വരുമാനത്തിൽ കുതിപ്പ്, പക്ഷെ വിപണിയിൽ വീണ് കല്യാൺ ജ്വല്ലേഴ്സ്, ഓഹരി വാങ്ങണോ..?

മലയാളികളുടെ അഭിമാനമാണ് കല്യാൺ ജ്വല്ലേഴ്‌സ്. തൃശൂർ ആസ്ഥാനമായുള്ള ആഭരണ നിർമ്മാതാക്കളും വിതരണക്കാരുമായ കല്യാണിന് ഇന്ന് ലോകത്താകമാനം ഷോറൂമുകളുണ്ട്. ഓഹരി വിപണിയിലേക്ക് വരികയാണെങ്കിൽ ഓഗസ്റ്റ് 8 വെള്ളിയാഴ്ച രാവിലെ ബിഎസ്ഇയിൽ കല്യാൺ ജ്വല്ലേഴ്‌സിന്‍റെ ഓഹരി വില 9 ശതമാനത്തിലധികം ഇടിഞ്ഞു. ജൂൺ പാദത്തിലെ (ക്യു 1) ഫലങ്ങൾ കമ്പനി റിപ്പോർട്ട് ചെയ്തത് ഒരു ദിവസം പിന്നിടുമ്പോഴാണ് ഈ ഇടിവ്. ഇന്നലെ 590.75 രൂപയിൽ ക്ലോസ് ചെയ്ത ഓഹരി 615.65 ൽ വ്യാപാരം ആരംഭിച്ചു. തുടർന്ന് 534.95 എന്ന ഏറ്റവും താഴ്ന്ന നിലയിലെത്തി. എന്നാൽ പിന്നീട് താഴേക്ക് വീണു. 10.50-ഓടെ ഓഹരി വില 6 ശതമാനത്തിലധികം ഇടിഞ്ഞ് 550-ൽ എത്തി.

ഒന്നാം പാദ ഫലങ്ങൾ

2026 സാമ്പത്തിക വർഷത്തിലെ ആദ്യ പാദത്തിൽ കല്യാൺ ജ്വല്ലേഴ്‌സിന്‍റെ നികുതി ശേഷമുള്ള ലാഭം (PAT) 264 കോടിയായിരുന്നു. മുൻ സാമ്പത്തിക വർഷം ഇതേ കാലയളവിൽ ഇത് ₹178 കോടിയായിരുന്നു. കമ്പനിയുടെ വരുമാനം 7,268 കോടിയാണ്. കഴിഞ്ഞ വർഷത്തെ 5528 കോടിയെ അപേക്ഷിച്ച് 31 ശതമാനം വർദ്ധനവ്. കല്യാൺ ജ്വല്ലേഴ്‌സിന്‍റെ ലൈഫ്‌സ്റ്റൈൽ ജ്വല്ലറി പ്ലാറ്റ്‌ഫോമായ കാൻഡെർ, 2026 സാമ്പത്തിക വർഷത്തിലെ ആദ്യ പാദത്തിൽ 66 കോടി വരുമാനവും 10 കോടി അറ്റനഷ്ടവും രേഖപ്പെടുത്തി.

ആത്മവിശ്വാസത്തിൽ കമ്പനി

സ്വർണ്ണ വിലയിൽ ചാഞ്ചാട്ടം ഉണ്ടായിട്ടും 2026 സാമ്പത്തിക വർഷത്തിലെ ആദ്യ പാദത്തിൽ കമ്പനിക്ക് മികച്ച നേട്ടമുണ്ടാക്കാൻ സാധിച്ചെന്ന് കല്യാൺ ജ്വല്ലേഴ്‌സിന്‍റെ എക്‌സിക്യൂട്ടീവ് ഡയറക്ടർ രമേശ് കല്യാണരാമൻ പറഞ്ഞു. രാജ്യത്തുടനീളം വരാനിരിക്കുന്ന ഉത്സവ സീസണിൽ ഞങ്ങൾക്ക് പ്രതീക്ഷയുണ്ട്. അതുകൊണ്ടുതന്നെ
പുതിയ ശേഖരണങ്ങളും കാമ്പെയ്‌നുകളും ആരംഭിക്കുന്നതിനായി തയ്യാറെടുക്കുകയാണെന്നും അദ്ദേഹം കൂട്ടിച്ചേർത്തു.

ഓഹരി വാങ്ങണോ..?

കമ്പനിയുടെ വ്യാപകമായ വിപണി സാന്നിധ്യവും ആരോഗ്യകരമായ വളർച്ചാ പ്രതീക്ഷയും കാരണം കല്യാൺ ജ്വല്ലേഴ്‌സ് ഓഹരിയുടെ ദീർഘകാല സാധ്യതകളിൽ വിദഗ്ദ്ധർ പോസിറ്റീവാണ്. 700 രൂപ ടാർഗെറ്റ് വിലയോടെ ഓഹരി വാങ്ങാമെന്നാണ് ബ്രോക്കറേജ് സ്ഥാപനമായ മോത്തിലാൽ ഓസ്വാൾ ശുപാർശ ചെയ്യുന്നത്. പുതിയ ഫ്രാഞ്ചൈസി ബിസിനസുകളുടെ വിജയകരമായ വളർച്ചയും ദക്ഷിണേന്ത്യൻ വിപണികളിൽ തുടർച്ചയായ വിജയവും നേടിയതോടെ, കല്യാൺ ജ്വല്ലേഴ്‌സ് വ്യവസായത്തിലെ ഒരു മുൻനിര ബ്രാൻഡായി സ്വയം സ്ഥാപിച്ചുവെന്ന് മോത്തിലാൽ എടുത്തുപറഞ്ഞു.

ആഗോള ബ്രോക്കറേജ് സ്ഥാപനമായ സിറ്റി കല്യാൺ ജ്വല്ലേഴ്‌സ് ഓഹരിയുടെ 'വാങ്ങൽ' റേറ്റിംഗ് നിലനിർത്തുകയും ടാർഗെറ്റ് വില 700 രൂപയാക്കി ഉയർത്തുകയും ചെയ്തു. ബ്രോക്കറേജ് സ്ഥാപനമായ ജെഎം ഫിനാൻഷ്യലും 700 എന്ന ലക്ഷ്യ വിലയോടെ ഓഹരി വാങ്ങാൻ ശുപാർശ ചെയ്യുന്നു. ഓരോ സംസ്ഥാനത്തേക്കും പുതിയ പ്രാദേശിക ബ്രാൻഡുകൾ പുറത്തിറക്കാൻ കല്യാൺ ജ്വല്ലേഴ്‌സ് പദ്ധതിയിടുന്നുണ്ടെന്ന് ജെഎം ഫിനാൻഷ്യൽ ചൂണ്ടിക്കാട്ടി. പ്രാദേശിക ആവശ്യങ്ങൾ നിറവേറ്റുന്നതിനും ബഹുജന വിപണി ലക്ഷ്യമിട്ട് മൊത്തം അഭിസംബോധന ചെയ്യാവുന്ന വിപണി വർദ്ധിപ്പിക്കുന്നതിനും ഇത് സഹായകമാകും. കല്യാൺ ജ്വല്ലേഴ്‌സിനെക്കുറിച്ച് കവറേജ് നൽകുന്ന ഒമ്പത് വിശകലന വിദഗ്ധരിൽ എട്ട് പേർക്ക് 'വാങ്ങുക' റേറ്റിംഗും ഓരാൾക്ക് 'വിൽക്കുക' ശുപാർശയുമുണ്ട്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.