Click it and Unblock the Notifications
ലഖ്നൗ: കൊവിഡ് പ്രതിസന്ധിക്ക് ശേഷം കരകയറാനുള്ള മാര്ഗങ്ങള് തേടി ഉത്തര്പ്രദേശ് സര്ക്കാര്. യുപിയുടെ സമ്പദ് ഘടന ശക്തിപ്പെടുത്താനുള്ള നീക്കങ്ങളാണ് യോഗി നടത്തുന്നത്. പ്രവാസികളെ യുപിയില് നിക്ഷേപിക്കാനായി സ്വാഗതം ചെയ്യുകയാണ് യോഗി. നേരത്തെ ബോളിവുഡില് ചെന്ന് സിനിമാ നിര്മാണ കമ്പനികളോട് യുപിയില് കൂടുതല് ഷൂട്ടിംഗുകളും ഒരു പുതിയ സിനിമാ മേഖലയും തുടങ്ങണമെന്ന് യോഗി ആവശ്യപ്പെട്ടിരുന്നു. എന്നാല് വേണ്ടത്ര അത് ഫലം കണ്ടിരുന്നില്ല.
പ്രവാസികളോട് കൂടുതലായി സമ്പദ് ഘടനയില് ഇടപെടാനാണ് യോഗി ആവശ്യപ്പെടുന്നത്. യുപിയിലെ 75 ജില്ലകളിലും മെഡിക്കല് കോളേജുകള് നിര്മിക്കാനാണ് യോഗി സര്ക്കാര് പദ്ധതിയിടുന്നത്.അതിനായിട്ടാണ് നിക്ഷേപകരെ ആവശ്യം. അമേരിക്കയില് നിന്നുള്ള നിക്ഷേപകരെയാണ് യോഗി ലക്ഷ്യമിട്ടുള്ളത്. ഉത്തര്പ്രദേശ് അസോസിയേഷന് ഓഫ് നോര്ത്ത് അമേരിക്കയുടെ ഒരു യോഗത്തില് പങ്കെടുത്ത് യോഗി സംരംഭകരെ സംസ്ഥാനത്തേക്ക് ക്ഷണിച്ചിരിക്കുകയാണ്.
യുപിയില് നിക്ഷേപത്തിനായി എന്ത് സൗകര്യം വരെ ഒരുക്കാന് തയ്യാറാണെന്ന് യോഗി പറഞ്ഞു. അവര്ക്കായി എന്ത് കാര്യവും ഞങ്ങള് ഒരുക്കി നല്കും. പ്രധാനമന്ത്രി നരേന്ദ്ര മോദിയുടെ ആത്മനിര്ഭര് ഭാരതിനായി എന്ത് കാര്യവും ചെയ്യാന് തയ്യാറാണെന്ന് യോഗി പറഞ്ഞു. ഓരോ സംസ്ഥാനത്തെയും സ്വയം പര്യാപ്തമാക്കുകയാണ് ലക്ഷ്യം. അതിലൂടെ രാജ്യം സ്വയം പര്യാപ്തത നേടുമെന്നും യോഗി പറഞ്ഞു. അതേസമയം നിക്ഷേപകര് യുപിയില് നിക്ഷേപം നടത്തുമോ എന്നൊന്നും ഇതുവരെ വ്യക്തമായിട്ടില്ല.
ഒരു ജില്ലയില് ഒരു ഉല്പ്പന്നം എന്ന പദ്ധതിയാണ് സര്ക്കാര് നടപ്പാക്കുന്നത്. പുതിയ റോഡുകള്, ടൂറിസത്തിന്റെ വികസനം, ഭക്ഷ്യനിര്മാണ മേഖലയിലെ വികസനം എന്നിവ യുപിയുടെ കരുത്താണ്. ബിജെപി അധികാരത്തില് വരുമ്പോള് 12 മെഡിക്കല് കോളേജുകളാണ് ആകെ ഉണ്ടായിരുന്നത്. 30 എണ്ണമാണ് ഞങ്ങള് നിര്മിച്ചത്. 75 ജില്ലകളിലും ഓരോ മെഡിക്കല് കോളേജുകളാണ് ഞങ്ങള് ലക്ഷ്യമിടുന്നത്. ബുന്ധേല്ഖണ്ഡ്, പൂര്വാഞ്ചല്, ഗംഗ എക്സ്പ്രസ് വേ ഉടന് നിര്മാണം തുടങ്ങും. അതിലൂടെ വികസനം സ്വകാര്യ മേഖലയിലേക്ക് എത്തുമെന്നും യോഗി പറഞ്ഞു.
Sign in with Google