ചൈനയുടെ സമ്പദ്വ്യവസ്ഥ ഇനി എന്ന് കരകയറും? വെറും മാസങ്ങൾക്കുള്ളിൽ ചൈന 44 വർഷം പിന്നിലേയ്ക്ക്

കൊറോണ വൈറസ് മഹാമാരി മൂലമുണ്ടായ നാശത്തിൽ നിന്ന് കരകയറാനുള്ള ചില താൽക്കാലിക അടയാളങ്ങൾ ചൈനയുടെ സമ്പദ്‌വ്യവസ്ഥ കാണിക്കുന്നുണ്ടെങ്കിലും മുന്നോട്ടുള്ള പാത വളരെ അനിശ്ചിതത്വത്തിലാണ്. മാത്രമല്ല 2020 ൽ വളർച്ച പൂർണ്ണമായും തകരുകയും ദശലക്ഷക്കണക്കിന് തൊഴിലവസരങ്ങൾ നഷ്ടപ്പെടുകയും ചെയ്യുമെന്നാണ് പ്രവചനങ്ങൾ. ലോകത്തിലെ തന്നെ രണ്ടാമത്തെ വലിയ സമ്പദ്‌വ്യവസ്ഥയായ ചൈനയുടെ ജിഡിപി വളർച്ച വെറും 1% അല്ലെങ്കിൽ 2% ആയി കുറയാൻ സാധ്യതയുണ്ടെന്നാണ് റിപ്പോർട്ടുകൾ.

ജിഡിപി വളർച്ച

2019 ലെ 6.1% ജിഡിപി വളർച്ചയിൽ നിന്നാണ് ചൈന ഒന്ന് അല്ലെങ്കിൽ രണ്ട് ശതമാനത്തിലേയ്ക്ക് കുറഞ്ഞിരിക്കുന്നത്. ഈ വർഷം 14 ട്രില്യൺ ഡോളർ സമ്പദ്‌വ്യവസ്ഥയിലേയ്ക്ക് ഉയരാൻ ചൈനയ്ക്ക് ആകില്ലെന്ന് ലോക ബാങ്കും ഈ ആഴ്ച ആദ്യം മുന്നറിയിപ്പ് നൽകിയിരുന്നു. 2008-2009 ലെ ആഗോള മാന്ദ്യകാലത്തേക്കാളും വലിയ പ്രതിസന്ധിയിലാണ് ചൈന ഇപ്പോഴുള്ളത്. 44 വർഷത്തിനിടയിലെ ഏറ്റവും ദുർബലമായ പ്രകടനമാണ് ചൈന ഇപ്പോൾ കാഴ്ച്ച വയ്ക്കുന്നതെന്നും സാമ്പത്തിക വിദഗ്ധർ പറയുന്നു.

വളർച്ചാ പ്രവചനങ്ങൾ

യു‌ബി‌എസ്, ഗോൾഡ്മാൻ സാച്ച്സ് എന്നിവയിൽ നിന്നുള്ള വിശകലന വിദഗ്ധർ ഈ വർഷം ചൈനയുടെ വളർച്ചാ പ്രവചനം യഥാക്രമം 1.5%, 3% ആയി കുറച്ചു. 1985 മുതൽ എല്ലാ വർഷവും വാർഷിക ജിഡിപി ലക്ഷ്യങ്ങൾ നിശ്ചയിച്ചിട്ടുള്ള ചൈനീസ് ഉദ്യോഗസ്ഥർ പോലും പ്രവചനങ്ങൾ നടത്താൻ ബുദ്ധിമുട്ടുകയാണ്. 2020 ൽ സർക്കാർ ലക്ഷ്യം വെക്കരുതെന്ന് പീപ്പിൾസ് ബാങ്ക് ഓഫ് ചൈനയിലെ (പിബിഒസി) നയരൂപീകരണ സമിതി ഈ ആഴ്ച വ്യക്തമാക്കിയിരുന്നു.

സാമ്പത്തിക ഉത്തേജനം

4% നും 5% നും ഇടയിലുള്ള വളർച്ചയിലേയ്ക്ക് എത്തുക എന്നത് വളരെ പ്രയാസമാണെന്നും വളർച്ച വെറും 1% അല്ലെങ്കിൽ 2% [ഈ വർഷം] ആയി കുറയുമെന്ന് പലരും പ്രവചിച്ചിട്ടുണ്ടെന്നും ചൈനീസ് സെൻട്രൽ ബാങ്ക് ധനനയ സമിതി അംഗം മാ ജുൻ സർക്കാർ ഉടമസ്ഥതയിലുള്ള ഇക്കണോമിക് ഡെയ്‌ലിയോട് പറഞ്ഞു. അനിശ്ചിതത്വങ്ങൾ കണക്കിലെടുക്കുമ്പോൾ, സാമ്പത്തികവും പണപരവുമായ ഉത്തേജനം എത്രത്തോളം ആവശ്യമാണെന്ന് ചൈനയ്ക്ക് നിർണ്ണയിക്കാൻ പ്രയാസമാണെന്നും മാ പറഞ്ഞു. യാഥാർത്ഥ്യബോധമില്ലാത്ത വളർച്ചാ ലക്ഷ്യം അടിസ്ഥാന സൌകര്യ നിക്ഷേപങ്ങളിൽ ഏർപ്പെടാൻ പ്രാദേശിക സർക്കാരുകളെ പ്രേരിപ്പിച്ചേക്കാം. ഇത് തൊഴിലില്ലായ്മ ലഘൂകരിക്കാനോ ഹ്രസ്വകാലത്തേക്ക് ജനങ്ങളുടെ ഉപജീവനമാർഗം മെച്ചപ്പെടുത്താനോ സഹായിക്കുന്നില്ല.

