടത്തോളം സ്വർണമെന്നത് അവരുടെ ജീവിതത്തിന്‍റെ ഭാഗമാണ്. എല്ലാ ആഘോഷ വേളകളിലും സ്വർണത്തിന്‍റെ സാന്നിധ്യം കാണാൻ കഴിയും. അതുകൊണ്ടു തന്നെ സ്വർണവിലയിൽ മലയാളികൾ എന്നും പ്രത്യേക ശ്രദ്ധ പുലർത്താറുമുണ്ട്. കഴിഞ്ഞ കുറേ നാളുകളായി റോക്കറ്റ് പോലെ കുതിച്ചുയരുകയാണ് സ്വർണവില. പവന്‍റെ വില അരലക്ഷവും കടന്ന് ബഹുദൂരം മുന്നോട്ട് പോയി. വില കൂടിയത് വിൽപ്പനയെ ബാധിച്ചിട്ടുണ്ടെന്നാണ് ജ്വല്ലറി ഉടമകളും പറയുന്നത്.

ഇന്നത്തെ സ്വർണവില

സംസ്ഥാനത്ത് ഇന്ന് സ്വർണവില മാറ്റമില്ലാതെ തുടരുകയാണ്. ഇന്നലത്തെ വിലയായ 53,240 രൂപയിൽ തന്നെയാണ് ഇന്നത്തെയും വ്യാപാരം. ഗ്രാമിന് 6,655 രൂപ.

ഒരു പവൻ വാങ്ങാം 58,000 രൂപ നൽകണം

ഒരു പവൻ സ്വർണാഭരണം വാങ്ങുമ്പോൾ ഏകദേശം 58,000 രൂപയ്ക്ക് മുകളിൽ നൽകേണ്ടി വരും. കാരണം സ്വർണാഭരണം വാങ്ങുമ്പോൾ പവന്‍റെ വിലയ്ക്കൊപ്പം പണിക്കൂലിയും ജിഎസ്ടിയും നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടിയാൽ 1 പവൻ സ്വർണാഭരണം വാങ്ങുമ്പോൾ ഏകദേശം 58,000 രൂപയ്ക്ക് മുകളിൽ നൽകേണ്ടി വരും.

ഏപ്രിൽ മാസത്തെ വില

സ്വർണം ചരിത്രത്തിലെ തന്നെ ഏറ്റവും ഉയർന്ന വിലയിലേക്ക് കുതിച്ചുയർന്ന മാസമാണ് ഏപ്രിൽ. ഏപ്രിൽ 19- വെള്ളിയാഴ്ച രേഖപ്പെടുത്തിയ 54,520 രൂപയാണ് പവന്‍റെ ചരിത്രത്തിലെ ഏറ്റവും ഉയർന്ന വില. ഗ്രാമിന് 6815 രൂപയായിരുന്നു അന്ന് വില. ഏപ്രിൽ 20,21 തിയ്യതികളിലാണ് സംസ്ഥാനത്തെ രണ്ടാമത്തെ റെക്കോർഡ് ഉയരം സ്വർണ്ണവിലയിൽ രേഖപ്പെടുത്തിയിരിക്കുന്നത്. അന്ന് ഒരു പവൻ സ്വർണ്ണത്തിന് 54440 രൂപയും, ഗ്രാമിന് 6805 രൂപയുമായിരുന്നു വില. ഏപ്രിൽ ഒന്നിലെ വിലയുമായി താരത്യം ചെയ്യുമ്പോൾ ഇതുവരെ ഏകദേശം 2500 രൂപയാണ് വർധിച്ചത്.

ആഗോള സ്വർണവില

ആഗോള വിപണിയില്‍ സ്വര്‍ണം ഔണ്‍സിന് 0.20 ശതമാനം വില കുറഞ്ഞ് 2,328.39 ഡോളറിലാണ് സ്വര്‍ണ വ്യാപാരം പുരോഗമിക്കുന്നത്. 30 ദിവസത്തിനിടെ ആഗോള സ്വര്‍ണവിലയിലെ കയറ്റം 3.74% (84.21 ഡോളര്‍) ആണ്. ആറു മാസത്തിനിടെ ആഗോള സ്വര്‍ണവിലയില്‍ 17.61% (349.42 ഡോളര്‍) വര്‍ധനയുണ്ടായി. ആഗോള വിലമാറ്റങ്ങള്‍ ഡോളറിലായതിനാല്‍ തന്നെ നേരിയ ചലനങ്ങള്‍ പോലും പ്രാദേശിക വിലയില്‍ വലിയ സമ്മര്‍ദം സൃഷ്ടിക്കും. ഡോളര്‍- രൂപ വിനിമയ നിരക്കും ഇവിടെ പ്രധാനമാണ്.

അന്താരാഷ്ട്ര തലത്തിൽ ഏതെങ്കിലും തരത്തിൽ സംഘർഷങ്ങൾ ഉടലെടുത്താൻ സ്വർണവില വീണ്ടും കുതിപ്പിലേക്കെത്താനുള്ള സാധ്യതയുണ്ട്.

അഡ്വാൻസ് ബുക്കിം​ഗാണ് നല്ലത്

സ്വർണവിലയിലെ ചാഞ്ചാട്ടം തുടരുന്ന സാഹചര്യത്തിൽ വലിയ അളവിൽ സ്വർണം വാങ്ങാൻ ഉദ്ദേശിക്കുന്നവർ അഡ്വാൻസ് ബുക്കിം​ഗ് നടത്തുന്നതാണ് നല്ലത്. ഇന്നത്തെ കുറഞ്ഞ വിലയിൽ സ്വർണം ബുക്ക് ചെയ്യാനും ആവശ്യ വില ഉയർന്നാൽ കുറഞ്ഞ വിലയിൽ വാങ്ങാനും അഡ്വാൻസ് ബുക്കിം​ഗ് ഉപകരിക്കും. അതുവഴി സ്വർണവില ഉയരുമ്പോഴുള്ള സാമ്പത്തിക നഷ്ടം ഒഴിവാക്കാം.

വില തീരുമാനിക്കുന്നത് അസോസിയേഷൻ

കേരളത്തിലെ സ്വർണ്ണവില തീരുമാനിക്കുന്നത് ഓൾ കേരള ഗോൾഡ് ആൻഡ് സിൽവർ മർച്ചൻസ് അസോസിയേഷൻ ആണ്. ദിവസം രണ്ടു തവണ വരെ സ്വർണ്ണവില പുതുക്കി നിശ്ചയിക്കാൻ ഇവർക്ക് സാധിക്കും. ഓരോ ദിവസത്തെയും രൂപയുടെ വിനിമയ നിരക്ക്,അന്താരാഷ്ട്ര വിപണിയുമായി ബന്ധപ്പെട്ട ഇന്ത്യയുടെ 24 കാരറ്റ് സ്വർണ്ണത്തിന്റെ ബാങ്ക് നിരക്ക്, ഇതനുസരിച്ച് മുംബൈയിൽ ലഭ്യമാകുന്ന നിരക്കുകൾ ഡോളർ വില, ഈ ഘടകങ്ങളെല്ലാം അസോസിയേഷനുകൾ സ്വർണ്ണവില നിശ്ചയിക്കുന്നതിൽ കണക്കിലെടുക്കുന്നുണ്ട്.