10 ലക്ഷത്തിന്റെ കെഎസ്എഫ്ഇ ചിട്ടിയിൽ നിന്ന് ആദ്യ മാസം എത്ര രൂപ ലഭിക്കും; ലേല നടപടികൾ ഇങ്ങനെ

കെഎസ്എഫ്ഇ ചിട്ടി ചേർന്ന് മാസ ​ഗഡു അടച്ചൊരാൾക്ക് ലേലത്തിൽ പങ്കെടുക്കാൻ സാധിക്കും. ഓരോരുത്തരുടെയും ആവശ്യകത അനുസരിച്ച് ഏത് സമയം വേണെങ്കിലും ചിട്ടി ലേലത്തിൽ സ്വന്തമാക്കാവുന്നതാണ്. എന്നാൽ ആദ്യ മാസത്തിൽ തന്നെ ചിട്ടി വിളിച്ചാൽ എത്ര രൂപ ലഭിക്കുമെന്നും ലേല കിഴിവ് എത്രയാകുമെന്നുമുള്ള അടിസ്ഥാന വിവരങ്ങൾ അറിഞ്ഞ് ലേലത്തിൽ പങ്കെടുക്കുന്നത് ലാഭകരമായി ചിട്ടി മുന്നോട്ട് കൊണ്ടു പോകാൻ സഹായിക്കും. റെ​ഗുലർ ചിട്ടിയിലെയും മൾട്ടി ഡിവിഷൻ ചിട്ടിയിലെയും ലേല നടപടികൾ നോക്കാം.

ആദ്യ മാസം ചിട്ടി വിളിച്ചാൽ

പെട്ടന്ന് പണത്തിന് ആവശ്യമുള്ളവരാണ് ആദ്യ മാസം ചിട്ടി വിളിച്ചെടുക്കുന്നത്. അതിനാൽ തന്നെ കൂടുതൽ ചിട്ടികളും പരമാവധി ലേല കിഴിവില്‍ തന്നെയാണ് ലേലം നടക്കുന്നത് റെഗുലര്‍ ചിട്ടിയാണെങ്കില്‍ 30 ശതമാനവും മള്‍ട്ടി ഡിവിഷന്‍ ചിട്ടിയാണെങ്കിൽ കാലാവധി അനുസരിച്ച് 30%, 35%, 40 ശതമാനം കിഴിവിലാണ് ആദ്യ മാസത്തിൽ ലേലം നടക്കുക.

2 ലക്ഷം രൂപയുടെ റെ​ഗുലർ ചിട്ടിയാണെങ്കിൽ 60,000 രൂപയാണ് പരമാവധി ലേല കിഴിവ്. 1.40 ലക്ഷം രൂപ ചിട്ടിയിൽ നിന്ന് ആദ്യ മാസം ലഭിക്കും. 5 ലക്ഷത്തിന്റെ ചിട്ടിയാണെങ്കിൽ 1.50 ലക്ഷം രൂപ പരമാവധി ലേല കിഴിവിൽ പോകുന്ന മാസങ്ങളിൽ കുറയും. 10 ലക്ഷത്തിന്റെ ചിട്ടി 30 ശതമാനം ലേല കിഴിവിൽ വിളിക്കുമ്പോൾ 3 ലക്ഷം കുറയും. ചിട്ടി വിളിച്ചൊരാൾക്ക് ബാക്കി 7 ലക്ഷം രൂപ ലഭിക്കും.

മൾട്ടി ഡിവിഷൻ ചിട്ടിയിൽ എത്ര രൂപ ലഭിക്കും.

മൾട്ടി ഡിവിഷൻ ചിട്ടിയാണെങ്കിൽ കാലാവധി അനുസരിച്ച് പരമാവധി ലേല കിഴിവ് വ്യത്യാസപ്പെടും. 60 മാസം വരെ 30 ശതമാനവും 60- 100 മാസ ചിട്ടിയിൽ 35 ശതമാനവും 120 മാസ കാലാവധിയുള്ള ചിട്ടിയിൽ 40 ശതമാനവുമാണ് പരമാവധി ലേല കിഴിവ്. ആദ്യ മാസത്തെ ആവശ്യക്കാർക്ക് പരമാവധി ലേല കിഴിവിൽ ചിട്ടി വിളിക്കാം.