പുതിയ പാക്കേജുകൾ

ചെറുകിട വ്യവസായങ്ങൾക്ക് അധിക ധനസഹായം 3 ട്രില്യൺ യുവാൻ (423 ബില്യൺ ഡോളർ) ചൈനയുടെ മന്ത്രിസഭ ചൊവ്വാഴ്ച പ്രഖ്യാപിച്ചിരുന്നു. ചെറുകിട, ഇടത്തരം ബാങ്കുകൾക്ക് പി‌ബി‌ഒസി ഒരു ട്രില്യൺ യുവാൻ (141 ബില്യൺ ഡോളർ) അധികമായി നൽകും. കൂടാതെ കരുതൽ ധനമായി കൈവശം വയ്ക്കേണ്ട തുക വെട്ടിക്കുറയ്ക്കുകയും ചെയ്യും. ചെറുകിട, ഇടത്തരം സംരംഭങ്ങൾക്ക് (എസ്എംഇ) വായ്പ നൽകുന്നത് വർദ്ധിപ്പിക്കുന്നതിനാണ് ഈ രണ്ട് നടപടികളും ലക്ഷ്യമിടുന്നത്. വൈറസിനെതിരെ പോരാടാൻ ലക്ഷ്യമിട്ടുള്ള സാമ്പത്തിക ദുരിതാശ്വാസത്തിനും ഉത്തേജനത്തിനും കുറഞ്ഞത് 116.9 ബില്യൺ യുവാൻ (16.4 ബില്യൺ ഡോളർ) സർക്കാർ അനുവദിച്ചിട്ടുണ്ട്.

ധനസഹായം

ചൊവ്വാഴ്ചത്തെ പ്രഖ്യാപനത്തിൽ കുറഞ്ഞ വരുമാനക്കാരായ കുടുംബങ്ങൾക്കും മാർച്ച് മുതൽ ജൂൺ വരെ തൊഴിലില്ലാത്തവർക്കും ധനസഹായം സർക്കാർ വാഗ്ദാനം ചെയ്തിട്ടുണ്ട്. ഇത് എത്രമാത്രം നൽകുമെന്ന് സർക്കാർ വ്യക്തമാക്കിയിട്ടില്ല, എന്നാൽ ഈ നടപടി 67 ദശലക്ഷത്തിലധികം ആളുകൾക്ക് പ്രയോജനം ചെയ്യുമെന്നാണ് കണക്കാക്കുന്നത്. എസ്എംഇകൾക്കും മഹാമാരി ബാധിച്ച ജീവനക്കാർക്കും സാമ്പത്തിക ആശ്വാസം വർദ്ധിപ്പിക്കുന്നത് ഈ സമയത്തെ ഏറ്റവും മികച്ച സാമ്പത്തിക സാമൂഹിക നയങ്ങളായിരിക്കുമെന്ന് വിശ്വസിക്കുന്നതായി നോമുറയുടെ ചൈന ചീഫ് സാമ്പത്തിക ശാസ്ത്രജ്ഞനായ ടിംഗ് ലു ബുധനാഴ്ച ഒരു കുറിപ്പിൽ പറഞ്ഞു.

വാഹന നിർമ്മാണ മേഖല

ജനുവരി, ഫെബ്രുവരി മാസങ്ങളിൽ വിൽപ്പന 42 ശതമാനം ഇടിഞ്ഞതിനെത്തുടർന്ന് ബീജിംഗ് വാഹന വ്യവസായത്തെ പുനരുജ്ജീവിപ്പിക്കാൻ ശ്രമിച്ചു കൊണ്ടിരിക്കുകയാണ്. ഉപയോഗിച്ച കാറുകളുടെ വിൽപ്പന നികുതി 2023 അവസാനം വരെ വെട്ടിക്കുറയ്ക്കുമ്പോൾ ഇലക്ട്രിക് വാഹനങ്ങൾക്ക് സബ്സിഡികളും നികുതിയിളവും സർക്കാർ രണ്ട് വർഷത്തേക്ക് വർദ്ധിപ്പിക്കും. വ്യാപകമായി അടച്ചുപൂട്ടലും യാത്രാ നിയന്ത്രണങ്ങളും ലഘൂകരിച്ചതിനെ തുടർന്ന് ഫാക്ടറികൾ വീണ്ടും തുറന്നതിനാൽ ബുധനാഴ്ച പ്രസിദ്ധീകരിച്ച ഒരു സ്വകാര്യ സർവേയിൽ ചൈനയുടെ ഉൽപാദന പ്രവർത്തനങ്ങൾ അല്പം കൂടി വർദ്ധിച്ചു.

