1 ഗ്രാം സ്വർണത്തിന് വെറും 4250 രൂപ മാത്രം, ഉറപ്പും ഭംഗിയും കൂടും, ഈ സ്വർണത്തിന്‍റെ പ്രത്യേകതകൾ അറിയാം

ഇന്ത്യൻ ജനതയെ സംബന്ധിച്ചിടത്തോളം സ്വർണം എന്നത് വെറും ആഭരണം മാത്രമല്ല, സംസ്കാരത്തിന്‍റെ ഭാഗം കൂടിയാണ്. അതുകൊണ്ടാണ് തലമുറകൾ കൈമാറി ലഭിക്കുന്ന സ്വർണം പലരും നിധി പോലെ സൂക്ഷിക്കുന്നതും. ആഘോഷങ്ങളിലും ഉത്സവങ്ങളിലും ഭൂരിപക്ഷം സ്ത്രീകളും സ്വർണാഭരണങ്ങൾ അണിഞ്ഞ് കൂടുതൽ സുന്ദരി ആയാണ് പ്രത്യക്ഷപ്പെടുക. പെണ്ണായാൽ പൊന്ന് വേണം എന്ന ഒരു പരസ്യ വാചകം പോലും ഉണ്ട്. അത്രത്തോളം മനുഷ്യ ജിവിതത്തെ, ആഘോഷങ്ങളെ സ്വർണം സ്വാധീനിച്ച് കഴിഞ്ഞു. എന്നാൽ സ്വർണവിലയിലുണ്ടാകുന്ന കുതിച്ചുചാട്ടം ആഭരണപ്രേമികളെ വല്ലാതെ ആശങ്കപ്പെടുത്തുന്നുണ്ട്.

കഴിഞ്ഞ ആറ് വർഷത്തിനിടെ സ്വർണവില കത്തിക്കയറി. പവൻ വില 25,000 കടന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. 2022 ൽ പവൻ വില 40,000 രൂപ കടന്നു. 2024 മാർച്ച് 29-ന് പവൻ വില 50,000 കടന്നു. 2025 ജനുവരി 22 ന് പവൻ വില 60,000 പിന്നിട്ടു. പിന്നെ കുതിച്ചും കിതച്ചും കേരളത്തിലെ സ്വർണവില 75000 രൂപ തൊട്ടു. ഇപ്പോൾ ഇതാ പവന്‍റെ വില 78,000 രൂപയും കടന്ന് കുതിക്കുകയാണ്.

വില വർദ്ധനവ് തിരിച്ചടിയായി

സ്വർണവിലയിലെ കുതിപ്പ് രാജ്യത്തെ സ്വർണവിൽപ്പനയെ ബാധിക്കുന്നുണ്ടെന്നാണ് ജ്വല്ലറി ഉടമകളും പറയുന്നത്. ലോകത്തിലെ ഏറ്റവും വലിയ സ്വർണ്ണ ഉപഭോക്താവായി കണക്കാക്കപ്പെടുന്ന ഇന്ത്യയിൽ ജൂണിൽ സ്വർണ്ണ വിൽപ്പനയിൽ 60 ശതമാനം ഇടിവ് സംഭവിച്ചിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. സ്വർണത്തിന് പകരം മറ്റ് മാർഗങ്ങൾ ആളുകൾ ആലോചിക്കുന്നുണ്ട് എന്നാണ് ഈ കുറവ് ചൂണ്ടിക്കാട്ടുന്നത്. അതുകൊണ്ടുതന്നെ സ്വർണം വാങ്ങുന്നവർക്ക്
കൂടുതല്‍ ഓപ്ഷനുകള്‍ നല്‍കുന്നതിനുമായി കഴിഞ്ഞ മാസം ഇന്ത്യാ ഗവൺമെന്‍റ് 9 കാരറ്റ് (9K) സ്വർണ്ണത്തിനുള്ള ഹാൾമാർക്കിംഗ് മാനദണ്ഡങ്ങൾ അംഗീകരിച്ചു.

