കൂടുമാറ്റം ആ​ഗ്രഹിക്കുന്നുണ്ടോ; പ്രവാസം സുഖകരമാക്കാൻ ജോലിക്കായി ശ്രമിക്കേണ്ടത് ഈ 6 രാജ്യങ്ങളിൽ

തൊഴിലിനു വിദ്യാഭ്യാസത്തിനുമായി ഇന്ത്യയിൽ നിന്ന് വിദേശത്തേക്ക് പോകുന്നവരുടെ എണ്ണം കൂടിവരുന്നൊരു കാലമാണിത്. പശ്ചിമേഷ്യൻ രാജ്യങ്ങളിലും അമേരിക്ക, മലേഷ്യ തുടങ്ങിയ രാജ്യങ്ങളിൽ സജീവമായിരുന്ന ഇന്ത്യക്കാരുടെ ഒഴുക്ക് ഇന്ന് പുതിയ ഇടങ്ങൾ തേടി കൊണ്ടിരിക്കുകയാണ്. യൂറോപ്യൻ രാജ്യങ്ങളാണ് ഇന്നത്തെ കാലത്ത് കൂടുമാറ്റത്തിനായി സജീവമായി പരി​ഗണിക്കുന്ന രാജ്യങ്ങൾ.

രാജ്യത്തോടുള്ള ഇഷ്ടം കൊണ്ടോ, കാലാവസ്ഥ കൊണ്ടോ ഒരിടം തിരഞ്ഞെടുക്കുന്നതിന് മുൻപ് അവിടുത്തെ പ്രവാസ ജീവിതം എത്രത്തോളം സുഖകരമായിരിക്കും എന്ന് അറിയേണ്ടതുണ്ട്. കുടിയേറ്റകാരോടുള്ള സമീപനം, ഭാഷ, ഔദ്യോ​ഗിക ഭരണ രം​ഗത്തെ സൗകര്യങ്ങൾ എന്നിവ ഘടകങ്ങലാണ്. വിദേശത്ത് ജീവിതം ആരംഭിക്കുന്നതിനുള്ള ഏറ്റവും പ്രധാനപ്പെട്ട ചില ഘടകങ്ങൾ ഉൾകൊള്ളുന്ന എക്‌സ്പാറ്റ് എസൻഷ്യൽസ് സൂചിക പ്രകാരം പ്രവാസികൾക്ക് എളുപ്പത്തിൽ സ്ഥിരതാമസമാക്കാൻ കഴിയുന്ന രാജ്യങ്ങളുടെ പട്ടിക പരിശോധിക്കാം.

ബഹറിന്‍

എക്‌സ്പാറ്റ് എസന്‍ഷ്യല്‍ സൂചിക പ്രകാരം പട്ടികയില്‍ ഒന്നാമത് ബഹറിനാണ്. പശ്ചിമേഷ്യൻ ബഹറൈനില്‍ പ്രാദേശിക അധികാരികളുമായി ഇടപെടുന്നത് എളുപ്പമാണെന്ന് സര്‍വെയില്‍ പങ്കെടുത്ത 67 ശതമാനം പേരും അഭിപ്രായപ്പെടുന്നു. വിസ നേടാനുള്ള എളുപ്പവും പ്രാദേശിക ഭാഷ അറിയാതെ തന്നെ താമസ സൗകര്യം കണ്ടെത്താനുള്ള എളുപ്പവും ബഹറൈനുള്ള നേട്ടമാണ്. അറബിയാണ് ബഹറിനിലെ ഔദ്യേ​ഗിക ഭാഷയെങ്കിലും ഇം​ഗ്ലീഷ് സജീവമായി ഉപയോ​ഗിക്കുന്നുണ്ട്. വിദ്യാഭ്യാസ രം​ഗത്ത് സെക്കൻഡ് ലാ​ഗ്വേജ് ഇം​ഗ്ലീഷാണ്.

യുഎഇ

പട്ടികയിൽ രണ്ടാമതുള്ളതും പശ്ചിമേഷ്യൻ രാജ്യമായ യുഎഇ ആണ്. അഡ്മിനിസ്‌ട്രേറ്റീവ് സേവനങ്ങൾ ഓൺലൈനായി എളുപ്പത്തിൽ ലഭ്യമാവുന്ന എന്നത് യുഎഇയുടെ പ്രത്യേകതയാണ്. വിസ, അതിവേഗ ഇന്റർനെറ്റ് സേവനങ്ങൾ തുടങ്ങിയ ആനുകൂല്യങ്ങളും പ്രവാസികൾക്ക് യുഎഇ ഒരു മികച്ച തിരഞ്ഞെടുപ്പാവുന്നു. പ്രദേശിക ഭാഷയെ പറ്റി കൃത്യമായ ധാരണയില്ലാതെയും സു​ഗമമായി ജീവിക്കാൻ യുഎഇയ്ക്ക് സാധിക്കുന്നു. അറബിക്ക് ആണ് ഔദ്യോ​ഗിക ഭാഷയെങ്കിലും കോടതികളിൽ ചൈനീസ്, ഇംഗ്ലീഷ്, ഫ്രഞ്ച്, ഹിന്ദി, റഷ്യൻ എന്നിവയും ഉപയോ​ഗിക്കുന്നു. 

