അനില്‍ അംബാനിക്ക് വമ്പൻ കുരുക്ക്, മൂന്ന് ബാങ്ക് അക്കൗണ്ടുകള്‍ വ്യാജമെന്ന് എസ്ബിഐ ദില്ലി ഹൈക്കോടതിയിൽ

ഒരു നിശ്ചിത കാലയളവോളം പണമിടപാടുകള്‍ നടക്കാതിരിക്കുന്ന അക്കൗണ്ടുകള്‍ ആര്‍ബിഐ ചട്ടം പ്രകാരം നോര്‍ പെര്‍ഫോമിംഗ് അസറ്റായിട്ടാണ് കണക്കാക്കുക. തങ്ങള്‍ നടത്തിയ ഓഡിറ്റിനിടെ ഫണ്ടുകളില്‍ ക്രമക്കേടും ഫണ്ടുകള്‍ വഴി തിരിച്ച് വിടലും അടക്കമുളളവ കണ്ടെത്തിയതോടെയാണ് അനില്‍ അംബാനിയുടെ മൂന്ന് ബാങ്ക് അക്കൗണ്ടുകള്‍ തട്ടിപ്പാണെന്ന് പ്രഖ്യാപിച്ചതെന്നും എസ്ബിഐ ദില്ലി ഹൈക്കോടതിയെ അറിയിച്ചു.

ഒരു അക്കൗണ്ടിനെ ബാങ്ക് വ്യാജമെന്ന് കണ്ടെത്തിയാല്‍ 7 ദിവസത്തിനുളളില്‍ അക്കാര്യം റിസര്‍വ് ബാങ്ക് ഓഫ് ഇന്ത്യയെ അറിയിക്കണം എന്നാണ് ചട്ടം. ക്രമക്കേട് കണ്ടെത്തിയ തുക ഒരു കോടിക്ക് മുകളില്‍ ആണെങ്കില്‍ ആര്‍ബിഐയെ അറിയിച്ച് 30 ദിവസത്തിനുളളില്‍ സിബിഐയെയും അറിയിക്കേണ്ടതുണ്ട്. അനില്‍ അംബാനിയുടെ മൂന്ന് സ്ഥാപനങ്ങളുടെ ബാങ്കിലെ കുടിശിക 49000 കോടിക്ക് മുകളിലാണെന്നാണ് റിപ്പോര്‍ട്ടുകള്‍. അതില്‍ റിലയന്‍സ് ഇന്‍ഫ്രാടെലിന്റെ കടം 12000 കോടിയും റിലയന്‍സ് ടെലികോമിന്റെ കടം 24000 കോടിയുമാണ്.