മ്യൂച്വൽ ഫണ്ടിൽ കോടികൾ ഒഴുകുന്നു, ഈ ഫണ്ടിൽ നിക്ഷേപിച്ചാൽ നിങ്ങൾക്കും സമ്പാദിക്കാം, നോക്കുന്നോ..?

മ്യൂച്വൽ ഫണ്ട് നിക്ഷേപത്തിൽ നാൾക്കുനാൾ നിക്ഷേപം വർദ്ധിക്കുകയാണ്. ഓഹരി വിപണിയുടെ സാധ്യതകൾ മനസിലാക്കി ദീർഘകാല നിക്ഷേപത്തിലൂടെ മികച്ച നേട്ടമുണ്ടാക്കാൻ മ്യൂച്വൽ ഫണ്ടിലൂടെ സാധിക്കും. 2025 മെയ് 31-ലെ ആംഫിയുടെ കണക്കുകള്‍ പ്രകാരം കേരളത്തില്‍ നിന്നുള്ള മ്യൂച്വല്‍ ഫണ്ടുകളുടെ ആകെ ആസ്തികള്‍ 94,829.36കോടി രൂപയാണ്. രാജ്യത്തെ മ്യൂച്വല്‍ ഫണ്ടുകള്‍ ആകെ കൈകാര്യം ചെയ്യുന്ന 72.19ലക്ഷം കോടി രൂപയുടെ 1.3ശതമാനമാണിതെന്ന് കണക്കുകൾ വ്യക്തമാക്കുന്നു.

മൊത്തം മ്യൂച്വൽ ഫണ്ട് വിപണിയുടെ 45 ശതമാനം എസ്.ഐ.പികൾക്കാണ്. എസ്.ഐ.പി വിഭാഗത്തിലെ മൊത്തം ആസ്തികൾ 28,788.69 കോടി രൂപയാണ്. വാർഷികാടിസ്ഥാനത്തിൽ 27 ശതമാനം വളർച്ചയാണ് ഈ രംഗത്തുള്ളത്. പ്രതിമാസ എസ്.ഐ.പി നിക്ഷേപം മാർച്ചിൽ 635 കോടി രൂപയിലെത്തിയെന്ന് ആംഫി വ്യക്തമാക്കി.

നിങ്ങൾ ഇനിയും മ്യൂച്വൽ ഫണ്ട് നിക്ഷേപം തുടങ്ങിയില്ലെങ്കിൽ ഉടൻ തന്നെ ആരംഭിക്കണം. കാരണം വൈകുന്ന ഓരോ നിമിഷത്തിലും നിങ്ങളുടെ ആകെ സമ്പാദ്യത്തിൽ വലിയ കുറവുണ്ടാകും. കഴിഞ്ഞ മൂന്ന് വർഷത്തിനിടെ 20 ശതമാനത്തിലധികം വാർഷിക വരുമാനം നൽകിയ വാല്യൂ മ്യൂച്വൽ ഫണ്ടുകൾ ഏതൊക്കെയാണെന്ന് നമുക്ക് നോക്കിയാലോ..

വാല്യൂ ഫണ്ടുകൾ

താരതമ്യേന കുറഞ്ഞ വിലയിൽ വിൽക്കുന്ന ഓഹരികളെയാണ് വാല്യൂ ഫണ്ടുകൾ നിക്ഷേപത്തിനായി തിരഞ്ഞെടുക്കുന്നത്. ഈ ഓഹരികൾക്ക് അവയുടെ യഥാർത്ഥ മൂല്യത്തേക്കാൾ കുറഞ്ഞ വിലയായിരിക്കും വിപണിയിൽ ലഭിക്കുക. ഈ ഫണ്ടുകൾ ദീർഘകാല നിക്ഷേപത്തിന് വേണ്ടിയാണ് രൂപകൽപ്പന ചെയ്തിരിക്കുന്നത്. ഓഹരി വിപണിയിൽ തിരിച്ചുവരവ് ഉണ്ടാകുമ്പോൾ ഈ ഓഹരികൾക്ക് വില കൂടുകയും ഇത് നിക്ഷേപകർക്ക് ലാഭം നേടാൻ സഹായിക്കുകയും ചെയ്യും. 2025 ജൂലൈ 31 ലെ ഏറ്റവും പുതിയ ആംഫിയുടെ ഡാറ്റ പ്രകാരം 2.01 ലക്ഷം കോടിയുടെ മൊത്തം ആസ്തികൾ കൈകാര്യം ചെയ്യുന്ന 24 വാല്യൂ സ്കീമുകൾ ഉണ്ട്.