50 മാസ കാലാവധിയുള്ള 5 ലക്ഷത്തിന്റെ മള്‍ട്ടി ഡിവിഷന്‍ ചിട്ടിയാണെങ്കില്‍ 1.50 ലക്ഷം രൂപ പരമാവധി ലേല കിഴിവ് വരും. 3.50 ലക്ഷം രൂപ നേടാം. 100 മാസ കാാവധിയള്ള 10 ലക്ഷത്തിന്റെ ചിട്ടിയിൽ 3.50 ലക്ഷം വരെ താഴ്ത്തി ലേലം വിളിക്കാം.

6.50 ലക്ഷം രൂപ വരെ നേടാം. 120 മാസ കാലാവധിയുള്ള 12 ലക്ഷത്തിന്റെ ചിട്ടി 40 ശതമാനം ലേല കിഴിവിൽ വിളിക്കാം. 4.80 ലക്ഷം രൂപ വരെ കിഴിവിൽ ചിട്ടി ലേലം നടക്കുമ്പോൾ 7.20 ലക്ഷം രൂപ ലഭിക്കും.

ആദ്യ മാസം ലേലം വിളിക്കുന്നത് ലാഭമോ?

ചിട്ടി ആദ്യ മാസം ലേലം വിളിക്കുമ്പോൾ എത്ര രൂപ കുറവ് വരുന്നു എന്നത് ലേല കിഴിവ് അടിസ്ഥാനമായിരിക്കും. 10 ലക്ഷത്തിന്റെ റെ​ഗുലർ ചിട്ടിയിൽ 3 ലക്ഷം രൂപ കുറയുമ്പോൾ ചിട്ടി എങ്ങനെ ലാഭകരമാകും എന്ന് നോക്കാം. ചിട്ടി പണം ഉപയോ​ഗിക്കുന്നിടത്ത് നിന്ന് ലേല കിഴിവായി കുറയുന്ന തുകയേക്കാൾ ലാഭമുണ്ടാകുമ്പോൾ ചിട്ടി ലാഭമാണെന്ന് പറയാം.

ഭവന വായ്പ തിരിച്ചടവിന് ഉപയോ​ഗിക്കുകയും അടയ്ക്കുന്ന പലിശയിൽ 3 ലക്ഷത്തിൽ കൂടുതൽ ലാഭിക്കാനും സാധിച്ചാൽ ചിട്ടി ആദ്യ മാസം വിളിച്ചെടുത്തത് ലാഭമാണെന്ന് പറയാം. ബിസിനസ് ആവശ്യങ്ങൾക്ക് ചിട്ടി വിളിച്ചെടുക്കുന്നവരും വിവാഹം, മറ്റു ആവശ്യങ്ങൾക്ക് ഉപയോ​ഗിക്കുന്നവർക്കും വായ്പയേക്കാൾ ലാഭമാണെങ്കിൽ ചിട്ടി ആദ്യ മാസത്തിൽ വിളിക്കുന്നത് അനുയോജ്യമാണ്.

ചിട്ടി സ്ഥിര നിക്ഷേപം

ആദ്യ മാസം ചിട്ടി ലേലത്തിൽ വിളിച്ച് കെഎസ്എഫ്ഇയിൽ തന്നെ സ്ഥിര നിക്ഷേപമിടുന്നത് ലാഭകരമാകുമോ? ഹ്രസ്വകാല ചിട്ടിയാണെങ്കില്‍ ഈ രീതി നഷ്ടം വരുത്തും. കുറഞ്ഞ കാലത്തേക്കാണ് പലിശ ലഭിക്കുന്നത് എന്നതിനാൽ ലേല കിഴിവനേക്കാളും പലിശ വരുമാനം നേടാൻ സാധ്യതയില്ല. ഇത് നഷ്ടമുണ്ടാക്കും. കാലവധി കൂടിയ ചിട്ടിയാകുമ്പോൾ കൂടുതൽ പലിശ നേടാനുള്ള സാവകാശമുണ്ട്.