കരകയറാൻ ഒരുങ്ങുന്നു

കെയ്‌ക്‌സിൻ / മാർക്കിറ്റ് മാനുഫാക്ചറിംഗ് പർച്ചേസിംഗ് മാനേജേഴ്സ് സൂചിക കഴിഞ്ഞ മാസം റെക്കോഡ് താഴ്ന്ന 40.3 ൽ നിന്ന് 50.1 ആയി ഉയർന്നു. പ്രവർത്തനത്തിലെ ഇടിവ് കുറഞ്ഞുവെന്ന് പി‌എം‌ഐ ഡാറ്റയും സൂചിപ്പിക്കുന്നു, പക്ഷേ സമ്പദ്‌വ്യവസ്ഥ ഇതുവരെ വീണ്ടെടുത്തിട്ടില്ലെന്ന് ക്യാപിറ്റൽ ഇക്കണോമിക്സിന്റെ വിശകലന വിദഗ്ധർ ബുധനാഴ്ച ഒരു കുറിപ്പിൽ പറഞ്ഞു. സർവേ സൂചിപ്പിക്കുന്നത് കഴിഞ്ഞ മാസം പകുതിയിലധികം കമ്പനികളുടെ സ്ഥിതിഗതികൾ മെച്ചപ്പെട്ടുവെന്നാണ്. ഫെബ്രുവരിയിലെ മോശം പ്രകടനവുമായി താരതമ്യപ്പെടുത്തുമ്പോൾ പ്രവർത്തനം നേരിയ തോതിൽ മെച്ചപ്പെട്ടുവെങ്കിലും വളരെ ദുർബലമായി തുടരുന്നുവെന്ന് റിപ്പോർട്ട് സൂചിപ്പിക്കുന്നു.

ജോലികൾ അപകടത്തിൽ

ക്യാപിറ്റൽ ഇക്കണോമിക്സിൽ ഈ വർഷത്തെ ചൈനയുടെ സമ്പദ്‌വ്യവസ്ഥയെക്കുറിച്ചുള്ള ഏറ്റവും മോശം പ്രവചനമാണുള്ളത്. ആദ്യ പാദത്തിൽ ജിഡിപി 16% വരെ കുറഞ്ഞുവെന്ന് ഇത് കണക്കാക്കുന്നു. 2020 മൊത്തത്തിൽ 3% ചുരുങ്ങുമെന്ന് പ്രവചിക്കുന്നു. 2020 ൽ ചൈനയുടെ സമ്പദ്‌വ്യവസ്ഥ ഒരു ശതമാനം മാത്രമേ വളരുകയുള്ളൂവെന്നും ഇത് ദശലക്ഷക്കണക്കിന് തൊഴിൽ നഷ്ടങ്ങൾക്ക് കാരണമാകുമെന്നും നോമുറ കണക്കാക്കുന്നു. കയറ്റുമതി മന്ദഗതിയിലായാൽ മാത്രം [രണ്ടാം പാദത്തിൽ] 18 ദശലക്ഷം തൊഴിലവസരങ്ങൾ നഷ്ടപ്പെടുമെന്ന് കണക്കാക്കുന്നുവെന്നും റിപ്പോർട്ടിൽ പറയുന്നു.

കൂടുതൽ സർക്കാർ സഹായം

ജിഡിപിയുടെ ഏകദേശം 60% വരുന്ന ചൈനയിലെ സേവന വ്യവസായത്തിലെ പ്രവർത്തനത്തെക്കുറിച്ചുള്ള സർവേ വെള്ളിയാഴ്ച കെയ്ക്‌സിൻ പ്രസിദ്ധീകരിക്കും. സമ്പദ്‌വ്യവസ്ഥയ്ക്ക് സർക്കാർ കൂടുതൽ സഹായം നൽകേണ്ടി വരുമെന്നാണ് വിശകലന വിദഗ്ധർ പ്രതീക്ഷിക്കുന്നത്. വ്യക്തികൾ, തൊഴിൽ വിപണി, ആരോഗ്യ പരിപാലന സംവിധാനങ്ങൾ, കൂടുതൽ അടിസ്ഥാന സൌകര്യ നിക്ഷേപം, പലിശനിരക്കിൽ അധിക വെട്ടിക്കുറവ് എന്നിവയ്ക്കായി ബീജിംഗ് കൂടുതൽ പിന്തുണ പ്രഖ്യാപിക്കുമെന്ന് യുബി‌എസിന്റെ ചീഫ് ചൈന സാമ്പത്തിക ശാസ്ത്രജ്ഞൻ താവോ വാങ് പറഞ്ഞു.