മികച്ച ഫണ്ടുകൾ

1. ആക്സിസ് വാല്യൂ ഫണ്ട് - റിട്ടേൺ 21.45 ശതമാനം
2. എച്ച്എസ്ബിസി വാല്യൂ ഫണ്ട് - റിട്ടേൺ 23.84 ശതമാനം
3. ഐസിഐസിഐ പ്രൂ വാല്യൂ- റിട്ടേൺ 21.05 ശതമാനം
4. ജെഎം വാല്യൂ ഫണ്ട് - റിട്ടേൺ - 23.34 ശതമാനം
5. നിപ്പോൺ ഇന്ത്യ വാല്യൂ - റിട്ടേൺ 21.19 ശതമാനം
6. ക്വാണ്ട് വാല്യൂ ഫണ്ട് - റിട്ടേൺ 22.98 ശതമാനം

ടിക്കറ്റ് നിരക്കിൽ ഇളവുമായി ഇന്ത്യൻ റെയിൽവേ, ഉത്സവ സീസണിൽ കീശ കീറില്ല, വിശദമായി അറിയാം

മുകളിലുള്ള കാണാൻ കഴിയുന്നതുപോലെ കഴിഞ്ഞ മൂന്ന് വർഷത്തിനിടെ ജെഎം വാല്യു ഫണ്ട് 23 ശതമാനത്തിലധികം വാർഷിക വരുമാനം നൽകി, അതേസമയം എച്ച്എസ്ബിസി വാല്യു ഫണ്ട് 23.84 ശതമാനം വരുമാനം നൽകി. ഉയർന്ന വരുമാനം നൽകുന്ന മറ്റ് പദ്ധതികളിൽ ആക്സിസ് വാല്യൂ ഫണ്ട് , ഐസിഐസിഐ പ്രുഡൻഷ്യൽ വാല്യൂ ഫണ്ട് എന്നിവ ഉൾപ്പെടുന്നു.

ശ്രദ്ധിക്കേണ്ട കാര്യങ്ങൾ

നിക്ഷേപ തീരുമാനം എടുക്കുന്നതിന് മുമ്പ് നിക്ഷേപകർ പരിഗണിക്കേണ്ട മറ്റ് ഘടകങ്ങളിൽ ഫണ്ട് ഹൗസിന്‍റെ പ്രശസ്തി, സ്കീം സജീവമാണോ നിഷ്ക്രിയമാണോ, ഫണ്ട് മാനേജരുടെ മുൻകാല പ്രകടനം, നിലവിലുള്ള മൊത്തത്തിലുള്ള മാക്രോ ഇക്കണോമിക് സാഹചര്യം എന്നിവ ഉൾപ്പെടുന്നു.

അറിയിപ്പ്: മുകളിൽ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങൾ എടുക്കും മുൻപ് സാമ്പത്തിക വിദഗ്ധന്റെ നിർദേശം തേടാം. മ്യൂച്വൽ ഫണ്ടിലെ നിക്ഷേപം നഷ്ട സാധ്യതകൾക്ക് വിധേയമാണ്. സ്വന്തം റിസ്‌കിൽ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തിൽ സംഭവിക്കുന്ന ലാഭനഷ്ടങ്ങൾക്ക് ഗ്രേനിയം ഇൻഫർമേഷൻ ടെക്നോളജീസും ലേഖകനും ഉത്തരവാദികളല്ല.