വിശ്വസിച്ച് വാങ്ങാം

2025 ഓഗസ്റ്റ് മുതൽ, ഹാൾമാർക്ക് ചെയ്ത പ്യൂരിറ്റികളുടെ ഔദ്യോഗിക പട്ടികയിൽ 14K, 18K, 20K, 22K, 23K, 24K എന്നിവ ഉൾപ്പെടുന്നു, കൂടാതെ അടുത്തിടെ 9K സ്വർണ്ണവും ചേർത്തിട്ടുണ്ട്. ഹാള്‍മാര്‍ക്കിംഗ് വാങ്ങുന്ന ആഭരണങ്ങളില്‍ വാഗ്ദാനം ചെയ്ത സ്വര്‍ണം യഥാര്‍ത്ഥത്തില്‍ അടങ്ങിയിട്ടുണ്ടോ എന്ന സംശയം ഇല്ലാതാക്കുന്നു. അതുകൊണ്ടുതന്നെ ഇനിമുതൽ 9 കാരറ്റ് സ്വർണവും വഞ്ചനയെക്കുറിച്ചോ വ്യാജമായ ശുദ്ധതാ അവകാശവാദങ്ങളെക്കുറിച്ചോ ആശങ്കപ്പെടാതെ ഉപഭോക്താക്കള്‍ക്ക് വിലകുറഞ്ഞ ആഭരണങ്ങള്‍ വാങ്ങാന്‍ കഴിയും.

വ്യത്യാസം എന്ത്..?

24K സ്വർണ്ണം 99.9 ശതമാനം ശുദ്ധമായ സ്വർണ്ണമാണ്, അതായത് അതിൽ മറ്റ് ലോഹങ്ങളൊന്നും അടങ്ങിയിട്ടില്ല. അതേസമയം 9K സ്വർണ്ണത്തിൽ 37.5 ശതമാനം ശുദ്ധമായ സ്വർണ്ണം അടങ്ങിയിരിക്കുന്നു . ബാക്കി 62.5 ശതമാനത്തിൽ ചെമ്പ്, വെള്ളി അല്ലെങ്കിൽ സിങ്ക് പോലുള്ള അലോയ് ലോഹങ്ങൾ അടങ്ങിയിരിക്കുന്നു.

ആഭരണം വാങ്ങാം

ബിഐഎസ് ഹാൾമാർക്കിംഗ് സ്കീമിൽ 9 കാരറ്റ് സ്വർണ്ണം ഉൾപ്പെടുത്തിയത് അതിന്‍റെ നിയമസാധുതയും ആകർഷണീയതയും കൂടുതൽ വർദ്ധിപ്പിച്ചു. ഇത് ആഭരണ വ്യാപാരികളെ വാങ്ങാൻ പ്രോത്സാഹിപ്പിക്കുകയും ചെയ്തു. അതുകൊണ്ടുതന്നെ ഉയർന്ന കാരറ്റ് സ്വർണ്ണത്തിന്‍റെ വില വർദ്ധിച്ചുവരുന്നതിനാൽ കൂടുതൽ ഉപഭോക്താക്കൾ പ്രത്യേകിച്ച് ചെറുപ്പക്കാരും ബജറ്റ് കുറഞ്ഞവരും 9K സ്വർണ്ണത്തിലേക്ക് തിരിയുന്നു. മറ്റ് കാരറ്റുകളെ അപേക്ഷിച്ച് കൂടുതല്‍ ശക്തവും ഈടുനില്‍ക്കുന്നതുമാണ്. കാരണം ചേര്‍ക്കുന്ന ലോഹങ്ങള്‍ ഉയര്‍ന്ന കാരറ്റ് കഷണങ്ങളേക്കാള്‍ ആഭരണങ്ങളെ കൂടുതല്‍ കടുപ്പമുള്ളതാക്കുന്നു.

വില വ്യത്യാസം

22 കാരറ്റ് സ്വർണത്തിന്‍റെ 1 ഗ്രാമിന് വില ഏകദേശം 9795 രൂപയാണ്. അതായത് 10 പവന് ഏകദേശം 98,000 രൂപ വരും. എന്നാൽ 9 കാരറ്റ് സ്വർണത്തിന് 1 ഗ്രാമിന് 4250 രു മാത്രമാണുള്ളത്. അതായത് 10 ഗ്രാമിന് വെറും 42,500 രൂപ മാത്രം. അതായത് 22 ഗ്രാം സ്വർണത്തിന്‍റെ പകുതിയിലും താഴെ.