ഫോൺ മാത്രമല്ല, ഷവോമി ഇനി വായ്പയും നൽകും; ഒരു ലക്ഷം രൂപ വരെ വായ്പയെടുക്കാം എംഐ ക്രെഡിറ്റിൽ നിന്ന്

ഓൺലൈൻ വായ്പ പ്ലാറ്റ്ഫോം

ക്രെഡിറ്റ്ബീയുമായി സഹകരിച്ച് ഒരു ലക്ഷം രൂപ വരെ വായ്പ വാഗ്ദാനം ചെയ്യുന്നതായി കഴിഞ്ഞ വർഷം പ്രഖ്യാപിച്ചിരുന്നു. എന്നാൽ ആദ്യമായാണ് എംഐ ക്രെഡിറ്റ് സേവനത്തിന്റെ ഔപചാരിക ഉദ്ഘാടനം നിർവ്വഹിക്കുന്നതെന്നും മികച്ച വ്യക്തിഗത വായ്‌പകൾ വാഗ്ദാനം ചെയ്യുന്നതിനുള്ള ഓൺലൈൻ പ്ലാറ്റ്ഫോമാണ് എംഐ ക്രെഡിറ്റെന്നും ഷവോമി വൈസ് പ്രസിഡന്റും ഇന്ത്യ മാനേജിംഗ് ഡയറക്ടറുമായ മനു ജെയിൻ പറഞ്ഞു. കുറഞ്ഞ സമയത്തിനുള്ളിൽ ആളുകൾക്ക് ഒരു ലക്ഷം രൂപ വരെ വായ്പ ലഭിക്കുമെന്നും അദ്ദേഹം പറഞ്ഞു.

പങ്കാളികൾ

എംഐ ക്രെഡിറ്റിനായുള്ള നിലവിലെ വായ്പ പങ്കാളികൾ പ്രാഥമികമായി എൻ‌ബി‌എഫ്‌സി അല്ലെങ്കിൽ ഫിൻ‌ടെക്കുകളായ ആദിത്യ ബിർള ഫിനാൻസ് ലിമിറ്റഡ്, മണി വ്യൂ, ഏർ‌ലി സാലറി, സെസ്റ്റ്‌മണി, ക്രെഡിറ്റ് വിദ്യ എന്നിവയാണ്. എംഐ പേയ്ക്ക് ശേഷം കമ്പനി ഇന്ത്യയിൽ ലഭ്യമാക്കുന്ന രണ്ടാമത്തെ സാമ്പത്തിക ഉൽ‌പ്പന്നമാണ് എംഐ ക്രെഡിറ്റ്.

എംഐ പേ

എംഐയുടെ (ഷവോമി ഓപ്പറേറ്റിംഗ് സിസ്റ്റം) ഫോണുകളിൽ ലഭ്യമായ യുപിഐ അധിഷ്ഠിത പേയ്‌മെന്റ് അപ്ലിക്കേഷനാണ് എംഐ പേ. കൂടാതെ ഗെറ്റ്‌ആപ്സ്, ഗൂഗിൾ പ്ലേ സ്റ്റോർ എന്നിവിടങ്ങളിൽ നിന്നും ഈ ആപ്പ് ഡൗൺലോഡ് ചെയ്യാം. 2018 മാർച്ചിൽ ഇന്ത്യയിൽ ആരംഭിച്ച എംഐ പേയ്ക്ക് ഇതുവരെ 20 മില്യണിലധികം രജിസ്റ്റർ ചെയ്ത ഉപഭോക്താക്കളുണ്ട്.

ഇന്ത്യൻ വിപണി

കമ്പനിയുടെ എംഐ ഫിനാൻസ് ബിസിനസ്സ് നാല് വർഷം മുമ്പാണ് ചൈനയിൽ ആരംഭിച്ചതെന്ന് ഷവോമി കോർപ്പറേഷന്റെ സഹസ്ഥാപകനും സീനിയർ വൈസ് പ്രസിഡന്റും ഷവോമി ഫിനാൻസ് ചെയർമാനും സിഇഒയുമായ ഹോങ് ഫെങ് പറഞ്ഞു. എംഐയുടെ സാമ്പത്തിക സേവനങഅങൾക്ക് ചൈനയ്ക്ക് പുറത്തുള്ള ഏറ്റവും വലിയ വിപണിയായി ഇന്ത്യ വളരുമെന്നാണ് പ്രതീക്ഷയെന്നും അദ്ദേഹം പറഞ്ഞു. ചൈനയിൽ ധനകാര്യ മാനേജ്മെന്റ്, ഇൻഷുറൻസ് സേവനങ്ങൾ തുടങ്ങി വിവിധ സാമ്പത്തിക സേവനങ്ങൾ ഷവോമി വാഗ്ദാനം ചെയ്യുന്നുണ്ടെന്നും വിവിധ പങ്കാളികളുമായി സഹകരിച്ച് ഇവ ഇന്ത്യയിലേക്കും കൊണ്ടു വരാൻ ശ്രമിക്കുമെന്നും ഫെങ് പറഞ്ഞു.

സാമ്പത്തിക സേവനം

ഇന്ത്യയിൽ കൂടുതൽ സാമ്പത്തിക ഉൽ‌പ്പന്നങ്ങൾ കൊണ്ടുവരാൻ കമ്പനി ആഗ്രഹിക്കുന്നുണ്ടെങ്കിലും നിലവിലെ ധനകാര്യ സേവന ബിസിനസ്സ് സുസ്ഥിരമായിരിക്കുക, ശരിയായ പങ്കാളികളെ കണ്ടെത്തുക തുടങ്ങിയ ഘടകങ്ങളെ ആശ്രയിച്ചിരിക്കും ഇതെന്ന് മനു ജെയിൻ വ്യക്തമാക്കി. സാമ്പത്തിക സേവനങ്ങളുടെ നടത്തിപ്പിനായി 20 അംഗ സംഘമാണ് ഇന്ത്യയിൽ കമ്പനിക്ക് ഉള്ളത്. 2023 ഓടെ ഇന്ത്യയിൽ നൽകുന്ന ഓൺലൈൻ ക്രെഡിറ്റ് വായ്പ 70 ലക്ഷം കോടിയിലെത്തുമെന്നാണ് ബിസിജി റിപ്പോർട്ടെന്നും ജെയിൻ ചൂണ്ടിക്കാട്ടി.

വായ്പ നൽകുന്നത് ആർക്ക്?

യുവ പ്രൊഫഷണലുകൾക്കാണ് എംഐ വ്യക്തിഗത വായ്പ നൽകാൻ മുൻതൂക്കം നൽകുന്നത്. എംഐ ഫോൺ ഉപയോക്താക്കൾക്ക് അപ്ലിക്കേഷനിൽ അവരുടെ ക്രെഡിറ്റ് സ്കോർ സൌജന്യമായി പരിശോധിക്കാനും കഴിയും. മി ക്രെഡിറ്റ് വഴി ഈ വർഷം നവംബറിൽ 28 കോടിയിലധികം വായ്പ വിതരണം ചെയ്തു. ഇതിൽ 20 ശതമാനം ഉപഭോക്താക്കളും ഏറ്റവും ഉയർന്ന വായ്പയായ ഒരു ലക്ഷം രൂപയാണ് നേടിയിരിക്കുന്നത്.