കാർ ലോൺ എടുക്കുന്നവർ സൂക്ഷിക്കുക; പണി കിട്ടുന്നത് ഇങ്ങനെ

വായ്പാ തുകയെ സ്വാധീനിക്കുന്ന ഘടകങ്ങൾ

പുതിയ കാർ വാങ്ങുന്നതിനും മുമ്പ് മറ്റാരുടെയെങ്കിലും ഉടമസ്ഥതയിലുള്ള കാറുകൾ വാങ്ങുന്നതിനും ബാങ്കിൽ നിന്ന് വായ്പ ലഭിക്കും. എന്നാൽ പലിശ നിരക്കുകളിൽ വ്യത്യാസമുണ്ടാകും. വായ്പ തുക അപേക്ഷകന്റെ പ്രായം, വരുമാനം എന്നിവയെ ആശ്രയിച്ചാണ് ലഭിക്കുക. പ്രതിമാസ ശമ്പളവും വാർഷിക വരുമാനവും വായ്പാ തുകയെ സ്വാധീനിക്കുന്ന മറ്റ് ചില ഘടകങ്ങളാണ്.

കാറിന്റെ വില

വാഹനത്തിന്റെ എക്സ്ഷോറൂം വില, ഓൺ റോഡ് വില തുടങ്ങിയ കാര്യങ്ങൾ കാർ ലോൺ എടുക്കുന്നതിന് മുമ്പ് അറിഞ്ഞിരിക്കണം. എക്സ്ഷോറൂം വില, ഒരു ഡീലറുടെ പക്കൽ നിന്ന് ഒരു കാർ വാങ്ങാൻ ഉപഭോക്താവ് നൽകുന്ന തുകയാണ്. രജിസ്ട്രേഷൻ ചാർജുകൾ, ഇൻഷുറൻസ് പ്രീമിയം, റോഡ് ടാക്സ് തുടങ്ങിയവ നൽകുമ്പോൾ ഇത് ഓൺ-റോഡ് വിലയായി മാറുന്നു. വാസ്തവത്തിൽ, കാർ നിങ്ങളുടെ സ്വന്തമാകണമെങ്കിൽ ചെലവാകുന്ന മൊത്തം തുകയാണ് ഓൺ-റോഡ് വില.

ഇഎംഐ

വായ്പ തിരിച്ചടയ്ക്കുന്നത് ഇഎംഐ രീതിയിലായതുകൊണ്ട് മാസം മറ്റ് ചെലവുകൾ കഴിഞ്ഞ് എത്ര രൂപ തിരിച്ചടയ്ക്കാനാകുമെന്ന് പരിശോധിക്കുക. ഇത് കണക്കുകൂട്ടി വേണം ഇഎംഐ തിരഞ്ഞെടുക്കേണ്ടത്. സ്ത്രീകൾക്ക് കുറഞ്ഞ പലിശ നിരക്ക് വാഗ്ദാനം ചെയ്യുന്ന ചില ബാങ്കുകളുമുണ്ട്.

പ്രോസസ്സിം​ഗ് ഫീസ്

വായ്പ അനുവദിക്കുന്നതിനൊപ്പം ഉപഭോക്താക്കളിൽ നിന്ന് ബാങ്ക് ഈടാക്കുന്ന തുകയാണ് പ്രോസസിം​ഗ് ഫീസ്. ഓരോ ബാങ്കിലെയും പ്രോസസ്സിം​ഗ് ഫീസ് വ്യത്യസ്തമായിരിക്കും. ബാങ്കിന്റെ പ്രോസസ്സിം​ഗ് ഫീസ് സംബന്ധിച്ച വിവരങ്ങൾ വായ്പ എടുക്കുന്നതിന് മുമ്പ് തന്നെ വായിച്ച് മനസ്സിലാക്കണം. ഇല്ലെങ്കിൽ ചില അധിക ഫീസുകൾ നൽകേണ്ടി വരും.

ക്രെഡിറ്റ് സ്കോർ

അപേക്ഷന്റെ ക്രെഡിറ്റ് സ്കോർ പരി​ഗണിച്ചാണ് ബാങ്കുകൾ വായ്പ അനുവദിക്കുന്നത്. മികച്ച സ്കോറില്ലെങ്കിൽ നിങ്ങളുടെ വായ്പാ അപേക്ഷ തള്ളിപ്പോകാൻ സാധ്യതയുണ്ട്. ലോണിന് അപേക്ഷിക്കുന്നതിന് മുമ്പ് തന്നെ നിങ്ങളുടെ ക്രെഡിറ്റ് സ്കോർ പരിശോധിച്ച് മെച്ചപ്പെടുത്താൻ ആവശ്യമായ നടപടികൾ എടുക്കാം.