സിം​ഗപ്പൂർ

ലോകമെമ്പാടുമുള്ള വ്യത്യസ്‌ത സംസ്‌കാരങ്ങളുടെ മിശ്രിതമാണ് സിംഗപ്പൂർ. പ്രവാസ ജീവിതത്തിന് തിരഞ്ഞെടുക്കുന്നവർക്ക് ഏറ്റവും അനുയോജ്യമായ മൂന്നാമത്തെ സ്ഥലമാണ് സിം​ഗപ്പൂർ. ഇംഗ്ലീഷ് ഔദ്യോഗിക ഭാഷകളിലൊന്നായതിനാൽ സിം​ഗപ്പൂരിലെത്തുന്നൊരാൾക്കും ഭാഷ സംബന്ധിച്ചുള്ള ബുദ്ധിമുട്ട് നേരിടേണ്ടി വരുന്നില്ല. പ്രവാസികൾക്കും ഭരണകാര്യങ്ങൾ എളുപ്പത്തിൽ ലഭിക്കുമെന്നതും താമസ സ്ഥലം കണ്ടെത്താനുള്ള എളുപ്പവും സിം​ഗപ്പൂരിനെ മികച്ചതാക്കുന്നു. ജീവിത ചെലവാണ് പലരും നേരിടുന്ന പ്രശ്നം. 

എസ്റ്റോണിയ

വടക്കൻ യൂറോപ്യൻ രാജ്യമായ എസ്റ്റോണിയ സ്ഥിര താമസമാക്കുന്നതിന് അനുയോജ്യമായ രാജ്യങ്ങളിലൊന്നാണ്. പട്ടികയിലെ ആദ്യ യൂറോപ്യൻ രാജ്യമാണിത്. ഭരണപരമായ ബുദ്ധിമുട്ടുകളില്ലാതെയുള്ള ജീവിതവും സുഗമമായ ഇന്റർനെറ്റ് സേവനങ്ങളും എസ്റ്റോണിയയെ പ്രവാസികൾക്കിടയിൽ മികച്ചതാക്കുന്ന ഘടകമാണ്. ഭാഷയാണ് നേരിടുന്നൊരു വെല്ലുവിളി. താമസ സൗകര്യങ്ങൾക്കുള്ള ചില പ്രതിസന്ധികളും എസ്റ്റോണിയയിൽ കാണാം.

ഒമാൻ

എക്‌സ്പാറ്റ് എസൻഷ്യൽസ് സൂചിക പ്രകാരം അഞ്ചാം സ്ഥാനത്തുള്ള രാജ്യമാണ് ഒമാൻ. പ്രവാസികൾക്ക് ഒമാനിലെത്താൻ എളുപ്പമാണെന്നാണ് സർവെ പറയുന്നത്. പ്രവാസികൾക്കുള്ള അവശ്യസാധനങ്ങൾ ഒമാനിൽ എളുപ്പത്തിൽ ലഭിക്കും. ഇതോടൊപ്പം താമസ സൗകര്യങ്ങളും പാർപ്പിടവും ഭാഷയും പ്രശ്നമല്ലാത്തത് പ്രവാസികൾക്ക് കൂടുതൽ സൗകര്യപ്രദമായ ഇടമാക്കി മാറ്റുന്നു. 

ഇൻഡോനേഷ്യ

കുറഞ്ഞ ചെലവിൽ ജീവിക്കാനും നല്ലൊരു തുക സമ്പാദിക്കാനും സാധിക്കുന്നൊരിടമാണ് ഇൻഡോനേഷ്യ. പ്രവാസികളായി എത്തുന്നവർക്ക് താമസ സ്ഥലം കണ്ടെത്തുന്നതിൽ ഏറ്റവും എളുപ്പമുള്ള സ്ഥലമായതിനാലാണ് എക്‌സ്പാറ്റ് എസൻഷ്യൽസ് സൂചികയിൽ ഇൻഡോനേഷ്യ ആറാം സ്ഥാനത്ത് എത്തുന്നത്. കുറഞ്ഞ ജീവിത ചെലവുള്ളതിനാൽ ഇന്ത്യോനേഷ്യയിലെത്തുന്നവർക്ക വലിയ സമ്പാദ്യം ഉണ്ടാക്കാൻ അവസരമുണ്ട്. ഭാഷ പഠിച്ചെടുക്കുക എന്നത് എളുപ്പമാണ്. പ്രാദേശിക ഭരണ സംവിധാനങ്ങളുമായി ഇടപെടുന്നത് ബുദ്ധിമുട്ടുണ്ടാക്കുന്നു എന്നതാണ് ഇൻഡോനേഷ്യ സംബന്ധിച്ച പ്രതിസന്ധി.