ആപ്പ് വഴി ആധാറിലെ മൊബൈല്‍ നമ്പര്‍ അപ്‌ഡേറ്റ് ചെയ്യാം; ഘട്ടം ഘട്ടമായുള്ള സ്റ്റെപ്പുകള്‍ ഇതാ

ആധാറുമായി ലിങ്ക് ചെയ്തിരിക്കുന്ന ഫോണ്‍ നമ്പര്‍ മാറ്റാന്‍ ഇനി എന്‍ റോള്‍മെന്റ് ഓഫീസ് സന്ദര്‍ശിക്കേണ്ടതില്ല. പകരം യുഐഡിഐയുടെ പുതിയ ആധാര്‍ ആപ്പ് വഴി നിഷ്പ്രയാസം പ്രക്രിയ സാധിച്ചെടുക്കാം. സ്മാര്ട്ട്‌ഫോണില്‍ ആപ്പ് തുറക്കുകയും 'മൊബൈല്‍ നമ്പര്‍ അപ്ഡേറ്റില്‍' വിരലമര്‍ത്തുകയും ഒടിപി അല്ലെങ്കില്‍ മുഖം പരിശോധന പ്രമാണീകരണവും വഴിയാണ്‌ പ്രക്രിയ പൂര്‍ത്തിയാക്കേണ്ടത്.

പഴയ ഫോണ്‍ നമ്പര്‍ പുതുക്കേണ്ടവര്‍ക്കും സിം കാര്‍ഡ് നഷ്ടമായവര്‍ക്കും ഉപകാരപ്രദമായ ഈ പ്രക്രിയ ഘട്ടം ഘട്ടമായി ചുവടെ:

• മൊബൈല്‍ നമ്പര്‍ പുതുക്കുന്നതിന് ആധാര്‍ ആപ്പിന്റെ പുതിയ പതിപ്പ് ഡൗണ്‍ ലോഡ് ചെയ്യണം. ആന്‍ഡ്രോയ്ഡ്, ഐഒഎസ് ഓപ്പറേറ്റിംഗ് സിസ്റ്റങ്ങളില്‍ ആപ്പ് ലഭ്യമാണ്.
• ആധാര്‍ ആപ്പ് തുറന്ന് ആധാര്‍ അടിസ്ഥാനമാക്കിയുള്ള പ്രാമാണീകരണം ഉപയോഗിച്ച് ലോഗിന്‍ ചെയ്യുക.
• ഹോം സ്‌ക്രീനിലെ 'സേവനങ്ങള്‍' വിഭാഗത്തിലേക്ക് പോകുക.
• 'മൊബൈല്‍ നമ്പര്‍ അപ്‌ഡേറ്റ് ചെയ്യുക' തിരഞ്ഞെടുക്കുക.
• ആപ്പ് നിങ്ങളുടെ നിലവില്‍ രജിസ്റ്റര്‍ ചെയ്ത മൊബൈല്‍ നമ്പര്‍ കാണിക്കും. നിങ്ങള്‍ ലിങ്ക് ചെയ്യാന്‍ ആഗ്രഹിക്കുന്ന പുതിയ മൊബൈല്‍ നമ്പര്‍ നല്‍കുക.
• പുതിയ നമ്പറിലേക്ക് വരുന്ന ഒടിപി നല്‍കുക.
• ആപ്പില്‍ ആവശ്യപ്പെടുന്നതുപോലെ പ്രാമാണീകരണ പ്രക്രിയ പൂര്‍ത്തിയാക്കുക.
• ഒടിപി പരിശോധിച്ചുറപ്പിച്ചാല്‍, അഭ്യര്‍ത്ഥന യുഐഡിഐയ്ക്ക് സമര്‍പ്പിക്കപ്പെടും.

സര്‍വീസ് ചാര്‍ജ്ജ് 75 രൂപയാണ്. ഇത് ആപ്പില്‍ നേരിട്ട് അടയ്ക്കാം. ആപ്പ് വഴിയുള്ള അഭ്യര്‍ത്ഥന രേഖകളില്‍ പ്രതിഫലിക്കാന്‍ ഏകദേശം 30 ദിവസം വരെ എടുത്തേയ്ക്കാം. എന്നിരുന്നാലും, പ്രക്രിയ ഡിജിറ്റലായതിനാല്‍ ഫോമുകള്‍, ഫോട്ടോകോപ്പികള്‍, നേരിട്ടുള്ള അപ്പോയിന്റ്‌മെന്റുകള്‍ എന്നിവ ഒഴിവാക്കാനാകുന്നു.

ആധാര്‍ ആപ്പുപയോഗിച്ച് വിലാസം അപ്‌ഡേറ്റ് ചെയ്യാം
ആധാര്‍ കാര്‍ഡിലെ വിലാസം മാറ്റാനും ആപ്പ് വഴി സാധിക്കും. ഇതിനായി സാധുവായ അഡ്രസ് പ്രൂഫ് അപ്ലോഡ് ചെയ്യുകയും സര്‍വീസ് ചാര്‍ജ്ജ് അടയ്ക്കുകയും വേണം.

എന്‍ റോള്‍മെന്റ് സന്ദര്‍ശനം അനിവാര്യമാകുന്ന ഘട്ടങ്ങള്‍
മൊബൈല്‍ നമ്പര്‍, വിലാസം എന്നിവ മാറ്റുന്നതിനും അപ്‌ഡേറ്റ് ചെയ്യുന്നതിനും ആധാര്‍ ആപ്പ് മതിയാകുമെങ്കിലും ബയോമെട്രിക്‌സ്, ജനനത്തീയതി എന്നിവയുമായി ബന്ധപ്പെട്ട തിരുത്തലുകള്‍ക്ക് ആധാര്‍ എന്‍ റോള്‍മെന്റ് സന്ദര്‍ശിക്കേണ്ടതുണ്ട്.